សមណសិស្សជាង ១ ពានអង្គ/នាក់ ​ទទួលវិញ្ញាបនបត្រ​នៅវិទ្យាល័យសិរីសោភ័ណ

បេក្ខជនសមណសិស្សចំនួន ១.៦៥៩ អង្គ/នាក់ បានចូលរួមប្រឡងយកវិញ្ញាបនបត្រ ត្រី ទោ ឯក ឆ្នាំសិក្សា ២០២៣-២០២៤ នៅក្នុងវិទ្យាល័យ សិរីសោភ័ណ ស្ថិតក្នុងភូមិ ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

សមណសិស្សប្រឡងយកថ្នាក់ ត្រី ទោ ឯកនេះ ដោយមានការពិនិត្យបើកវិញ្ញាសារប្រឡង ដោយព្រះគ្រូ ធុល សុធា ព្រះមេគណខេត្តគណៈមហានិកាយ ព្រះគ្រូ វ៉ា ចិន្តា ព្រះមេគណខេត្តគណៈធម្មយុត្តិនិកាយ លោក យឹម សំណាង អភិបាល រង​ខេត្តបន្ទាយមានជ័យ លោក ស្រេង សុផល អភិបាល ក្រុងសិរីសោភ័ណ លោក បៀវ ថាន ប្រធានមន្ទីរធម្មការ និងកិច្ចការ​សាសនាខេត្ត និងសមណសិស្ស ចំនួន ១.៦៥៩អង្គ/នាក់ និងមន្ត្រីកិត្តិយសជាច្រើននាក់។

លោក បៀវ ថាន បានមានប្រសាសន៍ថា ការប្រឡងនេះ ដោយបានទទួលការណែនាំរបស់ក្រសួងធម្មការ និងសាសនា មន្ទីរធម្មការសាសនាខេត្តបន្ទាយមានជ័យ បានសហការជាមួយ សាលាគណខេត្តទាំង២គណៈ មន្រ្តីសង្ឃទាំងពីរគណៈ និងទទួលការណែនាំអនុញ្ញាតពីលោកអភិបាលខេត្តផង ដើម្បីរៀបចំការប្រឡងថ្នាក់ ត្រី ទោ ឯកនេះ។

លោក បៀវ ថាន បានបញ្ជាក់ឲ្យដឹងទៀតថា ការប្រឡងធម្មវិន័យឆ្នាំនេះមានសាមណសិស្ស សិស្សដែលជាបេក្ខជន/នារី ចូលប្រឡងរួមមានចំនួន១.៦៥៩អង្គ/នាក់ និមន្តមកពីតាមបណ្តាវត្តនានា ក្នុងក្រុង ស្រុកទាំង៩ ក្នុងខេត្តបន្ទាយមានជ័យ ក្នុងនោះមានថ្នាក់ត្រីមានចំនួន ៣៦បន្ទប់ មានបេក្ខសមណៈ បេក្ខជនមានចំនួន ៨៩៧ អង្គ/នាក់ ថ្នាក់ទោមាន ១៨ បន្ទប់ មានបេក្ខសមណៈ បេក្ខជនមានចំនួន៤៤៥អង្គ/នាក់ថ្នាក់ឯកមាន១៣បន្ទប់មានបេក្ខសមណៈ បេក្ខជនមានចំនួន៣១៦​អង្គ/នាក់ សរុប មានចំនួន ១.៦៥៩អង្គ/នាក់ហើយវិញ្ញាសារប្រឡងមានចំនួន៤ មុខវិជ្ជា ពេលព្រឹកមាន២វិញ្ញាសាគឺវិញ្ញាសា ប្រជុំកងធម៍ និងពុទ្ធប្បវត្តិពេលរសៀលមាន២វិញ្ញាសាគឺវិញ្ញាសា ព្រះវិន័យ និងវិញ្ញាសាសាសនសុភាសិត។

ក្នុងនោះលោក យឹម សំណាង បានមានប្រសាសន៍ថា ក្នុងដំណាក់កាលទី១និតិកាលទី៧នេះដឹកនាំដោយ សម្តេច មហាបវរធីបតី ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា បានកំណត់ជាអទិភាពគឺពង្រឹងភាពជាប្រជាពលរដ្ឋក្នុងសង្គម ប្រកបដោយសីលធម៌ និងបរិយាបន្នដែលមានគោលដៅលើ ការធ្វើពលរដ្ឋភាវូបនីយកម្មឲ្យមានសមត្ថភាពប្រកបដោយសីលធម៍ គុណធម៍ សុចរិយាធម៍ សុចរិតភាព វិន័យ និងការទទួលខុសត្រូវខ្ពស់។

លោក យឹម សំណាង បានមានប្រសាសន៍បន្តទៀតថា ព្រះពុទ្ធសាសនា ជាស្ថាប័នមួយដ៏សំខាន់ បានចូលរួមយ៉ាងសកម្មក្នុងការអប់រំប្រជាពលរដ្ឋ ជាក់ស្តែង ថ្ងៃមានការប្រឡងយក ថ្នាក់ ត្រី ទោ ឯក បានអនុវត្តតាមសារាចរណែនាំរបស់ក្រសួងធម្មការ និងសាសនាលេខ ២១/២៣ ក.ធ.ម សរណន ស្តីពីការប្រឡងវិញ្ញាបនបត្រធម្មវិន័យ ថ្នាក់ ត្រី ទោ ឯក ជាឆ្នាំលើក ទី៣១ មានបេក្ខសមណៈ បេក្ខជនចូលប្រឡង សរុប មានចំនួន ១.៦៥៩អង្គ/នាក់ រដ្ឋបាលខេត្តសូមធ្វើការកោតសរសើរដល់ព្រះមន្ត្រីសង្ឃ សាលាគណខេត្ត សាលាអនុគណគ្រប់ក្រុង ស្រុក ជាពិសេស មន្ត្រីមន្ទីរធម្មការនិងសាសនាខេត្តទាំងអស់ ដែលបានខិតខំប្រឹងប្រែងចូលរួមបណ្តុះបណ្តាលនូវធនធានមនុស្សស្របតាមយុទ្ធសាស្ត្រ​ចតុកោណនៅគ្រប់ដំណាក់កាល៕

វ៉ាន់ ណាង