កីឡា

តូក្យូម៉ារ៉ាតុង ជាព្រឹត្តិការណ៍រត់ធំបំផុតមានប្រាក់រង្វាន់ និងអ្នកចូលរួមច្រើន

បានផុស

៤ ខែ មុន

នៅ

ថ្ងៃអង្គារ ២៤ មីនា ២០២៦

ដោយ

តូត្យូម៉ារ៉ាតុង គឺជាព្រឹត្តិការណ៍រត់ម៉ារ៉ាតុងលំដាប់ពិភពលោកធំបំផុតមួយដែលមានទាំងអ្នកចូលរួមច្រើន ការបង់តម្លៃចូលរួមប្រកួតក៏ខ្ពស់ ប៉ុន្តែប្រាក់រង្វាន់ក៏ច្រើន។ តូក្យូម៉ារ៉ាតុងដែលជាផ្នែកមួយនៃព្រឹត្តិការណ៍ម៉ារ៉ាតុង Abbott World Marathon Majors ត្រូវបានបង្កើតឡើងជាលើកដំបូង នៅឆ្នាំ ២០០៧ នៅប្រទេសជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តូត្យូម៉ារ៉ាតុង មាន ៤ វិញ្ញាសាសំខាន់គឺ វិញ្ញាសាចម្ងាយ ៤១ គីឡូម៉ែត្រ ចម្ងាយ ១០ គីឡូម៉ែត្រ ចម្ងាយ ៥ គីឡូម៉ែត្រ និងចម្ងាយ ២ គីឡូម៉ែត្រ។ វិញ្ញាសាចម្ងាយ ៤២ គីឡូម៉ែត្រគឺសំខាន់ជាងគេបំផុតដែលសុទ្ធតែអ្នករត់អាជីពមកពីជុំវិញពិភពលោកចូលរួមប្រកួត។

ព្រឹត្តិការណ៍តូក្យូម៉ារ៉ាតុង លើកទី ១៩ ត្រូវបានរៀបចំកាលពីថ្ងៃទី ១ ខែមីនា ឆ្នាំ ២០២៦ នៅទីក្រុងតូក្យូ ប្រទេសជប៉ុន។ អ្នករត់កម្រិតអាជីពមកពីទូទាំងពិភពលោកចំនួន ៣៨,៥០០ នាក់បានចូលរួមរត់លើវិញ្ញាសាចម្ងាយ ៤២ គីឡូម៉ែត្រ។

តម្លៃចុះឈ្មោះចូលរួមប្រកួតសម្រាប់តែវិញ្ញាសា ៤២ គីឡូម៉ែត្រទាំងបុរស និងនារី គឺតម្លៃ ១៨៥ ដុល្លារអាមេរិកសម្រាប់ជនជាតិជប៉ុន និងសម្រាប់ជនបរទេស តម្លៃ ២៣០ ដុល្លារអាមេរិក។ បើទោះបីជាចំណាយលើការចុះឈ្មោះច្រើន ប៉ុន្តែមានប្រាក់រង្វាន់ និងប្រាក់ឧបត្ថម្ភលើកទឹកចិត្តច្រើនដោយពីចំណាត់ថ្នាក់លេខ ១ ដល់លេខ ១០ ទទួលបានប្រាក់រង្វាន់ ៨ ម៉ឺនដុល្លារអាមេរិក ដល់ ៥០០ ដុល្លារអាមេរិក។

ក្រៅពីប្រាក់រង្វាន់ ជ័យលាភីក៏ទទួលបានប្រាក់លើកទឹកចិត្តផ្សេងទៀតដូចជា ប្រាក់លើកទឹកចិត្តសម្រាប់ការបំបែកកំណត់ថិរវេលាពិភពលោកចំនួន ២០ ម៉ឺនដុល្លារ ប្រាក់លើកទឹកចិត្តសម្រាប់ការបំបែកកំណត់ត្រាថិរវេលាប្រចាំព្រឹត្តិការណ៍ចំនួន ២ ម៉ឺនដុល្លារ និងការបំបែកកំណត់ត្រាថិរវេលាជាតិជប៉ុនចំនួន ៣,៣០០ដុល្លារ។

ជាក់ស្តែងជ័យលាភីផ្នែកនារីចម្ងាយ ៤២ គីឡូម៉ែត្រ កាលពីថ្ងៃទី១ ខែមីនា ឆ្នាំ ២០២៦ កីឡាការិនីកេនយ៉ា Brigid Kosgei ដែលបានឈ្នះមេដាយមាស ទទួលបានប្រាក់រង្វាន់ ៨ ម៉ឺនដុល្លារ និងប្រាក់លើកទឹកចិត្តចំនួន ២ ម៉ឺនដុល្លារទៀតសម្រាប់ការបំបែកកំណត់ត្រាថិរវេលាប្រចាំព្រឹត្តិការណ៍ ដូច្នេះនាងត្រឡប់ទៅផ្ទះវិញជាមួយប្រាក់រង្វាន់ សរុប ១០ ម៉ឺនដុល្លារអាមេរិក។ ចំណែកផ្នែកបុរសចម្ងាយ ៤២ គីឡូម៉ែត្រ បានកីឡាករអេស្តូពី Tadese Takele មេដាយមាស ទទួលបានប្រាក់រង្វាន់ ៨ ម៉ឺនដុល្លារអាមេរិក៕