សណ្តែកខ្មៅ ជាភេសជ្ជៈយិនស៊ិនពេលព្រឹក ជួយបញ្ចុះជាតិស្ករក្នុងឈាម និងការពារឆ្អឹងឲ្យរឹងមាំ

ប្រសិនបើអ្នកចង់កែលម្អសុខភាព ឬការពារជំងឺ អ្នកប្រហែលជាគិតភ្លាមៗអំពីការប្រើប្រាស់ថ្នាំគ្រាប់។ ទោះជាយ៉ាងណាក៏ដោយ ការប្រើប្រាស់ថ្នាំមិនត្រឹមតែថ្លៃទេ ថែមទាំងអាចបង្កគ្រោះថ្នាក់ដល់សុខភាពទៀតផង។ នៅក្នុងធម្មជាតិមានអាហារជាច្រើនដែលមានឥទ្ធិពលឱសថដូចជាសណ្តែកខ្មៅ។ អ្នកអាចប្រើពួកវាយ៉ាងពិតប្រាកដដើម្បីកែលម្អសុខភាពរបស់អ្នក និងគាំទ្រការព្យាបាលជំងឺ។

នៅក្នុងវប្បធម៌ធ្វើម្ហូបរបស់ជប៉ុន និងកូរ៉េ ចានដែលធ្វើពីសណ្តែកខ្មៅគឺមានប្រជាប្រិយភាពខ្លាំងណាស់។ ពីតែសណ្តែកតូចមួយ មនុស្សអាចធ្វើម្ហូបគ្រប់ប្រភេទ ភេសជ្ជៈមានជីវជាតិ ឬទឹកខ្មេះសណ្តែកខ្មៅ ដែលល្អសម្រាប់សុខភាព និងប្រសិទ្ធភាពសម្រាប់សម្រស់។

មនុស្សបុរាណតែងតែជឿថា សណ្តែកខ្មៅមួយក្តាប់តូចក្នុងមួយថ្ងៃ ល្អដូចប៉ូវកំលាំង។ ដើម្បីស្រូបយកសារធាតុចិញ្ចឹមដ៏មានតម្លៃទាំងនេះ អ្នកអាចប្រើសណ្តែកខ្មៅឆ្អិនដោយផ្ទាល់ ឬផឹកទឹក។ ប្រសិនបើយើងផឹកវានៅពេលត្រឹមត្រូវ ជាពិសេសនៅពេលព្រឹក យើងនឹងទទួលបានអត្ថប្រយោជន៍ជាច្រើនចំពោះសុខភាព និងសម្រស់។

ទឹកសណ្តែកខ្មៅមានមាតិកាខ្ពស់នៃសារធាតុ pectin ជាតិសរសៃរលាយ។ នៅពេលដែលយើងផឹកទឹកសណ្តែកខ្មៅមុនពេលអាហារពេលព្រឹក យើងនឹងមានអារម្មណ៍ឆ្អែតបានយូរ និងកាត់បន្ថយការឃ្លាន។​ បន្ទាប់ពីភ្ញាក់ពីគេងមួយយប់ ឈាមក្នុងខ្លួននឹងកាន់តែក្រាស់ ដោយសារយើងមិនបានផឹកទឹកពេញមួយយប់ ខណៈពេលដែលថ្លើម និងតម្រងនោមនៅតែធ្វើការដើម្បីច្រោះឈាម និងកម្ចាត់ជាតិពុល។ ការទទួលទានទឹកសណ្តែកខ្មៅនៅពេលព្រឹកពេលភ្ញាក់ពីគេង ជួយបញ្ចុះទឹកនោម សម្អាតផ្លូវនោម និងកម្ចាត់ជាតិពុលចេញពីរាងកាយបានលឿនជាងមុន។ លើសពីនេះ ការប្រើប្រាស់ទឹកប្រភេទនេះជាប្រចាំ ក៏នាំមកនូវអត្ថប្រយោជន៍ល្អៗជាច្រើនដល់អ្នកប្រើប្រាស់ផងដែរ៖

ពង្រឹងភាពស៊ាំ សណ្ដែក​ខ្មៅ​សម្បូរ​ទៅ​ដោយ​ប្រូតេអ៊ីន​រុក្ខជាតិ​ដែល​មាន​សារៈ​សំខាន់​សម្រាប់​រាង​កាយ​មនុស្ស​វា​អាច​បង្កើត​អង្គ​បដិបក្ខ​ដើម្បី​ប្រឆាំង​នឹង​ជំងឺ។ នៅពេលដែលរាងកាយមិនទទួលបានប្រូតេអ៊ីនគ្រប់គ្រាន់ បរិមាណអង្គបដិប្រាណនៅក្នុងខ្លួននឹងមិនត្រូវបានសំយោគទេ ដែលនាំឲ្យថយចុះភាពស៊ាំ និងអស់កម្លាំង។ ដូច្នេះហើយ ការទទួលទានសណ្តែកខ្មៅច្រើន អាចបង្កើនភាពស៊ាំ។

ការថែរក្សាស្បែក យោងតាមសារព័ត៌មាន Xinhuanet សណ្តែកខ្មៅសម្បូរទៅដោយសារធាតុ Anthocyanins វីតាមីន E សារធាតុ isoflavones និងសារធាតុប្រឆាំងអុកស៊ីតកម្មផ្សេងទៀត ដែលក្នុងនោះមាតិកាវីតាមីន E ខ្ពស់ជាពិសេស។​ ការសិក្សាបានរកឃើញថារាល់ ១០០ ក្រាមនៃសណ្តែកខ្មៅមានផ្ទុករហូតដល់ ១៧.៣៦ មីក្រូក្រាម។ ដូច្នេះហើយ ការទទួលទានសណ្តែកខ្មៅជាប្រចាំ អាចជួយរាងកាយមនុស្សទប់ទល់នឹងការវាយលុករបស់រ៉ាឌីកាល់សេរី មានប្រសិទ្ធភាពក្នុងការថែរក្សាសុខភាពស្បែក ដោយហេតុនេះដើរតួក្នុងការធ្វើឲ្យស្បែកស្រស់ថ្លា មានសុខភាពល្អ និងក្មេងជាងវ័យ។

