ឧបនាយករដ្ឋមន្ត្រី ស សុខា ទៅបំពេញទស្សនកិច្ចនៅអូស្ត្រាលី ដោយផ្ដោតលើការងារអន្តោប្រវេសន៍

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា អញ្ជើញដឹកនាំគណៈប្រតិភូជាន់ខ្ពស់ទៅបំពេញទស្សនកិច្ចការងារនៅប្រទេសអូស្ត្រាលី រយៈពេលប្រមាណ១សប្ដាហ៍។

សេចក្ដីប្រកាសព័ត៌មានរបស់ក្រសួងមហាផ្ទៃ នាថ្ងៃទី១០ ខែមិថុនា ឆ្នាំ២០២៤នេះ បានឱ្យដឹងថា ដោយបានការអនុញ្ញាត ពីសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងក្នុងក្របខណ្ឌនៃកិច្ចសហប្រតិបត្តិការលើការងារអន្តោប្រវេសន៍ជាមួយភាគីអូស្ត្រាលី លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងអញ្ជើញដឹកនាំគណៈប្រតិភូជាន់ខ្ពស់បំពេញទស្សនកិច្ចការងារនៅប្រទេសអូស្ត្រាលី ចាប់ពីថ្ងៃទី១០ ដល់ថ្ងៃទី ១៦ ខែមិថុនា ឆ្នាំ២០២៤។

ក្នុងដំណើរទស្សនកិច្ចនេះ លោកឧបនាយករដ្ឋមន្ត្រី ស សុខា នឹងជួបជាមួយរដ្ឋមន្ត្រីទទួលបន្ទុកកិច្ចការអន្តោប្រវេសន៍ សញ្ជាតិ និងពហុវប្បធម៌ នៃរដ្ឋាភិបាលអូស្ត្រាលី ព្រមទាំងអញ្ជើញជួបជាមួយថ្នាក់ដឹកនាំនៃក្រសួងការបរទេស និងពាណិជ្ជកម្ម និងមន្ត្រីជំនាញនៃនគរបាលសហព័ន្ធអូស្ត្រាលី ដើម្បីពិភាក្សា និងពិនិត្យលទ្ធភាពក្នុងការពង្រីកនូវកិច្ចសហប្រតិបត្តិការ ព្រមទាំងផ្លាស់ប្តូរបទពិសោធន៍ទៅវិញ ទៅមកលើការងារអន្តោប្រវេសន៍ សន្តិសុខសាយប័រ និងការងារប្រយុទ្ធប្រឆាំងអំពើជួញដូរមនុស្ស៕