ក្រសួងអប់រំផ្តល់អាហារូបករណ៍ដល់និស្សិត ៦០នាក់ ទៅប្រទេសចិនក្នុងឆ្នាំសិក្សា ២០២៤-២០២៥

ក្រសួងអប់រំ យុវជន និងកីឡា បានប្រកាសជ្រើសរើសនិស្សិត៦០នាក់ ជាបេក្ខភាពទទួលអាហារូបករណ៍របស់រដ្ឋាភិបាលចិន ក្នុងនោះ ថ្នាក់បរិញ្ញាបត្រជាន់ខ្ពស់ចំនួន ៣៥នាក់ និងថ្នាក់បរិញ្ញាបត្រចំនួន ២៥នាក់ សម្រាប់ឆ្នាំសិក្សា២០២៤-២០២៥។

ចំពោះមុខជំនាញសិក្សាមាន វិទ្យាសាស្ត្រ វិស្វកម្ម សេដ្ឋកិច្ច ការគ្រប់គ្រងពាណិជ្ជកម្ម វេជ្ជសាស្ត្រ ព័ត៌មានវិទ្យា ។ល។ សម្រាប់ការធ្វើដំណើរទៅ-មក រវាងកម្ពុជា និងចិន ជាបន្ទុករបស់និស្សិតផ្ទាល់ រីឯការស្នាក់នៅ ការសិក្សា និងប្រាក់អាហារូបករណ៍ ជាបន្ទុករបស់រដ្ឋាភិបាលចិន។

សម្រាប់លក្ខខណ្ឌនៃការចុះឈ្មោះគឺ៖

-ថ្នាក់បរិញ្ញាបត្រជាន់ខ្ពស់ បេក្ខជនទាំង២ភេទត្រូវមានសញ្ជាតិខ្មែរ មានសញ្ញាបត្របរិញ្ញាបត្រ អាយុយ៉ាងច្រើន ៣៥ឆ្នាំ មានចំណេះភាសាអង់គ្លេសជ្រៅជ្រះ និងមានសុខភាពល្អ។

-ថ្នាក់បរិញ្ញាបត្រវិញ បេក្ខជនត្រូវមានសញ្ជាតិខ្មែរ សញ្ញាបត្របាក់ឌុប អាយុក្រោម២៥ឆ្នាំ មានលិខិតបញ្ជាក់ពីកម្រិតចំណេះដឹងភាសាចិន HSK3 និងមានសុខភាពល្អ។

ដើម្បីទទួលបានអាហារូបករណ៍នេះ បេក្ខជនត្រូវទៅសុំពាក្យប្រឡងពីថ្ងៃផ្សាយដំណឹងរហូតដល់ថ្ងៃទី០៨ ខែមករា ឆ្នាំ២០២៤ នៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍។ វិញ្ញាសាប្រឡងមានដូចជា ភាសាអង់គ្លេស វប្បធម៌ទូទៅ សម្រាប់ថ្នាក់បរិញ្ញាបត្រជាន់ខ្ពស់ និង គណិតវិទ្យា វប្បធម៌ទូទៅ សម្រាប់ថ្នាក់បរិញ្ញាបត្រ។

រីឯកាលបរិច្ឆេទប្រឡងវិញ គឺនៅថ្ងៃទី១៤ ខែមករា ឆ្នាំ២០២៤ មណ្ឌលប្រឡងខាងក្រសួងនឹងផ្តល់ជូននៅពេលក្រោយ។ សូមបញ្ជាក់ថា ផ្អែកតាមលទ្ធផលប្រឡង និងបេក្ខជនដែលក្រសួងអប់រំបានជ្រើសរើសរួច ក្រសួងនឹងបញ្ជូនទៅឱ្យស្ថានទូតចិនប្រចាំនៅកម្ពុជា ដើម្បីបន្តនីតិវិធី និងសម្រេចចុងក្រោយ៕