ព័ត៌មានអន្ដរជាតិ

កូឡុំប៊ីជួបគ្រោះថ្នាក់ធ្លាក់ឧទ្ធម្ភាគចក្រយោធាជាថ្មីសម្លាប់យោធា៨នាក់

បានផុស

២ years មុន

នៅ

ថ្ងៃចន្ទ ៣០ កញ្ញា ២០២៤

ដោយ

ទាហានកូឡុំប៊ី៨នាក់បានស្លាប់ក្នុងហេតុការណ៍ធ្លាក់ឧទ្ធម្ភាគចក្រដែលដឹកពួកគេក្នុងបេសកកម្មមនុស្សធម៌នៅជិតព្រំដែនជាមួយប្រទេសវេណេស៊ុយអេឡា។ នេះបើយោងតាមការចេញផ្សាយរបស់សារព័ត៌មាន CGTN នៅថ្ងៃទី៣០ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានាធិបតីកូឡុំប៊ី លោក Gustavo Petro បានបង្ហោះនៅលើបណ្តាញសង្គម X ថា កងទ័ពអាកាសបានរកឃើញឧទ្ធម្ភាគចក្រនេះ បន្ទាប់ពីការរុករកនៅតំបន់ជនបទមួយក្នុងក្រុង Cumaribo និងមិនមានអ្នកនៅរស់រានមានជីវិតក្នុងហេតុការណ៍នេះនោះទេ ខណៈរូបភាពចែកចាយដោយប្រព័ន្ធផ្សព្វផ្សាយរបស់ប្រទេសកូឡុំប៊ី បង្ហាញពីបំណែកយន្តហោះដែលឆេះនៅកណ្តាលវាលស្មៅ។ គ្រួសាររបស់ជនរងគ្រោះកំពុងទទួលបានការគាំទ្រ ខណៈបេសកកម្មសង្គ្រោះកំពុងដំណើរការ។

គួរបញ្ជាក់ថា វាមិនមែនជាការធ្លាក់យន្តហោះយោធាលើកទីមួយទេនៅឆ្នាំនេះក្នុងប្រទេសកូឡុំប៊ី ដោយកាលពីកាលពីខែមេសា ទាហាន៩នាក់ត្រូវបានសម្លាប់នៅពេលដែលឧទ្ធម្ភាគចក្ររបស់ពួកគេបានធ្លាក់នៅភាគខាងជើងរបស់ប្រទេស ហើយនៅក្នុងខែកុម្ភៈមនុស្ស៤នាក់ផ្សេងទៀតបានស្លាប់នៅពេលដែលយន្តហោះចម្បាំង Black Hawk បានធ្លាក់នៅតាមផ្លូវទៅកាន់មូលដ្ឋានអាកាសមួយនៅព្រំដែនជាមួយប្រទេសប៉ាណាម៉ា។ លើសពីនេះ មន្ត្រីប៉ូលិស៥នាក់ក៏បានស្លាប់ផងដែរនៅក្នុងខែកុម្ភៈនៅក្នុងហេតុករណ៍ធ្លាក់ឧទ្ធម្ភាគចក្រនៅភាគពាយព្យនាយកដ្ឋាន Antioquia។

ទោះបីជាក្រុមប្រដាប់អាវុធកំពុងធ្វើសង្រ្គាមដណ្តើមយកទឹកដី និងអំណាចជាមួយយោធានៅក្នុងតំបន់ជាច្រើននៃប្រទេស កូឡុំប៊ី ប៉ុន្តែពួកគេមិនត្រូវបានគេស្តីបន្ទោសចំពោះការធ្លាក់យន្តហោះណាមួយពីមុននោះទេ ខណៈអ្នកវិភាគមួយចំនួនមានការសង្ស័យទៅលើការខូចខាតសម្ភារៈយោធា ដែលទំនងជាបណ្ដាលមកពីក្រុមប្រដាប់អាវុធទាំងនោះ៕