ព័ត៌មានជាតិ

មន្ត្រីជំនាញនាយកដ្ឋានធារាសាស្ត្រកសិកម្ម ចុះពិនិត្យការងារជួសជុលបន្ទាន់ ច្រាំងស្ទឹងព្រែកត្នោតបាក់ស្រុត ក្នុងភូមិសាស្ត្រក្រុងតាខ្មៅ

បានផុស

២ years មុន

នៅ

ថ្ងៃសុក្រ ៣០ សីហា ២០២៤

ដោយ

មន្ត្រីជំនាញនាយកដ្ឋានធារាសាស្ត្រកសិកម្ម នៃក្រសួងធនធានទឹក និងឧតុនិយម ចុះត្រួតពិនិត្យការងារជួសជុលបន្ទាន់ច្រាំងស្ទឹងព្រែកត្នោតបាក់ស្រុត ចំនួន ៣ ទីតាំង ស្ថិតក្នុងភូមិសាស្ត្រស្ទឹងជ្រៅ ក្រុងតាខ្មៅ ខេត្តកណ្ដាល នៅថ្ងៃទី ៣០ ខែសីហា ឆ្នាំ ២០២៤ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផាង វី ប្រធាននាយកដ្ឋានធារាសាស្ត្រកសិកម្ម បញ្ជាក់ឱ្យដឹងថា នៅជំហានដំបូងនេះ ក្រសួងបានបញ្ជូនគ្រឿងចក្ររួមមាន អេស្កាវាទ័រ ៣ គ្រឿង និងរថយន្តបែនចំនួន ៥ គ្រឿង សម្រាប់អនុវត្តការងារជួសជុលបន្ទាន់ច្រាំងស្ទឹងដែលបាក់ដាច់ចំនួន ៣ ទីតាំង ស្ថិតក្នុងភូមិព្រែកតាឡុង សង្កាត់តាក្ដុល ភូមិបត្តាជី ១ និង បត្តាជី ២ សង្កាត់ព្រែកហូរ ក្រុងតាខ្មៅ ខេត្តកណ្តាល ជាលទ្ធផលបានបុកស្មាច់ទប់ជម្រាលជើងទេរប្រវែង ២០០ ម៉ែត្រ និងរៀបបាវខ្សាច់ប្រវែង ១០០ ម៉ែត្រ។

សូមជម្រាបថា ការជួសជុលបន្ទាន់នេះបានធ្វើឡើងបន្ទាប់ពីលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយមន្ត្រីបច្ចេកទេសក្រសួង និងមន្ទីរ រួមជាមួយលោក គួច ចំរើន អភិបាល នៃគណៈអភិបាលខេត្តកណ្តាល បានចុះពិនិត្យជាក់ស្ដែងស្ថានភាពច្រាំងស្ទឹងព្រែកត្នោតដែលរងការបាក់ស្រុតក្នុងភូមិសាស្ត្រខាងលើ ដើម្បីបញ្ចៀសការបាក់ដាច់ហេដ្ឋារចនាសម្ព័ន្ធនានារួមមានផ្លូវថ្នល់ និងផ្ទះប្រជាពលរដ្ឋជាដើម កាលពីថ្ងៃទី ២១ ខែសីហា ឆ្នាំ ២០២៤។ ក្រោមការយកចិត្តទុកដាក់ខ្ពស់ពីសុវត្ថិភាព សុខទុក្ខរបស់ប្រជាពលរដ្ឋ និងដើម្បីការពារច្រាំងស្ទឹង លោករដ្ឋមន្ត្រី បានដាក់បញ្ជាឱ្យក្រុមការងារជំនាញក្រសួងចុះធ្វើការជួសជុលបន្ទាន់ គឺធ្វើឱ្យបានមុនពេលទឹកឡើងមកដល់នាពេលដ៏ខ្លីខាងមុខ៕

អត្ថបទ ៖ សុខា