កីឡា

ម្ចាស់មេដាយមាសស៊ីហ្គេម៣គ្រឿងដូចគ្នា ពៅ សុខា និង លី បូរ៉ាមី ចូលរោងជ័យថ្ងៃនេះ

បានផុស

៣ years មុន

នៅ

ថ្ងៃព្រហស្បតិ៍ ៦ កក្កដា ២០២៣

ដោយ

កីឡាករជម្រើសជាតិកម្ពុជា លី បូរ៉ាមី និងកីឡាការិនីជម្រើសជាតិកម្ពុជា ពៅ សុខា បានដឹកដៃគ្នាចូលរោងអាពាហ៍ពិពាហ៍ នៅថ្ងៃទី៦ ខែកក្កដា ឆ្នាំ២០២៣ បន្ទាប់ពីទទួលបានជោគជ័យក្នុងព្រឹត្តិការណ៍កីឡាស៊ីហ្គេម លើកទី៣២ ដែលប្រទេសកម្ពុជាធ្វើជាម្ចាស់ផ្ទះ។

កីឡាករ លី បូរ៉ាមី និងកីឡាការិនី ពៅ សុខា ជាអត្តពលិកវ៉ូវីណាមជម្រើសជាតិកម្ពុជាដែលទទួលបានជោគជ័យដូចគ្នាក្នុងអាជីពកីឡាវ៉ូវីណាមរាប់ចាប់តាំងពីការឈ្នះមេដាយមាសកម្រិតអាស៊ាន អាស៊ី និងពិភពលោក ជាពិសេសកីឡាស៊ីហ្គេម។

អ្វីដែលរឹតតែជោគជ័យសម្រាប់អ្នកទាំងពីរទៀតនោះគឺក្នុងព្រឹត្តិការណ៍កីឡាស៊ីហ្គេម លើកទី៣២ កាលពីខែឧសភា ឆ្នាំ២០២៣ ដែលប្រទេសកម្ពុជារៀបចំធ្វើជាម្ចាស់ផ្ទះលើកដំបូង។ សរុបមេដាយមាស៦គ្រឿងសម្រាប់អ្នកទាំងពីរ។

កីឡាករ លី បូរ៉ាមី បានឈ្នះមេដាយមាស៣គ្រឿងគឺឯកត្តជន២គ្រឿង និងក្រុម១គ្រឿង សម្រាប់ការប្រកួតកីឡាវ៉ូវីណាមក្នុងកីឡាស៊ីហ្គេម លើកទី៣២ ដែលទើបតែទទួលបានប្រាក់រង្វាន់ចំនួន១២០លានរៀលពីរាជរដ្ឋាភិបាលកម្ពុជា។

កីឡាការិនី ពៅ សុខា បានឈ្នះមេដាយមាស៣ ប្រាក់១ និងសំរិទ្ធ១គឺមាស៣លើវិញ្ញាសាក្រុមទាំង៣ ប្រាក់១លើវិញ្ញាសាឯកត្តជន និងសំរិទ្ធលើវិញ្ញាសាក្រុម សម្រាប់ការប្រកួតកីឡាវ៉ូវីណាម ក្នុងកីឡាស៊ីហ្គេម លើកទី៣២ ដូច្នេះកីឡាការិនីរូបនេះទទួលបានប្រាក់រង្វាន់១៦៦លានរៀល។

ថ្ងៃទី៦ ខែកក្កដា ឆ្នាំ២០២៣នេះ លី បូរ៉ាមី និង ពៅ សុខា បានសម្រេចដឹកនាំដៃគ្នារៀបចំមង្គលជ័យដើម្បីកសាងជីវិតគ្រួសារទៅអនាគត។ កម្ពុជាថ្មីសូមជូនពរម្ចាស់មេដាយមាសស៊ីហ្គេមទាំងពីរជួបតែសុភមង្គលគ្រប់ពេលវេលា៕

អត្ថបទ៖ វីរបុត្រ