ព័ត៌មានអន្ដរជាតិ

លោក គីម ជុងអ៊ុន បញ្ជាឲ្យផលិតយន្តហោះដ្រូន ទ្រង់ទ្រាយធំ ត្រៀមបញ្ចូលក្នុងផ្នែកយោធា

បានផុស

២ years មុន

នៅ

ថ្ងៃសៅរ៍ ១៦ វិច្ឆិកា ២០២៤

ដោយ

ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃសុក្រទី១៥ ថា មេដឹកនាំកូរ៉េខាងជើងលោក គីម ជុងអ៊ុន បានត្រួតពិនិត្យលើការសាកល្បងលើយន្តហោះដ្រូន kamikaze ដែលផលិតក្នុងស្រុក។ ប្រទេសនេះចាំបាច់ត្រូវតែផ្លាស់ប្តូរពីគំរូ ទៅផលិតកម្មពេញលេញ ដើម្បីអាចបញ្ចូលការប្រើប្រាស់យន្តហោះគ្មានមនុស្សបើក ក្នុងទ្រង់ទ្រាយធំទៅក្នុងគោលលទ្ធិយោធារបស់ខ្លួន។

ទីភ្នាក់ងារសារព័ត៌មាន KCNA បានបោះពុម្ពរូបថតដែលបង្ហាញពីលោកគីម ជុងអ៊ុន និងមន្ត្រីជាន់ខ្ពស់ពីររូបផ្សេងទៀតដែលកំពុងសង្កេតមើលអ្វីដែលខ្លួនអះអាងថា ជាការដាក់ពង្រាយយន្តហោះគ្មានមនុស្សបើកជាច្រើន ដែលរូបភាពទាំងនោះស្ថិតនៅក្នុងសភាពព្រិលៗតែប៉ុណ្ណោះ។

របាយការណ៍ដដែលបានគូសបញ្ចាក់ទៀតថា គំរូដែលបានសាកល្បងកាលពីថ្ងៃព្រហស្បតិ៍ បានបង្កើតឡើងដោយកន្លែងស្រាវជ្រាវមួយ ដែលមានទំនាក់ទំនងជាមួយនឹងបរិវេណបច្ចេកវិទ្យាគ្មានមនុស្សបើករបស់កូរ៉េខាងជើង (UATC)។ រូបថតក៏បានបង្ហាញការវាយប្រហារលើគោលដៅផ្សេងៗ រួមទាំងរថក្រោះដែលត្រូវបានបុកនៅមុំចោតពីខាងលើផងដែរ។

KCNA ក៏បានអះអាងជាចុងក្រោយដែរថា យន្តហោះគ្មានមនុស្សបើករបស់កូរ៉េខាងជើង ត្រូវបានរចនាឡើងសម្រាប់សង្គ្រាមជើងគោក និងកងទ័ពជើងទឹក មានជួរខុសៗគ្នា និងប្រើប្រាស់ទម្រង់មួយចំនួន បន្ទាប់ពីឈានដល់ទីបញ្ចប់ដែលអាចកំណត់បានរបស់ពួកគេ៕