ព័ត៌មានជាតិ

អភិបាលរងខេត្តព្រះវិហារ ដឹកនាំក្រុមការងារ ចុះផ្សព្វផ្សាយសេចក្តីប្រកាសកំណត់តំបន់ធ្វើការវិនិច្ឆ័យសម្រាប់ ការចុះបញ្ជីដីធ្លីជាប្រព័ន្ធ

បានផុស

២ years មុន

នៅ

ថ្ងៃសុក្រ ១៥ មីនា ២០២៤

ដោយ

ព្រះវិហារ ៖ កាលពីពេលថ្មីៗនេះ លោក ណុប វុទ្ធី អភិបាលរងខេត្តព្រះវិហារ និងអាជ្ញាធរពាក់ព័ន្ធ ចុះប្រកាសសេចក្តីជូនដំណឹងស្តីពី កិច្ចប្រជុំផ្សព្វផ្សាយសេចក្តីប្រកាសកំណត់តំបន់ ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ជូនដល់បងប្អូនប្រជាពលរដ្ឋនៅភូមិ ម្រេច ឃុំស្រយ៉ង់ ស្រុកគូលែនខេត្តព្រះវិហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណុប វុទ្ធី បានឱ្យដឹងថា ក្រោមការយកចិត្តទុកដាក់ខ្ពស់ពីរាជរដ្ឋាភិបាល ក៏ដូចជាក្រសួងសាមី និងការខិតខំផ្ទាល់ ពីសំណាក់ លោក គីម រិទ្ធី អភិបាលនៃគណៈអភិបាលខេត្ត បានណែនាំដល់មន្ត្រីជំនាញ ត្រូវ យកចិត្តទុកដាក់ខ្លាំងលើការងារដោះស្រាយវិវាទដីធ្លី និងពន្លឿនការចុះបញ្ជីដីធ្លីជូនប្រជាពលរដ្ឋ ដែលនៅសេសសល់ឱ្យបានលឿនឆាប់រហ័ស ដើម្បីផ្ដល់សេវារដ្ឋបាលដីធ្លីជូនប្រជាពលរដ្ឋប្រកប ដោយតម្លាភាព និងប្រសិទ្ធភាពខ្ពស់សំដៅលើកកម្ពស់កម្រិតជីវភាពរស់នៅរបស់ប្រជាពលរដ្ឋ។

ប្រជាពលរដ្ឋចំនួន ១៤៣គ្រួសារ ដែលរស់នៅអាស្រ័យផលលើផ្ទៃដីប្រមាណ ១,០០០ ហិកតា ស្ថិតក្នុងភូមិម្រេច ឃុំស្រយង់ ស្រុកគូលែន ខេត្តព្រះវិហារ ទទួលបានការយកចិត្តទុក ដាក់ពីសំណាក់ថ្នាក់ដឹកនាំ ចុះជួបសំណេះសំណាលសាកសួរសុខទុក្ខ និងប្រកាសកំណត់តំបន់ ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ និងធ្វើការចុះវាស់វែងដីធ្លីជូនប្រជា ពលរដ្ឋ ដែលរស់នៅក្នុងតំបន់ខាងលើ ដើម្បីចេញប្លង់កម្មសិទ្ធិស្របច្បាប់ ក្នុងការកាន់កាប់ ប្រើប្រាស់អាស្រ័យផល។

ដើម្បីឱ្យការវាស់វែងប្រព្រឹត្តទៅដោយរលូន អាជ្ញាធរខេត្ត បានអំពាវ នាវដល់ប្រជាពលរដ្ឋទាំងអស់ មេត្តាចុះកំណត់ និងដាក់ព្រំ ឱ្យបានច្បាស់លាស់ ជាពិសេស ត្រូវត្រៀមឯកសារ ដែលពាក់ព័ន្ធទៅនឹងការចុះវាស់វែងដីធ្លី ព្រមទាំងធ្វើការផ្សព្វផ្សាយព័ត៌មាន នេះឱ្យបានទូលំទូលាយទៅដល់បងប្អូនប្រជាពលរដ្ឋ ដែលពួកគាត់មានក្បាលដី ស្ថិតនៅក្នុង តំបន់ដែលត្រូវវាស់វែង អញ្ជើញមកចូលរួមឱ្យបានគ្រប់ៗគ្នា និងត្រៀមធ្វើការសហការជាមួយក្រុមការងារ ដើម្បីងាយស្រួលក្នុងការចុះវាស់វែង។

បន្ថែមពីនេះសូមឱ្យបងប្អូន ប្រជាពលរដ្ឋទាំងអស់ ត្រូវចេះយោគយល់អធ្យាស្រ័យរវាង គ្នានិងគ្នា ដែលមានព្រំដីជាប់គ្នាដើម្បី កុំឲ្យមានបញ្ហាក្នុងការ វាស់វែង ពោលព្រំដីមានបញ្ហាគឺ ក្រុម ការងារមិនអាចវាស់វែងជូនបងប្អូនបានឡើយ។ ជាមួយនេះបងប្អូនដែលចូលទន្ទ្រានដីរដ្ឋ ខុសច្បាប់ សូមបងប្អូនបញ្ឈប់សកម្មភាពនេះ ហើយវិលត្រឡប់ទៅលំនៅឋានដើមរបស់ខ្លួន វិញផងដែរ៕