ព័ត៌មានជាតិ
ការផ្លាស់ប្ដូរមេបញ្ជាការអាវុធហត្ថស្រុកមណ្ឌលសីមា ពុំមែនកំហុសឆ្គង ឬ វិន័យទណ្ឌកម្ម នោះទេ
មេបញ្ជាការកងរាជអាវុធហត្ថខេត្តកោះកុង អះអាងថា ការផ្លាស់ប្ដូរមេបញ្ជាការថ្មី នៃកងរាជអាវុធហត្ថស្រុកមណ្ឌលសីមា គឺពុំមែនដោយសារកំហុសឆ្គង ឬ ទទួលវិន័យទណ្ឌកម្មអ្វីឡើយ។
![](https://www.kampucheathmey.com/wp-content/uploads/2024/05/photo_2024-05-13_12-15-45-4-1024x682.jpg)
លោកបញ្ជាក់ថា គ្មានទេបញ្ហាកំហុសឆ្គង និងការដាក់វិន័យទណ្ឌកម្មចំពោះលោកវរសេនីយ៍ត្រី សួស មិថុនា ដែលជាអតីតមេបញ្ជាការមូលដ្ឋានស្រុកមណ្ឌលសីមា។ ពោល លោក សួស មិថុនា មានតួនាទីភារកិច្ចដោយផ្ទេរទៅកាន់ការនៅខេត្តបាត់ដំបង។
ការអះអាង និងបញ្ជាក់នេះ ក្នុងឱកាស លោកឧត្ដមសេនីយ៍ត្រី តាំង ឈុនស្រេង មេបញ្ជាការកងរាជអាវុធហត្ថខេត្តកោះកុង អញ្ជើញជាអធិបតីក្នុងពិធីប្រកាសតែងតាំង និងផ្ទេរភារកិច្ចថ្មីមេបញ្ជាការមូលដ្ឋានកងរាជអាវុធហត្ថស្រុកមណ្ឌលសីមា កាលពីព្រឹកថ្ងៃទី ១៣ ខែឧសភា ឆ្នាំ ២០២៤ នេះ។
![](https://www.kampucheathmey.com/wp-content/uploads/2024/05/photo_2024-05-13_12-15-45-2-1024x682.jpg)
លោកមេបញ្ជាការកងរាជអាវុធហត្ថខេត្តកោះកុង បន្ថែមថា ដូច្នេះការតែងតាំងលោកអនុសេនីយ៍ ដួង ភារ៉ូត ជាមេបញ្ជាការថ្មី នៃមូលដ្ឋានកងរាជអាវុធហត្ថស្រុកមណ្ឌលសីមា ជំនួស លោក សួស មិថុនា ធ្វើឡើងទៅតាមកម្មវិធីនយោបាយរបស់រាជរដ្ឋាភិបាលអំពីកំណែទម្រង់កងកម្លាំងប្រដាប់អាវុធ និងយុទ្ធសាស្ត្រកំណែទម្រង់កងយោធពលខេមរភូមិន្ទ ៥ ឆ្នាំ ឆ្ពោះទៅប្រមូលផ្ដុំ រៀបរយ ទំនើបកម្ម និងប្រសិទ្ធភាព។
លោក តាំង ឈុនស្រេង លើកឡើងទៀតថា ការតែងតាំងផ្លាស់ប្ដូរមុខតំណែងកន្លែងធ្វើការនៅក្នុងអង្គភាពកងរាជអាវុធហត្ថ ក៏ដូចជាមន្ត្រីរាជការស៊ីវិល វិស័យឯកជន គឺជាក្រឹត្យក្រម នៃការចាត់តាំងរៀបចំធនធានមនុស្ស បរិយាកាស ទីកន្លែងការងារ ការផ្លាស់ប្ដូរមុខតំណែង គឺមានការអត្ថប្រយោជន៍ ដើម្បីការពារកិត្តិយស និងសេចក្ដីថ្លៃថ្នូររបស់នាយទាហាន រៀបចំធនធានមនុស្សស្របទៅនឹងសមត្ថភាពជំនាញ និងគុណាធិបតេយ្យ ជាការផ្តល់ឱកាសដល់អ្នកបន្តវេន និងចែករំលែកបទពិសោធល្អៗ ក្នុងគោលបំណងពង្រឹងស្ថាប័នអង្គភាពទៅរកភាពរីកចម្រើនព្រមៗ គ្នា។
![](https://www.kampucheathmey.com/wp-content/uploads/2024/05/photo_2024-05-13_12-16-13-682x1024.jpg)
បើតាមលោកឧត្ដមសេនីយ៍ត្រី មេបញ្ជាការកងរាជអាវុធហត្ថខេត្តកោះកុង វាយតម្លៃខ្ពស់ពីស្នាដៃការងារដឹកនាំគ្រប់គ្រងរបស់លោក សួស មិថុនា ដែលបានប្រឹងប្រែងកសាងអភិវឌ្ឍន៍បន្ទាយកងរាជអាវុធហត្ថស្រុកមណ្ឌលសីមា និងចំណាយថវិកាជាច្រើនទៀត ដើម្បីផ្គត់ផ្គង់អង្គភាព ព្រមទាំងកងកម្លាំងក្រោមឱវាទ។
