ព័ត៌មានជាតិ

អភិបាលរងខេត្តកោះកុង ជំរុញឱ្យមានការផ្សព្វផ្សាយគាំទ្រទិន្នផលនេសាទរបស់ប្រជាសហគមន៍

បានផុស

២ years មុន

នៅ

ថ្ងៃពុធ ២៨ កុម្ភៈ ២០២៤

ដោយ

កោះកុង ៖ លោកស្រីអភិបាលរងខេត្តកោះកុង បានជំរុញឱ្យអ្នកពាក់ព័ន្ធទាំងអស់ជួយផ្សព្វផ្សាយគាំទ្រពីទិន្នផលនេសាទរបស់ប្រជានេសាទក្នុងសហគមន៍ពាមក្រសោប ស្រុកមណ្ឌលសីមា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាប់កម្ពុជាថ្មី កាលពីរសៀលថ្ងៃទី២៨ ខែកុម្ភៈ ឆ្នាំ២០២៤នេះ ក្រោយពិនិត្យទីតាំងចិញ្ចឹមធនធានជលផលរបស់ប្រជាសហគមន៍ លោកស្រី អ៊ី នារីនេត អភិបាលរងខេត្ត លើកឡើងថា ទិន្នផលសមុទ្រ រួមមាន ខ្យងចំពុះទា ខ្យងតាដិត ត្រីតុកកែ ត្រីស្ពុង និងគ្រែងឈាម ស្ថិតនៅឃុំពាមក្រសោប ស្រុកមណ្ឌលសីមា គឺសុទ្ធតែចិញ្ចឹមបែបលក្ខណធម្មជាតិពិតៗ។

ដូច្នេះលោកស្រីអភិបាលរងខេត្ត លើកទឹកចិត្តដល់អ្នកពាក់ព័ន្ធទាំងអស់ជួយផ្សព្វផ្សាយគាំទ្រពីទិន្នផលដែលកំពុងមានតាមបណ្តាញសង្គម ព្រមទាំងនៅតាមភោជនីយដ្ឋាន និងអាហារដ្ឋានផងដែរ ដើម្បីជួយទិញទិន្នផលប្រជានេសាទកាន់តែច្រើន ក្នុងន័យផ្តល់ប្រាក់ចំណូលជូនពួកគាត់។

កន្លងទៅ លោក សៀក សាប៊ុន និងអ្នកស្រី គា ស្រី តំណាងប្រជាសហគមន៍ពាមក្រសោប បានឱ្យដឹងថា ឆ្នាំនេះ ខ្យងចំពុះទារបស់ពួកគាត់លក់មិនដាច់ដូចឆ្នាំមុនៗទេ ព្រោះឈ្នួញថៃ មិនបានមកទិញ ខណៈនៅប្រទេសថៃមានខ្យងនេះដែរ។ ការគ្មានឈ្នួញមកទិញបានធ្វើឱ្យពួកគាត់ខាតបង់ទុនពីការចិញ្ចឹមខ្យងយ៉ាងខ្លាំង ខណៈសព្វថ្ងៃប្រមូលលក់ក្នុងតម្លៃ១គីឡូក្រាម៥០០រៀលប៉ុណ្ណោះ ធៀបនឹងឆ្នាំទៅបាន១គីឡូក្រាមថ្លៃ១៥០០រៀលឡើងទៅ។

តំណាងប្រជាសហគមន៍ ក៏អំពាវនាវដល់ក្រសួងស្ថាប័ន និងអាជ្ញាធរពាក់ព័ន្ធជួយរកទីផ្សារលក់ខ្យងចំពុះទារបស់ពួកគាត់ បើពុំដូច្នេះទេ ពួកគាត់ច្បាស់ជាក្ស័យធនលើកមានកម្លាំងចិត្តបន្តចិញ្ចឹមទៀតហើយ៕

អត្ថបទ ៖ សិរីវឌ្ឍនៈ