ការថែទាំសុខភាពសរសៃឈាមបេះដូង​ សណ្តែកខ្មៅមានផ្ទុកសារធាតុ Sterols រុក្ខជាតិជាច្រើន ដែលជួយគ្រប់គ្រងកម្រិតជាតិខ្លាញ់ក្នុងឈាម។ អាស៊ីត linoleic ដ៏សម្បូរបែបដែលមាននៅក្នុងសណ្តែកខ្មៅត្រូវបានគេស្គាល់ថាជា ប៉ូវកំលាំងឈាម ដែលដើរតួនាទីយ៉ាងសំខាន់ក្នុងការគ្រប់គ្រងការរំលាយអាហារកូឡេស្តេរ៉ុល។ វាអាចត្រូវបានគេមើលឃើញថាសណ្តែកខ្មៅជួយការពារសុខភាពសរសៃឈាមបេះដូង និងជួយការពារការកើតឡើង និងការវិវត្តនៃជំងឺមួយចំនួន។

ជាតិស្ករក្នុងឈាម អាហារដែលមាន GI ទាប (សន្ទស្សន៍គ្លីសេមិក) ដូចជាសណ្តែកខ្មៅ ត្រូវបានគេបង្ហាញថា ធ្វើឱ្ឲ្យប្រសើរឡើងនូវការគ្រប់គ្រងជាតិស្ករក្នុងឈាម លើកកម្ពស់ការសម្រកទម្ងន់ និងកាត់បន្ថយកម្រិតកូឡេស្តេរ៉ុល និងទ្រីគ្លីសេរីតចំពោះអ្នកជំងឺទឹកនោមផ្អែមប្រភេទទី ២។

ជួយឆ្អឹងមានសុខភាពល្អ កាល់ស្យូម និងផូស្វ័រ គឺជាសារធាតុរ៉ែសំខាន់ពីរក្នុងការបង្កើតរចនាសម្ព័ន្ធឆ្អឹង ខណៈពេលដែលជាតិដែក និងស័ង្កសីដើរតួក្នុងការរក្សាភាពរឹងមាំ និងការបត់បែនសម្រាប់ឆ្អឹង និងសន្លាក់។ អ្វី​ដែល​គួរ​ឲ្យចាប់​អារម្មណ៍​នោះ​គឺ​សារធាតុ​ផ្សំ​ទាំង​អស់​ដែល​បាន​រៀប​រាប់​ខាង​លើ​មាន​នៅ​ក្នុង​សណ្តែក​ខ្មៅ។ ដូច្នេះហើយ ប្រសិនបើអ្នកចង់ការពារជំងឺឆ្អឹង និងសន្លាក់ និងធ្វើឆ្អឹងរឹងមាំ អ្នកគួរតែរក្សាទម្លាប់ប្រើប្រាស់ទឹកសណ្តែកខ្មៅអាំង។

ជំរុញចលនាពោះវៀន​ ដោយសារតែសណ្តែកខ្មៅសម្បូរទៅដោយជាតិសរសៃ វាអាចជំរុញចលនាពោះវៀន សម្រួលបញ្ហាពោះវៀន និងធ្វើឲ្យចលនាពោះវៀនកាន់តែរលូន។ ទោះជាយ៉ាងណាក៏ដោយ គួរកត់សំគាល់ថា បន្ទាប់ពីទទួលទានសណ្តែកខ្មៅហើយ យកល្អគួរតែចងចាំផឹកទឹកឲ្យបានច្រើន ដើម្បីបង្កើនតួនាទីនៃជាតិសរសៃ។

ជំរុញការស្រូបយកជាតិដែក សារធាតុផ្សំនៅក្នុងសំបកសណ្តែកខ្មៅ ជួយកែលម្អការស្រូបយកជាតិដែករបស់រាងកាយ និងជួយកាត់បន្ថយរោគសញ្ញាមួយចំនួននៃកង្វះជាតិដែក។

ការពារជំងឺមហារីក និងដាច់សរសៃឈាមខួរក្បាល វេជ្ជបណ្ឌិតផ្នែកវេជ្ជសាស្ត្រផ្ទៃក្នុង Akitsu នាយកមន្ទីរពេទ្យ Akitsu ក្នុងប្រទេសជប៉ុន បាននិយាយនៅក្នុងអត្ថបទមួយថា ទឹកសណ្តែកខ្មៅ គឺជាភេសជ្ជៈដ៏ល្អបំផុតសម្រាប់ការពារការគាំងបេះដូង ជំងឺដាច់សរសៃឈាមខួរក្បាល និងជំងឺមហារីក។ Akitsu ចង្អុលបង្ហាញថាការកើតឡើងនៃជំងឺ myocardial infarction, ជំងឺដាច់សរសៃឈាមខួរក្បាលនិងមហារីកមិនអាចបំបែកចេញពីសារធាតុដែលគេហៅថា អុកស៊ីសែនសកម្មបានទេ៕

អត្ថបទ៖​ សាង ស្រីល័ក្ខ

ចុចអាន៖ការសិក្សា៖ កាហ្វេ ​​ជួយ​កាត់​បន្ថយ​ការ​ស្លាប់ ជំងឺ​ដាច់​សរសៃឈាម​ខួរក្បាល និង​​បេះដូង