រដ្ឋមន្ត្រីក្រសួងបរិស្ថាន៖ ការរំលោភបំពានដីព្រៃរបស់រដ្ឋ មិនអាចលាក់បាំងបានទេ

លោក អ៊ាង សុផល្លែត រដ្ឋមន្ត្រី​ក្រសួង​បរិស្ថានបាន​ឱ្យ​បញ្ឈប់​ជា​បន្ទាន់​នូវ​សកម្មភាព​កាប់​រាន​ទន្ទ្រាន​ដី​ព្រៃ​របស់​រដ្ឋ​ដោយខុសច្បាប់។

ទង្វើបំពាន​នេះ មិន​អាច​លាក់​កំបាំង​បាន​ទេ ហើយ​រាជរដ្ឋាភិបាល​កម្ពុជា​នីតិកាល​ទី៧ នៃរដ្ឋសភាកំពុងយកចិត្តទុកដាក់ និង​អនុវត្តយ៉ាងតឹងរ៉ឹង​នូវ​វិធានការ​ច្បាប់ ប្រកប​ដោយ​តម្លាភាព និង​ប្រសិទ្ធភាព។ នេះបើតាមលោករដ្ឋមន្រ្តី។

ការថ្លែង​ប្រកាស​យ៉ាងម៉ឺងម៉ាត់​របស់​រដ្ឋមន្ត្រីក្រសួងបរិស្ថាន អំពី​វិធានការ​ច្បាប់យ៉ាង​តឹងរ៉ឹងលើ​បទល្មើសធនធានធម្មជាតិ របស់​រាជរដ្ឋាភិបាលកម្ពុជានីតិកាលទី៧ នៃរដ្ឋសភា​នេះ គឺ​ដើម្បី​ទប់ស្កាត់ និង​ការពារ​ការ​កាប់រាន​ដីព្រៃរបស់​រដ្ឋ​ជាបន្តបន្ទាប់​​ដោយខុសច្បាប់។ ​

លោក លោក អ៊ាង សុផល្លែត ក៏​បាន​​លើកឡើងពីវិធានការ​ជាក់ស្តែង​កាល​ពេលថ្មីៗនេះ ក្រោម​កិច្ច​សហប្រតិបត្តិការ​យ៉ាង​ជិត​ស្និទ្ធ​ជាមួយក្រសួងមន្ទីរ​ពាក់ព័ន្ធ អ្នកច្បាប់ សមត្ថកិច្ច និង​អង្គភាពប្រឆាំងអំពើពុករលួយ បាន​ចុះ​បង្ក្រាប​ជា​ច្រើនករណី និង​បាន​ដកហូត​យក​ដីព្រៃត្រឡប់​ជូន​រដ្ឋវិញជាច្រើនហិកតា។

លោករដ្ឋមន្រ្តី​បានបន្ត​ថា រដ្ឋាភិបាលដែល​មានក្រសួងបរិស្ថាន​ជា​សេនាធិការបាន​ដាក់​យុទ្ធនា​ការបណ្ដុះកូនឈើ ១ លាន​ដើម​យ៉ាងតិចក្នុង ១ ឆ្នាំ សម្រាប់​ចែក​ជូន​ពលរដ្ឋដាំ​ដោយឥតគិតថ្លៃ នៅទូទាំង ២៥ រាជធានី/ខេត្ត។

ក្រសួង​បាន​រៀបចំថ្នាលបណ្ដុះកូនឈើ​ជាលក្ខណៈ​តំបន់​ចំនួន ៥ ទីតាំង ដែលរួមមាន ខេត្តសៀមរាប ខេត្តត្បូងឃ្មុំ ខេត្តកំពង់ស្ពឺ ខេត្តកំពង់ធំ និងខេត្តមណ្ឌលគិរី ។

នៅថ្ងៃទី១០ ខែកក្កដា ឆ្នាំ២០២៤ ខាងមុខនេះ គឺ​ជា​ថ្ងៃ​បើកយុទ្ធនាការ​ពិព័រណ៍កូនឈើ និងផ្តល់ជូនកូនឈើគ្រប់ប្រភេទ ដោយឥតគិតថ្លៃជូនប្រជាពលរដ្ឋ នៅមុខទីស្តីការក្រសួងបរិស្ថាន រយៈពេល ៦ ថ្ងៃគឺចាប់ពីថ្ងៃទី១០ ដល់ ទី១៥ខែកក្កដា ឆ្នាំ២០២៤។ បើ​តាមលោករដ្ឋមន្រ្តី ប្រជាពលរដ្ឋ ប្រជា​សហគមន៍ដែល​បាន​មក​ទស្សនកិច្ច​នៅ​តាម​ស្តង់កូនឈើ ពេញ​ចិត្តប្រភេទកូនឈើអ្វី អាច​ទៅ​យកកូនឈើពីមន្ទីរបរិស្ថាន នៅតាមខេត្តដែលខ្លួនរស់នៅបាន ដោយ​មិនចំណាយថ្លៃដឹកជញ្ជូនពីរាជធានីភ្នំពេញទៅតាមខេត្តឡើយ៕

​