លម្អិត សម្ដេចធិបតី បញ្ជាបិទក្លិបបាញ់កាំភ្លើងនៅខេត្តព្រះសីហនុ ហាមបើកថ្មីទូទាំងប្រទេស

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ប្រកាសបិទទីលានជួលបាញ់កាំភ្លើងឯកជននៅទូទាំងខេត្តព្រះសីហនុ និងហាមបើកក្លិបបាញ់កាំភ្លើងឯកជនថ្មីទូទាំងប្រទេស និងត្រូវត្រួតពិនិត្យឱ្យហ្មត់ចត់ចំពោះក្លិបដែលមានស្រាប់។

ការប្រកាសនេះ ធ្វើឡើងក្នុងឱកាស សម្តេចមហាបវរធិបតី អញ្ជើញប្រកាសដាក់ឱ្យអនុវត្តជាផ្លូវការ “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” នៅព្រឹក​ថ្ងៃពុធ ទី៣១ ខែមករា​ ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ដើម្បីធានាចីរភាព និងការបន្តរីកលូតលាត់នៅក្នុងខេត្តព្រះសីហនុ ដើម្បីសេដ្ឋកិច្ចសក្ដានុពល និងជីវភាពរស់នៅប្រជាពលរដ្ឋបានកើនឡើងខ្ពស់ ទៅតាមលក្ខណៈលទ្ធភាពដែលអាចធ្វើទៅបាន ក៏ដូចជាការអនុវត្តកម្មវិធីគោលនយោបាយបានលទ្ធផល កត្តាមួយត្រូវគិតគូរ គឺសន្តិសុខ ដ្បិតបើគ្មានសន្តិសុខ អ្វីៗទាំងនោះទៅមិនរួច ឬទៅបាន តែទៅមិនឆ្ងាយទេ។ សម្ដេចបញ្ជាក់បន្ថែមថា ទន្ទឹមនេះ ក៏មានព័ត៌មាន បង្ហាញពីភាពអសន្តិសុខនៅកម្ពុជា ខណៈប្រទេសមហាអំណាចខ្លះ មានករណីលួចប្លង់ច្រើនជាងភ្នំពេញ។ ជាមួយគ្នានេះ សម្ដេចបានជំរុញឱ្យសមត្ថកិច្ចអាជ្ញាធររួមគ្នាពង្រឹងរក្សាសន្តិសុខ និងបិទសេវាកម្មក្លិបបាញ់កាំភ្លើង ខណៈនៅខេត្តព្រះសីហនុ មានក្លិបបាញ់កាំភ្លើងឯកជន ២កន្លែង។

សម្ដេចធិបតី ហ៊ុន ម៉ាណែត មានប្រសាសន៍ថា៖ “ឥឡូវខ្ញុំថា ទេសចរណ៍មកខេត្តព្រះសីហនុ មិនបាច់មករៀនបាញ់កាំភ្លើងទេ ដើរមើលកោះល្អជាង អ៊ីចឹងសុំឱ្យបិទ [ក្លិបបាញ់កាំភ្លើង] តែម្ដង ហើយមិនឱ្យបើកថ្មីទេ! រឿងបាញ់កាំភ្លើងក្លិបឯកជន មិនបាច់ទេ។ ក្លិបឯកជន បើបើក ត្រូវមានសិទ្ធិទិញកាំភ្លើង ទិញគ្រាប់ ហើយយកទៅណា មកពីណា? មិនបាច់តែហ្មងទៅ មកខេត្តព្រះសីហនុដើរលេងកោះទៅ កុំបាញ់កាំភ្លើង! ទប់កន្លែងហ្នឹងតែម្ដង”។

