ព័ត៌មានជាតិ

លោក ឃួង ស្រេង ៖ ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ត្រូវពង្រឹងសន្តិសុខ សណ្តាប់ធ្នាប់ ឱ្យបានតឹងរុឹង

បានផុស

២ years មុន

នៅ

ថ្ងៃសៅរ៍ ២៤ កុម្ភៈ ២០២៤

ដោយ

ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នឹងឈានមកដល់ហើយនៅថ្ងៃស្អែកនេះ ដើម្បីរក្សាបានសន្តិសុខ សណ្តាប់ធ្នាប់ល្អ នារសៀលថ្ងៃទី២៤កុម្ភៈនេះ ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ,អាជ្ញាធរដែនដី រួមជាមួយមន្ត្រីរៀបចំការបោះឆ្នោតរាជធានីភ្នំពេញ បានអញ្ជើញទៅពិនិត្យមើលដំណើរការរៀបចំការិយាល័យបោះឆ្នោតនៅ វិទ្យាល័យព្រះស៊ីសុវត្ថិ ស្ថិតក្នុងខណ្ឌដូនពេញចំនួន២ការិយាល័យ(ភូមិភាគ១)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឃួង ស្រេង បានណែនាំឲ្យមន្ត្រីពាក់ព័ន្ធក៏ដូចអាជ្ញាធរដែនដី ត្រូវបន្តពង្រឹងសន្តិសុខសណ្តាប់ របៀបរៀបរយសាធារណៈឲ្យបានកាន់តែល្អប្រសើរថែមទៀត ខណៈការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥នឹងដំណើរការនៅថ្ងៃអាទិត្យទី២៥កុម្ភៈស្អែកនេះហើយ។ យើងត្រូវសម្រេចឲ្យបាននូវ ការបោះឆ្នោតមួយដែលសេរីត្រឹមត្រូវយុត្តិធម៌ គ្មានការបំភិតបំភ័យឬគំរាមកំហែងក្នុងបរិបទប្រជាធិបតេយ្យសេរីពហុបក្ស។ តាមការសង្កេតជាទូទៅក្នុងដំណាក់កាលនៃយុទ្ធនាការឃោសនារកសំឡេងឆ្នោតរបស់គណបក្សនយោបាយក្នុងរយៈពេល១៤ថ្ងៃកន្លងទៅ គឺមានបរិយាកាសល្អពុំមានអំពើហិង្សា គំរាមកំហែង បំភិតបំភ័យកើតឡើងគួរឱ្យកត់សំគាល់នោះទេ។

ក្រៅពីការពង្រឹងសន្តិសុខ សណ្តាប់ធ្នាប់ក្នុងរាជធានីភ្នំពេញ លោកឃួង ស្រេង ក៏បានណែនាំឱ្យបាញ់ទឹកលាងសំអាតបរិវេណជុំវិញការិយាល័យបោះឆ្នោតឱ្យបានស្អាតនឹងដាក់កម្លាំង យាមកាមឱ្យបានត្រឹមត្រូវ។

សូមបញ្ជាក់ថា អង្គបោះឆ្នោតដែលជាសមាជិកក្រុម ប្រឹក្សាសង្កាត់ក្នុងតំណែងដែលត្រូវបោះឆ្នោតសម្រាប់រាជធានីភ្នំពេញមានចំនួន ៩១១នាក់ ក្នុងនោះក៏មានអ្នកតំណាងរាស្ត្រចំនួន១២រូបផងដែរ៕

ដោយ ៖ ស្រីរ័ត្ន