សម្ដេចធិបតី ហ៊ុន ម៉ាណែត បញ្ជាក់ថា ការដោះស្រាយបញ្ហាវិវាទដីធ្លី ត្រូវធ្វើឡើងតាមរយៈយន្ដការចំនួន ២  

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការដោះស្រាយបញ្ហាវិវាទដីធ្លី ត្រូវធ្វើឡើងតាមរយៈយន្ដការចំនួន ២ ដែលទីមួយគឺជំរុញការចែកប័ណ្ណកម្មសិទ្ធិដីធ្លី នៅទូទាំងប្រទេស និងទីពីរគឺតាមរយៈយន្ដការអាជ្ញាធរជាតិដោះស្រាយវិវាទក្រៅប្រព័ន្ធតុលាការ។

ការលើកឡើងនេះ ធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ ស្ពានខ្សែកាបតភ្ជាប់រវាងតំបន់អភិវឌ្ឍន៍កោះនរា និងតំបន់អភិវឌ្ឍន៍កោះពេជ្រ នារសៀលថ្ងៃទី ១៥ ខែវិច្ឆិកា ឆ្នាំ ២០២៣។

សម្ដេចធិបតី ហ៊ុន ម៉ាណែត មានប្រសាសន៍ថា ការដោះស្រាយបញ្ហាវិវាទដីធ្លី ត្រូវធ្វើឡើងតាមរយៈយន្ដការចំនួន ២ គឺទីមួយជំរុញការចែកប័ណ្ណកម្មសិទ្ធិដីធ្លី នៅទូទាំងប្រទេស។ កន្លងមក មន្ត្រីជំនាញ និងអាជ្ញាធរ បានចែកប័ណ្ណកម្មសិទ្ធិដីធ្លីចំនួន ២លានប័ណ្ណរួចហើយ តែនៅសល់ប្រមាណ ៥លានប័ណ្ណទៀត។

ប្រមុខរាជរដ្ឋាភិបាល បានបន្ថែមថា «ខ្ញុំបានប្រគល់ភារកិច្ច ឲ្យឯកឧត្ដមឧបនាយករដ្ឋមន្ត្រី រដ្ឋមន្ត្រីក្រសួ​ង​រៀបចំដែនដី នគរូបនីយកម្ម និងសំណង់ សាយ សំអាល់ ចាត់វិធានការដើម្បីជំរុញការបញ្ជូនប័ណ្ណបញ្ជាក់ចុងក្រោយ រៀបចំក្រុមការងារ ហើយឯកឧត្ដម សាយ សំអាល់ ជាមួយក្រុមការងាររបស់គាត់ ក៏បានរៀបចំ ហើយជំរុញ»។

ទីពីរគឺរាជរដ្ឋាភិបាល​ បា​នបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ ដែលក្នុងនោះក៏មានដោះស្រាយបញ្ហាវិវាទដីធ្លីផងដែរ។ «ខ្ញុំឃើញអ្នករិះគន់មួយចំនួន គេថា ​ការបង្កើតយន្ដការហ្នឹងមក គឺបង្កើតដើម្បីគេថា ដើម្បីបង្វែងដែន បង្កើតបង្វែងដែនម៉េច? ហើយឯកឧត្ដម កើត រិទ្ធ នៅហ្នឹង ខ្ញុំប្រគល់ភារកិច្ច ធ្វើម៉េចឲ្យយន្ដការហ្នឹងដើរ។ នេះជាការបញ្ជាក់បន្ថែមរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី៕