ព័ត៌មានអន្ដរជាតិ

ថៃ ដាក់ទិសដៅអភិវឌ្ឍព្រលានយន្តហោះចំនួន ២ ទៅជាលំដាប់កំពូលលើលោក

បានផុស

២ years មុន

នៅ

ថ្ងៃសៅរ៍ ២ មីនា ២០២៤

ដោយ

នាយករដ្ឋមន្រ្តីថៃលោក សេដ្ឋា ថាវីស៊ីន បានប្រកាសកាលពីថ្ងៃសុក្រ ទី១ ខែមីនាថា ព្រលានយន្តហោះសុវណ្ណភូមិ នឹងក្លាយជាមជ្ឈមណ្ឌលអាកាសចរអាស៊ីលំដាប់កំពូលទី ៥០ លើពិភពលោកក្នុងរយៈពេល ១ ឆ្នាំ និងឈានទៅដល់លំដាប់កំពូលទី ២០ ក្នុងរយៈពេល ៥ ឆ្នាំខាងមុខ ។ នេះបើតាមការចុះផ្សាយរបស់សារព័ត៌មាន Khaosod ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានដដែលបានឲ្យដឹងថា លោកនាយករដ្ឋមន្រ្តីថៃ បានប្រកាសដូចខាងលើនេះនៅឯវិមានរាជរដ្ឋាភិបាល ដែលទិសដៅនេះជាផ្នែកមួយនៃចក្ខុវិស័យរបស់រដ្ឋាភិបាលរបស់លោក ក្រោមប្រធានបទ “ពន្លឺប្រទេសថៃ” ដែលនឹងត្រូវចូលរួមអនុវត្តយ៉ាងសកម្មពីសំណាក់ភាគីពាក់ព័ន្ធរវាងផ្នែកឯកជន និងមន្រ្តីក្រោមឱវាទរបស់លោកនាយករដ្ឋមន្រ្តីទី៣០ របស់ថៃរូបនេះ។

ផែនការវិវឌ្ឍព្រលានយន្តហោះសុវណ្ណភូមិនោះ រួមមានការបញ្ចូលបន្ថែមសេវាប្រកបដោយគុណភាព ការសាងសង់អគារទំនើបសម្រាប់សម្រួលដល់អ្នកដំណើរ ផ្តល់នូវផលិតផលសំបូរបែបនៅឯព្រលាន ក៏ដូចជាសម្រួលដល់អ្នកដំណើរមិនឲ្យរង់ចាំយូរជាដើម ដែលទាំងអស់នេះរដ្ឋាភិបាលលោក សេដ្ឋា ថាវីស៊ីន កំពុងធ្វើ ប៉ុន្តែត្រូវការពេលប្រមាណ ៦ ខែទៀតដើម្បីបញ្ចប់ ។

ទន្ទឹមនឹងនេះ លោក សេដ្ឋា ក៏បានបន្ថែមទៀតថា សម្រាប់ព្រលានយន្តហោះដនមឿង នៅបាងកក ក៏នឹងត្រូវអភិវឌ្ឍបន្ថែមជាមួយគ្នាផងដែរ ដោយសង់សាលអគារបន្ថែម ការពង្រីកចំណតរថយន្តដែលអាចផ្ទុកបានប្រមាណជាង ៧ ពាន់គ្រឿង ក៏ដូចបរិក្ខារផ្សេងៗទៀតដែលអាចសម្រួលដល់ភ្ញៀវទេសចរដែលនឹងកើនឡើងពី ៣០ ទៅ ៥០ លាននាក់ជាប្រចាំឆ្នាំ។

ជាចុងក្រោយលោកនាយករដ្ឋមន្ត្រីលើកឡើងថា “អំឡុងពេល ខ្ញុំទស្សនកិច្ចនៅអឺរ៉ុបនាសប្តាហ៍ក្រោយ ខ្ញុំនឹងប្រាប់ដល់សាធារណជនពីចក្ខុវិស័យរបស់ប្រទេសថៃ។ វាជាគ្រឿងបន្ថែម ដែលត្រូវផ្សព្វផ្សាយពីអ្វីដែលយើងនឹងមាននៅឆ្នាំក្រោយ ហើយជាអ្វីដែលខ្ញុំច្បាស់ជឿជាក់ថា អ្នកទេសចរនឹងចូលចិត្ត ហើយនឹងនាំកំណើនភ្ញៀវទេសចរបន្ថែមធ្វើដំណើរមកលេងថៃ” ៕