ព័ត៌មានជាតិ

ផ្លូវជង្ហុកប្រវែងជាង ៦០ ម៉ែត្រ នៅខណ្ឌដូនពេញ បង្កគ្រោះដល់អ្នកដំណើរ

បានផុស

២ years មុន

នៅ

ថ្ងៃអង្គារ ១៥ តុលា ២០២៤

ដោយ

ប្រជាពលរដ្ឋស្នើសុំអាជ្ញាធរជួសជុលកំណាត់ផ្លូវលេខ ៥១ ដែលរងការខូចខាតជាច្រើនកន្លែង ធ្វើឲ្យប៉ះពាល់ដល់ការធ្វើដំណើររបស់ពួកគាត់នៅក្នុងរដូវភ្លៀងធ្លាក់ ហើយមកដល់ពេលនេះមិនទាន់ជួសជុលឡើងវិញទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកំណាត់ផ្លូវលេខ ៥១ ចាប់ពីផ្លូវលេខ ១០៨ ដល់អង្គដួង ដែលកំពុងបង្កផលប៉ះពាល់លើអ្នកដំណើរនេះ មានប្រវែងជាង ៦០ ម៉ែត្រ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

លោក មុនី្ន ជាប្រជាពលរដ្ឋរស់នៅលើផ្លូវខាងលើនោះបានឲ្យដឹងថា ផ្លូវលេខ ៥១ នេះ មិនមែនទើបតែខូចនោះទេ គឺខូចជាយូរណាស់មកហើយ តែមិនដែលឃើញខាងអាជ្ញាធរមកជួសជុល ឬ ស្ថាបនាទាល់តែសោះ ធ្វើឲ្យប្រជាពលរដ្ឋជួបការលំបាកខ្លាំងពេលធ្វើដំណើរ។

លោក មុនី្ន បន្តថា ពេលមានភ្លៀង និង ទឹកដក់នៅពេលភ្លៀងធ្លាក់ម្តងៗ គឺទឹកក្នុងជង្ហុក អ្នកដំណើរមើលមិនឃើញ ជិះធ្លាក់ជង្ហុកដួលម្តងៗ ទៅហើយ ពិបាកធ្វើដំណើរណាស់។

ដោយឡែក លោក សីហា ដែលជាអ្នកធ្វើដំណើរតាមផ្លូវខាងលើនោះ ក៏បានបញ្ជាក់ដែរថា ពេលលោកធ្វើដំណើរម្ដងៗ តែងជួបផលពិបាកដូចជា មើលជង្ហុកមិនឃើញពេលមានភ្លៀងធ្លាក់ ដែលបញ្ហានេះ ប្រជាពលរដ្ឋ ក៏បានសំណូមពរដល់អាជ្ញាធរជួយរកដំណោះស្រាយក្នុងការជួសជុល ឬ ពន្លឿនការជួសជុលកំណាត់ផ្លូវកំពុងរងខូចខាតមួយនេះផងដែរ ដោយសារតែអាចបង្កគ្រោះ ជាយថាហេតុណាមួយ។

បើតាមការបញ្ជាក់ពី លោក នី សាមិត្ត ប្រធានការិយាល័យសាធារណការខណ្ឌដូនពេញ បានឲ្យដឹងថា ចំពោះផ្លូវជង្ហុកមួយខ្សែខាងលើនេះ លោកអភិបាលខណ្ឌ បានដាក់គម្រោងក្នុងការជួលជុលរួចហើយ ប៉ុន្តែរង់ចាំដល់ភ្លៀងលែងធ្លាក់ ឲ្យផ្លូវស្ងួតល្អ ទើបធ្វើការជួសជុលជាប់ល្អ និងប្រើប្រាស់បានយូរអង្វែង។

លោកក៏បានបញ្ជាក់បន្ថែមថា អាជ្ញាធរក៏សូមអធ្យាស្រ័យពីប្រជាពលរដ្ឋក្នុងការយឺតយ៉ាវជួសជុលស្ថាបនាផ្លូវលេខ ៥១ នេះ ឡើងវិញផង។ លោកនឹងដោះស្រាយលើបញ្ហានេះឲ្យបានឆាប់រហ័ស៕

អត្ថបទ ៖ ម៉េង