​មនុស្សរាប់ម៉ឺននាក់​​​នៅ​ភាគខាងត្បូង​មី​យ៉ាន់​ម៉ា​ ត្រូវជម្លៀស​​ ព្រោះទឹកជំនន់វាយប្រហារ​

ទឹកជំនន់វាយប្រហារភាគខាងត្បូងប្រទេសមីយ៉ាន់ម៉ា បណ្ដាលឲ្យជម្លៀសប្រជាជនរាប់ម៉ឺននាក់ ខណៈហេដ្ឋារចនាសម្ព័ន្ធនានាលិចលង់ក្រោមទឹកជំនន់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី៣០ខែកក្កដានេះ។

ទីភ្នាក់ងារអាកាសធាតុជាតិបានរាយការណ៍ថា កម្រិតទឹកទន្លេនៅក្នុងទីក្រុងចំនួន១៣នៅទូទាំងតំបន់ និងរដ្ឋចំនួន៤ ដូចជា Ayeyarwady, Bago, Mon និង Kayin បានឡើងលើសសញ្ញាព្រមាន​ប្រកាស​អាសន្ន​កាលពីថ្ងៃចន្ទ។

នៅក្នុងសង្កាត់ Bago រដ្ឋ Bago ប្រជាជនសរុបចំនួន ១៨ ២១០នាក់ មកពី ជិត​​៥០០០​គ្រួសារ ត្រូវបានជម្លៀសចេញ ដោយសារតែទឹកជំនន់ ដែលបណ្តាលមកពីភ្លៀងធ្លាក់ខ្លាំងជាបន្តបន្ទាប់ក្នុងរយៈពេលប៉ុន្មានថ្ងៃថ្មីៗនេះ។ ចំណែកនៅក្នុងសង្កាត់ Myawaddy រដ្ឋ Kayin ប្រជាជនចំនួន ៤៩៨៥នាក់ មកពី ៣៧០គ្រួសារ កំពុងស្នាក់នៅក្នុងមណ្ឌលសង្គ្រោះចំនួន១១នៅក្នុងទីប្រជុំជន ដោយសារតែការកើនឡើងនៃទឹកទន្លេ Thaungyin បណ្តាលមកពីភ្លៀងធ្លាក់ឥតឈប់ឈរ។

ជាមួយគ្នានេះ ផ្លូវរថភ្លើង និងផ្លូវហាយវេក្នុងរដ្ឋ Ayeyarwady និងរដ្ឋមនបានលិចទឹក ដែលបង្កហានិភ័យដល់អ្នកធ្វើដំណើរ ខណៈសាលារៀនជា​ច្រើន​ត្រូវបានបិទ​​។ ក្រៅ​ពី​លើតំបន់ និងរដ្ឋចំនួនបួនក្នុងប្រទេស ទីប្រជុំជន Taninthayi ក្នុង​តំបន់ Taninthayi ក៏បានជួបប្រទះនូវទឹកជំនន់កាលពីថ្ងៃអាទិត្យផងដែរ ខណៈទឹកទន្លេ Taninthayi ហក់​ឡើងគួរឲ្យបារម្ភ។

មកដល់ពេលនេះ អាជ្ញាធរមូលដ្ឋាន ​អង្គភាព​ពន្លត់អគ្គីភ័យ និងអ្នកជួយសង្គ្រោះនៅតំបន់រងគ្រោះ បាននឹងកំពុងធ្វើការរួមគ្នាដើម្បីជម្លៀសអ្នកស្រុក និងផ្តល់ការផ្គត់ផ្គង់ចាំបាច់ដល់ពួកគេ ដូចជាអាហារ ទឹកស្អាត និងទីជម្រកជាដើម៕

អត្ថបទ ៖ ប៊ុន សុភាព