សម្ដេចនាយករដ្ឋមន្ត្រី មានប្រសាសន៍ថា ទីតាំងកងទ័ពដែលមានទីលានបាញ់ មិនបាច់ឱ្យបើកអាជីវកម្ម ឱ្យឯកជនទៅបាញ់ទេ ខណៈមាន ក្លិបមួយនៅរាម គឺទុកប្រើសម្រាប់កងទ័ព ប៉ូលិស អាវុធហត្ថហ្វឹកហ្វឺន មិនបាច់ធ្វើអាជីវកម្មឯកជនទេ។

សម្ដេចធិបតី ហ៊ុន ម៉ាណែត បានឱ្យដឹងបន្តថា៖ “ហើយល្ងាចមិញ ខ្ញុំបានឱ្យព្រាងសារាចរទូទាំងប្រទេសមួយ គឺឈប់ឱ្យចេញលិខិតអនុញ្ញាតបើកន្លែងបាញ់ស៊ីបថ្មីថែមទៀត ព្រោះអត់ចាំបាច់ទេ។ អ្វីដែលមានស្រាប់ ត្រូ​វធ្វើបច្ចុប្បន្នភាព និងត្រួតពិនិត្យ តើមានលក្ខណៈត្រូវបច្ចេកទេសអត់? កន្លែងខ្លះ សុំអាជ្ញាបណ្ណហើយ អត់ធ្វើអី យកធ្វើអី សុំរាប់ឆ្នាំហើយ បិទចោលតែម្ដង! ហើយកន្លែងណាដែលប្រតិបត្តិពុំមានអាជ្ញាបណ្ណពីមុននៅកន្លែងកងទ័ព ដូច ៩១១ ត្រូវពិនិត្យ គ្រប់គ្រងឱ្យច្បាស់ កុំឱ្យមានបញ្ហា។ តែខេត្តព្រះសីហនុ កុំឱ្យមានតែម្ដង បិទចោលតែម្ដង អ្វីដែលមានហើយ កុំឱ្យបើកថ្មី”។

គួរបញ្ជាក់ថា “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” គឺជាគំនិតផ្តួចផ្តើមរបស់ សមេ្តច​ធិបតី នាយករដ្ឋមន្ត្រី ដើម្បីជំរុញសកម្មភាពធុរកិច្ច និងការវិនិយោគ សំដៅប្រែក្លាយខេត្តព្រះសីហនុ ឱ្យទៅជា​ខេត្ត​ដឹកមុខក្នុងការលើកស្ទួយកំណើនសេដ្ឋកិច្ចកម្ពុជា ក្នុងបរិការណ៍ស្ថានភាពសេដ្ឋកិច្ច​ពិភព​លោក និង​តំបន់​កំពុងតែបន្តប្រឈមនឹងភាពមិនប្រាកដប្រជាខ្ពស់។

“កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” ត្រូវបានរៀបចំឡើងដោយឈរលើ​ទស្សន​​ទានគោលចំនួន៤រួមមាន៖
ទី១. កែប្រែមុខមាត់ខេត្តព្រះសីហនុ ឱ្យទៅជាខេត្តដែលមានមូល​ដ្ឋាន​សេដ្ឋកិច្ច ពឹងផ្អែកលើឧស្សាហកម្ម, ទេសចរណ៍ និងការវិនិយោគ
ទី២. ដោះស្រាយបញ្ហាប្រឈមជាក់ស្តែង ដែលផ្តល់លទ្ធផលរហ័ស
ទី៣. ដាក់ចេញនូវវិធានការអនុវត្តជាក់ស្តែង ដែលមានលក្ខណៈជាការបំពេញបន្ថែម​ប្រកប​ដោយសង្គតិភាព ទៅនឹងគោលនយោបាយ និង យុទ្ធសាស្ត្រនានា របស់រាជរដ្ឋាភិបាល
ទី៤. បង្កើនល្បឿននៃការធ្វើបរិវត្តកម្ម និង ការអភិវឌ្ឍឧស្សាហកម្ម ក្នុងខេត្តព្រះសីហនុ ឱ្យមានតម្លៃបន្ថែម និង មានឧត្តមភាពប្រកួតប្រជែងខ្ពស់៕