អ្នកជំនាញ ៖ វិស័យអចលនទ្រព្យ​អាចកម្រើកឡើងវិញ​នៅចុងឆ្នាំ ២០២៤

វិស័យអចលនទ្រព្យ នៅតែមានដំណើរការមិនសូវល្អនៅដើមឆ្នាំ ២០២៤។ ប៉ុន្តែអាចនឹងមានដង្ហើមដកឡើងវិញ នៅចុងឆ្នាំដដែលនេះ។ នេះបើតាមការប្រមើលមើលរបស់អ្នកជំនាញអចលនទ្រព្យ។

អ្នកឧកញ៉ា លាង ម៉េង អនុប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន Chip Mong Group បានលើកឡើងថា ការវិនិយោគលើវិស័យអចលនទ្រព្យមានកំណើនខ្ពស់ ជាពិសេសអ្នកមានលុយ ដូចជា អ្នកឧកញ៉ា លោកឧកញ៉ា ជាដើម។ ​ដោយសារមើលឃើញពីផលល្អនៃវិស័យនេះ ម្នាក់ៗវិនិយោគតាមគ្នា ដែលធ្វើឱ្យ​ចំនួននៃអ្នក​រកស៊ីកើនឡើងខ្លាំង ស្របពេលដែលសេដ្ឋកិច្ចពិភពលោកមិនប្រាកដប្រជា នាំឱ្យប៉ះពាល់ដល់អាជីវកម្មរបស់ខ្លួន។

​

អ្នកឧកញ៉ាបន្តដូច្នេះថា« សម្រាប់ខ្ញុំជាអ្នកវិនិយោគធំក្នុងវិស័យអចលនទ្រព្យដែរ គម្រោងធំៗ ដែលខ្ញុំកំពុងធ្វើទាំងអស់​មាន ៦ នៅតែលក់បាន គ្រាន់តែចំនួនថយជាងមុន ហើយអ្នកដែលចង់ទិញគម្រោងខ្ញុំ គឺជាអ្នកដែលចង់រស់​នៅក្នុងផ្ទះ​ហ្នឹងពិតប្រាកដ មិនមែនគាត់ទិញដើម្បីប្រាក់ចំណេញទេ»។

ម្ចាស់គម្រោងធំៗរបស់ក្រុមហ៊ុនជីបម៉ុងគ្រុប អ្នកឧកញ៉ា លាង ម៉េង បានវាយតម្លៃថា ដើមឆ្នាំ ២០២៤ ស្ថានភាពវិស័យ​អចលនទ្រព្យ មិនទាន់ល្អប្រសើរនោះទេ ប៉ុន្តែវិស័យនេះ នឹងចាប់ផ្តើមល្អឡើងវិញនៅអំឡុងខែ តុលា ឆ្នាំដដែលនេះ។ ទន្ទឹមនឹងនេះ អ្នកឧកញ៉ា សង្ឃឹមថា រាជរដ្ឋាភិបាលថ្មី ដែលយល់ច្បាស់អំពីស្ថានភាពនេះ អាចនឹងមានយុទ្ធសាស្រ្ត​គន្លឹះធ្វើវិស័យអចលនទ្រព្យកម្រើកឡើងវិញ ដូចកាលឆ្នាំ ២០១៨កន្លងទៅ ដែលមានសេដ្ឋកិច្ចខ្លាំង។ ការលើកឡើង​របស់អ្នកឧកញ៉ា លាង ម៉េង ធ្វើឡើងក្នុងវេទិកាធុរកិច្ចឆ្នាំ២០២៣ រៀបចំដោយសមាគមឧកញ៉ាកម្ពុជា (ស.ឧ.ក) កាលពីពេលថ្មីៗនេះ។

លោកឧកញ៉ា គីម ហ៊ាង អគ្គនាយកក្រុមហ៊ុនខ្មែររៀលអ៊ីស្ទេត បានលើកឡើងថា ស្ថានភាពអចលនទ្រព្យនៅកម្ពុជា មានកំណើនឬថយចុះ គឺពឹងអាស្រ័យទៅលើ​ស្ថាន​ភាព​សេដ្ឋកិច្ចពិភពលោក។ ជាពិសេសនោះ គឺស្ថានភាពសេដ្ឋកិច្ចចិន និងអាមេរិក។ លោកថា ស្ថានភាពសេដ្ឋកិច្ច​ចិនសព្វថ្ងៃកំពុងរងគ្រោះ ខណៈដែលអាមេរិកក៏ដូចគ្នា។ បើតាមលោកឧកញ៉ា គីម ហ៊ាង «នៅពេលដែលអ្នកដឹកនាំសេដ្ឋកិច្ចពិភពលោករងគ្រោះ វាក៏ប៉ះ​ពាល់ដល់សេដ្ឋកិច្ចរបស់យើង ហើយបើ​សេដ្ឋកិច្ចប៉ះពាល់ វិស័យដីធ្លីក៏រងគ្រោះទៅតាមនឹងដែរ»។

អ្នកជំនាញវិស័យអចលនទ្រព្យមួយរូបទៀត គឺលោក ច្រឹក សុខនីម ប្រធានក្រុមហ៊ុន Century 21 Mekong បានលើកឡើងនាពេលថ្មីៗនេះថា បច្ចុប្បន្ននេះ ចំនួនតម្រូវ​ការអ្នកចង់ទិញផ្ទះមានច្រើន ប៉ុន្តែលទ្ធភាពក្នុង​ការយកហិរញ្ញប្បទាណពីធនាគារមានការលំបាកខ្លាំង។ លោកមើលឃើញថា វិស័យអចលនទ្រព្យសព្វថ្ងៃនេះ មានចរន្តទិញលក់តែនៅក្នុងស្រុក ពុំទាន់​មានវិនិយោគិនហូរចូលពីបរទេសនៅឡើយ។ ដើម្បីឱ្យវិស័យនេះ ទទួលបានការគាំពារខ្លាំង ទាល់តែមាន​ចរន្ត​សាច់ប្រាក់ចាក់ចូលបន្ថែម ពីរាជរដ្ឋាភិបាល ហើយផ្តល់លទ្ធភាព​ក្នុងការប្រើកម្ចី​ដោយ​បន្ធូរបន្ថយអត្រា​ការប្រាក់​សម្រាប់ខ្ចីក្នុងការប្រើលើវិស័យសំណង់ និងអចលនទ្រព្យ៕