ច្នៃលក់កាហ្វេតាមរថយន្តប៊ើស ទទួលការគាំទ្រខ្លាំង នៅក្រុងសែនមនោរម្យ ខេត្តមណ្ឌលគិរី

កាហ្វេតាមរថយន្តប៊ើស កំពុងទទួលបានការចាប់អារម្មណ៍ខ្លាំង នៅក្រុងសែនមនោរម្យ ខេត្តមណ្ឌលគិរី។ គំនិតច្នៃប្រឌិត លក់កាហ្វេតាមរថយន្តនេះ បានលេចចេញជារូបរាង កាលពីខែតុលា ឆ្នាំ២០២៤ កន្លងទៅ នៅតាមតំបន់ទេសចរណ៍សំខាន់ៗក្នុងទីរួមខេត្តមណ្ឌលគិរី ដូចជានៅលើភ្នំដោះក្រមុំជាដើម។

យុវជន សុខ ជា អាយុ២៣ឆ្នាំ ជាបុគ្គលិកផ្នែកលក់ បានប្រាប់កម្ពុជាថ្មីថា រថយន្តកាហ្វេនេះ បច្ចុប្បន្នមាន ៣សាខា ហើយក៏គ្រោងបើកសាខាទី ៤ នៅរមណីយដ្ឋានធម្មជាតិទឹកជ្រោះប៊ូស្រាផងដែរ។ យុវជនដដែល បញ្ជាក់ថា ជាទូទៅ ពេលព្រឹក និងពេលល្ងាច ជាពេលដែលមានភ្ញៀវគាំទ្រខ្លាំង ដោយសារតែក្រៅពីក្រេបរសជាតិកាហ្វេ គេក៏អាចគយគន់ទិដ្ឋភាពថ្ងៃរះ និងថ្ងៃលិច ដ៏ស្រស់ស្អាតបានផងដែរ។

កញ្ញា ស្រី ជីង ជាអតិថិជនប្រចាំកាហ្វេរថយន្តប៊ើស បានសរសើរថា គំនិតច្នៃប្រឌិតរបស់ម្ចាស់អាជីវកម្មកាហ្វេរថយន្ត មិនត្រឹមតែទាក់ទាញអ្នកគាំទ្រក្នុងខេត្តប៉ុណ្ណោះទេ ប៉ុន្តែក៏ទាក់ចិត្តទេសចរពីតំបន់ផ្សេងៗបានផងដែរ ទាំងភ្ញៀវជាយុវជនក្មេងៗ រហូតដល់វ័យចំណាស់ មិនចាញ់ហាងកាហ្វេល្បីៗនោះទេ៕

អត្ថបទ៖ រៀម សុខហេង