ជាក់ស្ដែង លោកអនុសេនីយ៍ឯក ដួង ភារ៉ូត ដែលជាមេបញ្ជាការថ្មី នៃមូលដ្ឋានកងរាជអាវុធហត្ថស្រុកមណ្ឌលសីមា ជាមនុស្សមានសមត្ថភាពចំណេះដឹងពិតប្រាកដដោយបញ្ចប់បរិញ្ញាបត្រនាយទាហានជាន់ខ្ពស់។ ដូច្នេះលោកជឿជាក់ថា លោក ដួង ភារ៉ូត នឹងបន្តដឹកនាំពង្រឹងសមត្ថភាព បទពិសោធការងារ គ្រប់គ្រងបញ្ជាក្នុងអង្គភាពបានយ៉ាងមានប្រសិទ្ធភាព តាមផែនការ និងការចាត់តាំងរបស់ថ្នាក់ដឹកនាំពាក់ព័ន្ធ។
![](https://www.kampucheathmey.com/wp-content/uploads/2024/05/photo_2024-05-13_12-15-46-682x1024.jpg)
ដោយឡែកលោកអនុសេនីយ៍ឯក ដួង ភារ៉ូត មេបញ្ជាការថ្មីមូលដ្ឋានកងរាជអាវុធហត្ថស្រុកមណ្ឌលសីមា ក៏បានប្ដេជ្ញាចិត្តរបស់ខ្លួនថា នឹងខិតខំបំពេញវិជ្ជាជីវៈការងារកម្លាំងជំនាញ សាមគ្គីភាពផ្ទៃក្នុង និងតាមដាន ទប់ស្កាត់ បង្ក្រាបរាល់បទល្មើសនានាក្នុងមូលដ្ឋានជូនប្រជាពលរដ្ឋ ព្រមទាំងថ្នាក់ដឹកនាំ។
លោក ដួង ភារ៉ូត បន្តថា នឹងបង្កបរិយាកាសការងារឱ្យមានភាពរីកចម្រើន ក្រោមម្លប់សុខសន្តិភាព បង្កើនការហ្វឹកហ្វឺនកម្លាំងជំនាញ គោរពស្មោះត្រង់ចំពោះប្រទេសជាតិ ប្រជាពលរដ្ឋ គោរពច្បាប់ និងបទល្មើសត្រូវតែបង្ក្រាបឱ្យខាងតែបាន៕
អត្ថបទ ៖ សិរីវឌ្ឍនៈ
![](https://www.kampucheathmey.com/wp-content/uploads/2024/05/photo_2024-05-13_12-15-45-1024x682.jpg)
![](https://www.kampucheathmey.com/wp-content/uploads/2024/05/photo_2024-05-13_12-15-45-3-1024x682.jpg)
![](https://www.kampucheathmey.com/wp-content/uploads/2024/05/photo_2024-05-13_12-15-45-5-1024x682.jpg)
-
ជីវិតកម្សាន្ដ១ សប្តាហ៍ ago
ពិធីករម្នាក់ រងការរិះគន់យ៉ាងចាស់ដៃទង្វើខ្វះសីលធម៌ អង្គុយគងអន្ទាក់ខ្លាពេលសម្ភាសន៍អ្នកនិពន្ធ សុខ ចាន់ផល
-
ជីវិតកម្សាន្ដ២ ថ្ងៃ ago
ពូ ណុយ និង យ៉ែម ស្រីពេជ្រ ត្រៀមចូលរោងការដើមខែក្រោយ
-
ព័ត៌មានជាតិ៦ ថ្ងៃ ago
មន្ត្រីគាំទ្រគម្រោងព្រែកជីកហ្វូណនម្នាក់ ចោទសួរ The Cambodia Daily ហេតុអ្វីផ្សាយព័ត៌មានប្រឆាំងប្រយោជន៍ជាតិ?
-
ព័ត៌មានអន្ដរជាតិ៣ ថ្ងៃ ago
មូលហេតុ ៣ ដែលអធិរាជ ឈានឡុង នៃរាជវង្ស Qing បញ្ជាឲ្យកាត់ក្បាលគ្រូទាយល្បីម្នាក់
-
ព័ត៌មានជាតិ១៥ ម៉ោង ago
Breaking News! ព្រែកជីកហ្វូណនតេជោ នឹងបើកការដ្ឋានសាងសង់ផ្លូវការនៅ ខែសីហា
-
ជីវិតកម្សាន្ដ១ សប្តាហ៍ ago
តារារ៉េប Ricky ScoTt ទម្លាយរឿងនារីម្នាក់ត្រូវ Rappersល្បីឈ្មោះ២រូបបៀតបៀនផ្លូវភេទ
-
ព័ត៌មានអន្ដរជាតិ១ សប្តាហ៍ ago
៥០ ឆ្នាំមកនេះ បុរាណវិទូ ចិន នៅតែឈឺចាប់ ក្រោយកំណាយឃើញទ័ពដីឥដ្ឋអធិរាជ ឈិនស៊ី
-
ព័ត៌មានជាតិ៧ ថ្ងៃ ago
សត្វព្រៃដែលបាត់វត្តមានចាប់ពី ៣០ ឆ្នាំ ទើបប្រកាសថាផុតពូជពីដែនព្រៃធម្មជាតិ