ព័ត៌មានអន្ដរជាតិ

ទំនុកចិត្តទេសចរណ៍ថៃធ្លាក់ចុះ ដោយសារទឹកជំនន់

បានផុស

២ years មុន

នៅ

ថ្ងៃសុក្រ ១១ តុលា ២០២៤

ដោយ

សន្ទស្សន៍ទំនុកចិត្តទេសចរណ៍របស់ប្រទេសថៃ បានធ្លាក់ចុះនៅក្នុងត្រីមាសទី ៣ នៃឆ្នាំនេះ ដែលរងផលប៉ះពាល់ដោយសារតែទឹកជំនន់ធ្ងន់ធ្ងរទូទាំងប្រទេស ការកាត់បន្ថយការចំណាយក្នុងស្រុក និងរដូវរទាបដែលមានចំណូលភ្ញៀវទេសចរតិចជាងធម្មតា។ នេះបើតាមការចុះផ្សាយរបស់កាសែតបាងកកប៉ុស្តិ៍កាលពីពេលថ្មីៗនេះ។

យោងតាមក្រុមប្រឹក្សាទេសចរណ៍ថៃ សន្ទស្សន៍ទំនុកចិត្តសម្រាប់រយៈពេលចន្លោះពីខែកក្កដាដល់ខែកញ្ញា មានប្រមាណ ៦៨ ពិន្ទុ ដោយធ្លាក់ចុះពី ៦៩ ពិន្ទុក្នុងរយៈពេលដូចគ្នាកាលពីឆ្នាំមុន និងធ្លាក់ចុះខ្លាំងពី ៧៩ ពិន្ទុ ក្នុងត្រីមាសទី២។

ប្រធានក្រុមប្រឹក្សាក្រុមប្រឹក្សា លោក Chnnan Srisawat បានថ្លែងថា ទឹកជំនន់ដែលកំពុងកើតមាន ជាពិសេសនៅតំបន់ភាគខាងជើងប្រទេស បានធ្វើឱ្យមានការខូចខាតសេដ្ឋកិច្ចយ៉ាងខ្លាំង ដោយបង្កការខាតបង់លើសពី ៥០០ លានបាត (១៥ លានដុល្លារ) តាមការប៉ាន់ស្មាន ។ នេះបើតាមបាងកកប៉ុស្តិ៍។

ទោះបីជាយ៉ាងណាក៏ដោយ ក្រុមប្រឹក្សារំពឹងថាសន្ទស្សន៍នឹងកើនឡើងដល់ ៨០ ពិន្ទុ ក្នុងត្រីមាសទី ៤ ដែលជំរុញដោយការកើនឡើងនៃការកក់កន្លែងដំណើរកម្សាន្តរបស់ភ្ញៀវមុនដល់រដូវកាលកំពូលសម្រាប់ដំណើរកម្សាន្ត និងកំណើនជើងហោះហើរ។

គួរគូសបញ្ជាក់ថា រហូតមកដល់ពេលនេះ ប្រទេសថៃបានស្វាគមន៍ភ្ញៀវទេសចរបរទេសជិត ២៧ លាននាក់ និងកំពុងឆ្ពោះទៅរកគោលដៅប្រចាំឆ្នាំ ៣៦ លាននាក់។ ប្រាក់ចំណូលពីវិស័យទេសចរណ៍ រំពឹងថា នឹងកើនដល់ ៨៤ ប៊ីលានដុល្លារ៕