កីឡា

ម្ចាស់មេដាយមាសចម្ងាយ១០គីឡូម៉ែត្រ យ៉ាន់ សុជី មានសារដ៏សំខាន់ទិវា៨មីនា

បានផុស

២ years មុន

នៅ

ថ្ងៃសុក្រ ៨ មីនា ២០២៤

ដោយ

កីឡាការិនីរត់ចម្ងាយ យ៉ាន់ សុជី ទទួលបានចំណាត់ថ្នាក់លេខ១លើវិញ្ញាសារត់ចម្ងាយ១០គីឡូម៉ែត្រក្នុងព្រឹត្តិការណ៍រត់ប្រណាំដើម្បីស្ត្រី នាព្រឹកថ្ងៃទី៨ ខែមីនា ឆ្នាំ២០២៤ នៅឧទ្យានមុខវត្តបទុមវតីក្នុងរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចលទ្ធផលដ៏អស្ចារ្យនេះមិនមែនជារឿងចៃដន្យនោះទេ ប៉ុន្តែកើតចេញពីក្តីស្រឡាញ់ ការព្យាយាម និងកំណត់គោលដៅរបស់សុភាពនារីដ៏ស្រស់ស្អាតក្នុងនាមជាពលរដ្ឋម្នាក់ដែលចូលរួមលេងកីឡា១ប្រភេទស្របតាមគោលនយោបាយរបស់រាជរដ្ឋាភិបាលកម្ពុជា។

យ៉ាន់ សុជី បានរៀបរាប់ថា ៖«ខ្ញុំសប្បាយចិត្តដែលខ្លួនឯងធ្វើបាន ពីព្រោះមិនមែនជារឿងងាយស្រួលទេសម្រាប់ការរត់ចម្ងាយ។ ជាពិសេសការរត់ថ្ងៃនេះត្រូវឆ្លងស្ពានទៀតគឺជារឿងពិបាក ប៉ុន្តែខ្ញុំសប្បាយចិត្តនៅពេលធ្វើបានសម្រេច។ ខ្ញុំបានចូលរួមសកម្មភាពកីឡាក្នុងនាមជាយុវជនម្នាក់ដែលលេងកីឡា១ប្រភេទ ស្របតាមគោលនយោបាយរបស់រាជរដ្ឋាភិបាល»។

ម្ចាស់មេដាយមាសវិញ្ញាសាចម្ងាយ១០គីឡូម៉ែត្រផ្នែកនារីនេះតែងតែហ្វឹកហាត់ជារៀងរាល់ថ្ងៃជាច្រើនឆ្នាំមកហើយ។ យ៉ាងហោចណាស់នាងហ្វឹកហាត់១ម៉ោងក្នុងមួយថ្ងៃ ប៉ុន្តែប្រសិនបើថ្ងៃខ្លះមានពេលវេលាច្រើនហ្វឹកហាត់ចាប់ពី១ម៉ោងកន្លះទៅ២ម៉ោង។

យ៉ាន់ សុជី បានរៀបរាប់ដ៏មានន័យថា ៖«ដើមឡើយ ខ្ញុំហាត់រត់ដើម្បីសុខភាព តែឥឡូវបានយកកីឡារត់ប្រណាំងជាផ្នែកមួយនៃជីវិត។ កន្លងមកខ្ញុំធ្លាប់បានចូលរួមរត់ច្រើនកម្មវិធីដែរ ដូចជា ពាក់កណ្តាលម៉ារ៉ាតុងភ្នំពេញ រត់ប្រណាំងនៅភ្នំបូគោ ម៉ារ៉ាតុងសៀមរាប និងកំពង់សោមជាដើម។ នេះជាលើកទី១ដែលខ្ញុំទទួលបានមេដាយមាស ចំណាត់ថ្នាក់លេខ១។ កន្លងមកខ្ញុំធ្លាប់បានចំណាត់ថ្នាក់លេខ២ លេខ៣ ឬក្នុងចំណោម Top 10»។

«ការរត់មិនមែនត្រឹមជាការរត់ទេ។ ការរត់គឺជាអ្វីដែលយើងកំណត់គោលដៅដើម្បីសម្រេចគោលដៅរបស់យើង។ ការរត់ពិតជាលំបាក តែនៅពេលខ្ញុំកំណត់គោលដៅហើយខ្ញុំធ្វើវាបានគឺជារឿងអស្ចារ្យបំផុតសម្រាប់ខ្ញុំ»។ យ៉ាន់ សុជី សង្កត់ធ្ងន់។

កីឡាការិនីវ័យ៣០ឆ្នាំដែលមើលទៅក្មេងជាងវ័យបានផ្តល់សារចុងក្រោយថា ៖«ថ្ងៃ៨មីនានេះ ខ្ញុំមានសារជូនបងប្អូនស្ត្រីថា ប្រសិនបើបងប្អូនយល់ថា ខ្លួនធ្វើបាន បងប្អូននឹងធ្វើបាន។ ជឿជាក់លើខ្លួនឯង ហើយធ្វើវា ទោះបីជាកីឡាអ្វីក៏ដោយឲ្យតែស្រឡាញ់»។

សូមបញ្ជាក់ថា ព្រឹត្តិការណ៍រត់ប្រណាំងដើម្បីស្ត្រីថ្ងៃ៨មីនាមាន៤វិញ្ញាសាគឺចម្ងាយ១០គីឡូម៉ែត្រ (បុរស-នារី) និងចម្ងាយ៤គីឡូម៉ែត្រ (បុរស-នារៅ) បានប្រារព្ធនៅឧទ្យានមុខវត្តបទុមវតីដែលមានការចូលរួមយ៉ាងច្រើនកុះករទាំងស្ត្រី បុរស និងកុមារ។ តាមការឲ្យដឹងពីគណៈកម្មការរៀបចំថា អ្នកចូលរួមឆ្នាំ២០២៤នេះប្រមាណ២៥០០នាក់ដែលច្រើនជាងឆ្នាំមុនៗ៕

អត្ថបទ៖ វីរបុត្រ

Related Topics:កីឡារត់ម៉ារ៉ាតុង រត់ប្រណាំង

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា