កម្ពុជា-វៀតណាម ឯកភាពបើកជើង​ហោះហើរត្រង់​ពីហាណូយ មកកាន់ខេត្តសៀមរាប 

កម្ពុជា-វៀតណាម បានប្រកាសជាផ្លូវការឯកភាពគ្នាបើកដំណើរការជើងហោះហើរត្រង់ពីរដ្ឋធានីហាណូយ មកកាន់​ខេត្តសៀមរាប។

ការប្រកាសបើកជើងហោះហើរនេះ ធ្វើឡើងនៅក្នុងវេទិកាជំរុញពាណិជ្ជកម្ម និងវិនិយោគកម្ពុជា-វៀតណាម ឆ្នាំ២០២៣ នៅរដ្ឋធានីហាណូយ សាធារណរដ្ឋសង្គមនិយមវៀតណាម នារសៀលថ្ងៃទី១២ ខែធ្នូ ឆ្នាំ២០២៣។

ក្រុមហ៊ុនអាកាសចរណ៍ Vietjet របស់វៀតណាម នឹងបើកដំណើរការជើងហោះហើរត្រង់ពីរដ្ឋធានីហាណូយ មកកាន់ខេត្តសៀមរាប ចាប់ពីថ្ងៃទី១៥ ខែធ្នូ ឆ្នាំ២០២៣ នេះតទៅ។

សម្តេចនាយករដ្ឋមន្រ្តី ហ៊ុន ម៉ាណែត ស្វាគមន៍ និងគាំទ្រចំពោះការចាប់ផ្តើមដំណើរការជើងហោះហើរត្រង់រវាងទីក្រុង​ហាណូយ និងខេត្តសៀមរាប ឆាប់ៗខាងមុខ ដែលជាការតភ្ជាប់ដ៏សំខាន់រវាងកម្ពុជា-វៀតណាម ដើម្បីជួយទៅដល់​ការផ្លាស់ប្តូរអ្នកទេសចរទៅវិញទៅមក រវាងប្រទេសទាំងពីរ។

សម្តេចធិបតី បានលើកឡើងអំពីជំហររបស់រាជរដ្ឋាភិបាលកម្ពុជា នៅក្នុងការផ្តល់នូវកិច្ចគាំទ្រស​ម្របសម្រួល​ចំពោះដំណើរការអាជីវកម្មរបស់ក្រុមហ៊ុន Vietjet នៅក្នុងប្រទេសកម្ពុជា និងបានលើកទឹកចិត្តឱ្យក្រុមហ៊ុន​ពិនិត្យលទ្ធភាពពង្រីកគោលដៅនៃការហោះហើរត្រង់ពីទីក្រុងដាណាំង មកកាន់រាជធានីភ្នំពេញ ក៏ដូចជាការពិភា​ក្សាអំពីលទ្ធភាពនៃកិច្ចសហការជាមួយបណ្តាក្រសួង-ស្ថាប័នពាក់ព័ន្ធ របស់កម្ពុជា ក្នុងការរៀបចំកញ្ចប់​សេវាកម្មទេសចរណ៍ ដើម្បីជំរុញការធ្វើដំណើររបស់អ្នកទេសចរវៀតណាម តាម Vietjet Air មកកាន់ប្រទេសកម្ពុជាឱ្យបានកាន់តែច្រើន។

តាមរយៈការបើកឱ្យមានជើងហោះហើរត្រង់នេះ រំពឹងថា នឹងផ្តល់អត្ថប្រយោជន៍ជាច្រើន ដោយអាចទាក់ទាញភ្ញៀវ​ទេសចរពីប្រទេសវៀតណាម និងលំហូរនៃធុរជន និងវិនិយោគិន ក៏ដូចជាការសម្រួលដល់មធ្យោយបាយធ្វើដំណើរ និងការដឹកជញ្ជូនជាដើម។

លោក ខៀវ ធី ប្រធានសមាគមមគ្គទេសក៍ទេសចរណ៍អង្គរ បានសម្តែងការសាទរចំពោះដំណើរការហោះហើរត្រង់​ពីរដ្ឋធានីហាណូយប្រទេសវៀតណាម មកកាន់ខេត្តសៀមរាប ប្រទេសកម្ពុជានេះ។ លោក ក៏រំពឹងថា កំណើនភ្ញៀវ​ទេសចរ​វៀតណាម នឹងកើនឡើងថែមទៀត ក្រោយពីប្រទេសទាំងពីរសម្រេចឯកភាពជាផ្លូវការដាក់ឱ្យដំណើរ​ការជើងហោះហើរត្រង់នេះ។

​

យោងតាមរបាយការណ៍របស់ក្រសួងទេសចរណ៍ បានបង្ហាញថា ចាប់ពីខែមករា ដល់ខែ កក្កដា ឆ្នាំ ២០២៣ ភ្ញៀវទេសចរវៀតណាម ចូលមកកម្សាន្តនៅកម្ពុជា មាន​ចំនួន ៥៥១ ១៥៦​ នាក់​ ស្មើ ១៨,១ ​ភាគ​រយ​ មានការកើន​ឡើង ១៩០,៤​ ភាគ​រយ៕