ព័ត៌មានអន្ដរជាតិ

ទឹកជំនន់នៅឥណ្ឌានាំទាំងសត្វក្រពើ រីឯអ្នកស្លាប់កើនដល់៣៦នាក់

បានផុស

២ years មុន

នៅ

ថ្ងៃសៅរ៍ ៣១ សីហា ២០២៤

ដោយ

ចំនួនអ្នកស្លាប់នៅក្នុងទឹកជំនន់នៅរដ្ឋ Gujarat ភាគខាងលិចប្រទេសឥណ្ឌា បានកើនឡើងដល់៣៦នាក់ ខណៈទន្លេ Vishwamitri ហូរហៀរនាំដោយទាំងសត្វក្រពើទៅជាមួយផងបង្កឲ្យប្រជាពលរដ្ឋភ័យស្លន់ស្លោអំពីសុវត្ថិភាពរបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លៀងធ្លាក់ខ្លាំងនៅផ្នែកមួយចំនួននៃរដ្ឋGujarat រយៈពេលបួនថ្ងៃជាប់គ្នា បានបង្កទៅជាទឹកជំនន់ភ្លាមៗនិងធ្ងន់ធ្ងរ។ យោងតាមមន្ត្រី ប្រតិបត្តិការជួយសង្គ្រោះនៅក្នុងស្រុកដែលរងផលប៉ះពាល់កំពុងដំណើរការ ក្នុងនោះមនុស្សជិត ១៨០០០នាក់ ត្រូវបានជម្លៀសចេញពីតំបន់រងគ្រោះដោយសារទឹកជំនន់ ហើយជាង៤០០០០នាក់បានផ្លាស់ប្តូរទៅកាន់ទីតាំងដែលមានសុវត្ថិភាពជាងនេះ។

ទោះបីជាជំនន់ទឹកភ្លៀងដូចជារាងស្រាកស្រាន្តបន្តិចក៏ដោយ ប៉ុន្តែមានការប្រឈមជាមួយនឹងទឹកជំនន់យ៉ាងធ្ងន់ធ្ងរនៅក្នុងតំបន់ទំនាបនៅតែមានទំហំធំ បន្ទាប់ពីទន្លេ Vishwamitri ដែលហូរកាត់ទីក្រុងនេះបានហក់ឡើងខ្លាំងបណ្ដាលឲ្យលិចនៅតំបន់លំនៅឋាន ដោយលិចអគារ ផ្លូវ និងយានយន្ត។

ជាមួយគ្នានេះការលិចលង់ និងការជន់លិចត្រូវបានរាយការណ៍នៅក្នុងតំបន់ជាច្រើន បន្ទាប់ពីទឹកពីអាងស្តុកទឹក Ajwa និងអាងស្តុកទឹក Pratappura ត្រូវបានបញ្ចេញទៅក្នុងទន្លេ Vishwamitri ខណៈក្រុមមន្ត្រីបាននិយាយថា អាងស្តុកទឹក និងទំនប់ចំនួន ១៤០និងទន្លេចំនួន២៤នៅក្នុងរដ្ឋបានកំពុងហូរលើសពីសញ្ញាគ្រោះថ្នាក់។

កាលពីថ្ងៃពុធ តំបន់ Saurashtra ដូចជា Devbhumi Dwarka, Jamnagar, Rajkot និង Porbandar បានទទួលទឹកភ្លៀងពី ៥០ទៅ២០០មីលីម៉ែត្រក្នុងរយៈពេល១២ម៉ោង។ ចំណែកតំបន់ Bhanvad taluka បានទទួលទឹកភ្លៀងកម្ពស់១៨៥មីលីម៉ែត្រក្នុងអំឡុងពេលនេះ ដែលជាកម្រិតខ្ពស់បំផុតនៅក្នុងរដ្ឋនេះ ខណៈភ្លៀងក៏បានរំខានដល់ការធ្វើចរាចរណ៍របស់យានយន្ត សេវារថភ្លើង និងប្រតិបត្តិការហោះហើរក្នុងរដ្ឋនេះផងដែរ។

ចំពេលមានភ្លៀងធ្លាក់ខ្លាំង ក៏មានការប្រឈមនឹងការគំរាមកំហែងមិនធម្មតាពីសត្វក្រពើផងដែរ ដោយសារទន្លេ Vishwamitri ជាជម្រករបស់សត្វក្រពើ៣០០ក្បាល កំពុងហូរហៀរ ដែលទឹកអាចនាំឱ្យសត្វល្មូនទាំងនេះ ចូលទៅតាំងទីលំនៅរបស់មនុស្ស បង្កឱ្យមានការភ័យស្លន់ស្លោក្នុងចំណោមអ្នកស្រុក ខណៈកាលពីថ្ងៃព្រហស្បតិ៍ ក្រពើជាច្រើនក្បាលត្រូវបានគេប្រទះឃើញដេកនៅលើដំបូលផ្ទះ និងតាមដងផ្លូវនានា៕