លោក សុខ សូសិលា អំពាវនាវភ្ញៀវទេសចរ ចូលរួមលើកតម្កើងការជិះកង់នៅតំបន់រមណីយដ្ឋានអង្គរ ឱ្យបានច្រើន

លោក សុខ សូសិលា អនុប្រធាននាយកដ្ឋានទឹក ព្រៃឈើនិងហេដ្ឋារសម្ព័ន បានអំពាវនាវឱ្យភ្ញៀវទេសចរ ចូលរួមលើកតម្កើងការជិះកង់ឱ្យបានកាន់តែច្រើន នៅក្នុងតំបន់រមណីយដ្ឋានអង្គរ។

អនុប្រធាននាយកដ្ឋានទឹក ព្រៃឈើនិងហេដ្ឋារសម្ព័នរូបនេះ បានឱ្យកម្ពុជាថ្មីដឹងថា អាជ្ញាធរជាតិអប្សរាបានសាងសង់ស្ពានផ្លូវកង់ស្របតាមស្ពានប្រាសាទតាកែវ ដើម្បីសម្រួលដល់ការជិះកង់របស់ភ្ញៀវទេសចរក្នុងរមណីយដ្ឋានអង្គរឱ្យកាន់តែងាយស្រួល។ ផ្លូវកង់ក្នុងតំបន់រមណីយដ្ឋានអង្គរ បានចាប់ផ្តើមសង់នៅឆ្នាំ២០២០ ដើម្បីសម្រួលដល់ភ្ញៀវទេសចរដែលនិយមជិះកង់លេងកម្សាន្ត និងមានប្រវែងសរុបជាង ២៣គីឡូម៉ែត្រ ក្នុងនោះក៏មានឆ្លងស្ទឹងចំនួន ៤ទីតាំងដែរ។

ស្ពានផ្លូវកង់ប្រាសាទតាកែវ គឺជាទីតាំងមួយក្នុងចំណោម ៤ទីតាំងខាងលើ ដែលអាជ្ញាធរជាតិអប្សរា សាងសង់សម្រួលដល់អ្នកជិះកង់ ដោយចង់បែងចែកឱ្យដាច់រវាងផ្លូវ ឬស្ពានធ្វើដំណើរទូទៅ និងផ្លូវកង់។ ស្ពាននេះ មានទទឹង ២.៥ម៉ែត្រ និងបណ្ដោយ ៦៥ម៉ែត្រ។ ចំណែក ស្ពានកង់ ៣ទីតាំងទៀត រួមមាន ស្ពានអង្គរ ស្ពានក្រាំងក្រូច និងស្ពាននាគព័ន្ធ។ ក្រៅពីនេះ  ក៏មានស្ពានខ្នាតតូចឆ្លងកាត់ ២ទីតាំងទៀត ដូចជាកសិន្ធុយសោធរ និងអតីតទ្វារទឹកនាគព័ន្ធ។ គោលបំណងសំខាន់នៃការបង្កើតផ្លូវកង់ក្នុងរមណីយដ្ឋានអង្គរ គឺការចង់បែងចែកឱ្យដាក់ពីគ្នារវាងផ្លូវចរាចរណ៍ធម្មតា និងផ្លូវកង់ ដើម្បីលើកកម្ពស់កីឡាជិះកង់ កាត់បន្ថយគ្រោះថ្នាក់នៅលើដងផ្លូវរវាងអ្នកជិះយានយន្ត និងអ្នកជិះកង់ ពិសេស កាត់បន្ថយផ្សែងយានយន្ត ដែលប៉ះពាល់ដល់ថ្មប្រាសាទ។

ចំពោះរចនាបថនៃការសង់ស្ពានកង់នេះ លោក សុខ សូសិលា បញ្ជាក់ថា បានជ្រើសរើសការរៀបចំបែបសាមញ្ញស្រដៀងនឹងធម្មជាតិជុំវិញ ដោយមិនបង្កើតអ្វីដែលថ្មីលេចធ្លោពេកទេ គឺស្របតាមគោលគំនិតរបស់ថ្នាក់ដឹកនាំថា ការអភិរក្សដើរស្របនឹងការអភិវឌ្ឍ។ បន្ថែមពីនេះ លោកក៏បានសំណូមពរឱ្យភ្ញៀវទេសចរ ចូលរួមលើកតម្កើងការជិះកង់ ឱ្យបានកាន់តែច្រើននៅក្នុងតំបន់រមណីយដ្ឋានអង្គរ ក្នុងបំណង ដើម្បីសុខភាព ប្ដូរបរិយាកាសថ្មី។ លោកថា៖ «ការជិះកង់ធ្វើឱ្យយើងមានពេលគ្រប់គ្រាន់សម្រាប់ការទស្សនាប្រាំងប្រាសាទ ឬសិក្សាពីធម្មជាតិនៅជុំវិញ ជាពិសេស បានលុបបំបាត់នៅផ្សែងពុលដែលបង្កគ្រោះថ្នាក់ដល់ការអភិរក្សប្រាសាទផងដែរ»៕

អត្ថបទ៖ គឿន វេត