ព័ត៌មានអន្ដរជាតិ
អាមេរិក ដាក់ផែនការផ្ដល់ជំនួយមនុស្សធម៌មួយច្រកទៀតឲ្យពលរដ្ឋនៅ ហ្គាហ្សា បន្ថែមលើការទម្លាក់ពីអាកាស
សហរដ្ឋអាមេរិកបានប្រកាសដាក់ចេញផែនការផ្ដល់ជំនួយមនុស្សធម៌មួយច្រកទៀតទៅឲ្យពលរដ្ឋរស់នៅតំបន់ហ្គាហ្សាក្នុងគោលបំណងបន្ថែមលើការទម្លាក់ជំនួយពីអាកាសចូលទៅក្នុងតំបន់ដែលកំពុងត្រូវបានឡោមព័ទ្ធដោយចង្កូមខ្លាអ៊ីស្រាអែល ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី៨ ខែមីនាកន្លងទៅ ។
មន្ត្រីរដ្ឋបាលអាមេរិកមួយរូបបានលួចប្រាប់អ្នកសារព័ត៌មានកាលពីថ្ងៃសុក្រថា លោកប្រធានាធិបតី ចូ បៃដិន បានចេញបញ្ជាឲ្យយោធាអាមេរិកសាងសង់កំពង់ផែបណ្ដោះអាសន្នលើឆ្នេរសមុទ្រមេឌីទែរ៉ាណេរបស់តំបន់ហ្គាហ្សា ជាមួយនឹងសមត្ថភាពផ្ទុករថយន្តដឹកជំនិញរាប់រយគ្រឿងក្នុងមួយថ្ងៃៗ ដើម្បីយកផ្លូវទឹកមួយនេះធ្វើជាច្រកផ្ដល់ជំនួយមនុស្សធម៌បន្ថែមទៀតចូលទៅកាន់តំបន់ហ្គាហ្សា ។
សេចក្ដីសម្រេចចិត្តរបស់លោក បៃដិន ក្នុងការចេញបញ្ជាឲ្យសាងសង់កំពង់ផែបណ្តោះអាសន្ននេះ កើតមានឡើង ចំពេលមានការព្រមានពីអង្គការសហប្រជាជាតិ (UN) អំពីការរីករាលដាលនៃគ្រោះទុរ្ភិក្សក្នុងចំណោមប្រជាជនប៉ាឡេស្ទីន ២.៣ លាននាក់ ក្រោយការបាញ់បោះដាក់គ្នារវាងអ៊ីស្រាអែល និងក្រុមប្រដាប់អាវុធហាម៉ាសអូសបន្លាយរយៈពេល ៥ ខែមកនេះ ។
ពាក់ព័ន្ធនឹងផែនការនេះទៀតសោត សហរដ្ឋអាមេរិកនឹងសម្របសម្រួលជាមួយអ៊ីស្រាអែល ក៏ដូចជាធ្វើការរួមគ្នាជាមួយអង្គការសហប្រជាជាតិ (UN) និងអង្គការមនុស្សធម៌ ដើម្បីធានាសុខសុវត្ថិភាពចំពោះប្រតិបត្តិការលើដីគោក ហើយអាមេរិកក៏នឹងធានាផងដែរថា បុគ្គលិកយោធារបស់ខ្លួនទាំងអស់នឹងមិនឡើងលើច្រាំងដើម្បីពង្រីកសមត្ថភាពកំពង់ផែណាមួយបន្ថែមនោះទេ ។
នេះជាផែនការថ្មីមួយទៀតសម្រាប់រដ្ឋបាលរបស់លោក បៃដិន ក្នុងការផ្ដល់ជំនួយមនុស្សធម៌ទៅឲ្យប្រជាពលរដ្ឋដែលកំពុងរស់នៅរងទុក្ខវេទនាក្នុងតំបន់ហ្គាហ្សា ពោលបន្ថែមលើការទម្លាក់ស្បៀងអាហារពីអាកាសចូលទៅតំបន់ដែលស្ថិតក្រោមការឡោមព័ទ្ធពីកម្លាំងទ័ពអ៊ីស្រាអែល ប៉ុន្តែទោះជាយ៉ាងណា ផែនការនេះក៏ត្រូវចាយពេលរាប់សប្ដាហ៍ផងដែរ ។
គួរបញ្ជាក់ថា រដ្ឋាភិបាលទីក្រុងវ៉ាស៊ីនតោនបានចេញបញ្ជាឲ្យចាប់ផ្តើមទម្លាក់ស្បៀងអាហារតាមអាកាសចូលទៅក្នុងតំបន់ហ្គាហ្សាកាលពីដើមខែនេះ ខណៈកងទ័ពអាកាសអាមេរិក និងយោធាហ្សកដានី បានសហការរួមដៃគ្នាទម្លាក់អាហារជាង ៣៨,០០០ កញ្ចប់ចូលទៅកាន់ភាគខាងជើងតំបន់ហ្គាហ្សារួចទៅហើយកាលពីថ្ងៃទី៧ ខែមីនាកន្លងទៅ ៕
ដោយ ៖ សុខ ជីវ័ន្ត
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២៣ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង