ក្រុម ហាម៉ាស់ ចេញមុខបកស្រាយ ព័ត៌មានដែលថា ខ្លួនសម្លាប់កាត់ក្បាលទារក

កាលពីថ្ងៃព្រហស្បតិ៍ទី១២ខែតុលា អ្នកនាំពាក្យយោធាអ៊ីស្រាអែល បានបញ្ជាក់ពីសេចក្តីរាយការណ៍ដែលថា សកម្មប្រយុទ្ធហាម៉ាស់បានកាត់ក្បាលទារក ខណៈភាគីខាងប៉ាឡេស្ទីន បានចេញមុខបដិសេធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យកងកម្លាំងការពារអ៊ីស្រាអែល លោក Jonathan Conricus បាននិយាយថា អ្នកធ្វើកោសល្យវិច័យដែលទៅពិនិត្យបន្ទាប់ពីការសម្លាប់រង្គាលនៅ Be’eri – Kibbutz ជិតជ្រោយហ្គាហ្សា បានរកឃើញសាកសពកុមារ និងបញ្ជាក់ពីរបៀបដែលពួកគេស្លាប់។

លោកនិយាយជាមួយ BBC ថា “ខ្ញុំទទួលស្គាល់ចំពោះរបាយការណ៍នេះ។ វាត្រូវចំណាយពេលខ្លះដើម្បីយល់ និងផ្ទៀងផ្ទាត់របាយការណ៍ ហើយវាពិបាកនឹងជឿណាស់ដែលថា ក្រុមហាម៉ាស់ ឈានដល់ការប្រព្រឹត្តអំពើឃោរឃៅបែបនេះ”។

លោកបន្តថា “ខ្ញុំគិតថា ឥឡូវនេះ យើងអាចនិយាយដោយភាពជឿជាក់។ នេះជាអ្វីដែលក្រុមហាម៉ាស់បានធ្វើ មានសាកសពនៅរាយប៉ាយគ្រប់ទីកន្លែង ពួកគេត្រូវបានកាត់ក្បាល”។

ទោះបីជាយ៉ាងណាក៏ដោយ ក្រុមហាម៉ាស់ប៉ាឡេស្ទីន បានបដិសេធការចោទប្រកាន់ទាំងនេះ។

សេចក្តីថ្លែងការណ៍មួយនៅលើគេហទំព័ររបស់ក្រុមហាម៉ាស់ បាននិយាយថា “យើងសូមបញ្ជាក់ឲ្យច្បាស់ នូវភាពមិនពិតនៃការចោទប្រកាន់ប្រឌិត ដែលត្រូវបានផ្សព្វផ្សាយដោយប្រព័ន្ធផ្សព្វផ្សាយលោកខាងលិចមួយចំនួន។

សេចក្តីថ្លែងការណ៍ខាងលើបញ្ជាក់ថា ប្រព័ន្ធផ្សព្វផ្សាយលោកខាងលិច មិនមានវិជ្ជាជីវៈ ពោរពេញទៅដោយការភូតកុហក និងបង្កាច់បង្ខូចប្រឆាំងប្រជាជនប៉ាឡេស្ទីនរបស់យើង និងការតស៊ូរបស់ពួកគេ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពលរដ្ឋថៃ ស្លាប់នៅអ៊ីស្រាអែល កើនឡើងថែមទៀត ខណៈប្រតិបត្តិការជម្លៀស ពោរពេញដោយគ្រោះថ្នាក់