យប់មិញ ក្រសួងប្រៃសណីយ៍ និងទូរគមនាគមន៍ ប្រកាស​​ជយលាភី “ពានរង្វាន់ឌីជីថលកម្ពុជាឆ្នាំ២០២៤”

នៅយប់​ថ្ងៃទី២៩ ខែវិច្ឆិកា ឆ្នាំ២០២៤ ក្រសួងប្រៃសណីយ៍ និងទូរគមនាគមន៍ បានរៀបចំពីធីប្រកាសជយលាភី “ពានរង្វាន់​ឌីជីថលកម្ពុជាឆ្នាំ២០២៤” ក្រោម​វត្តមាន​លោក ជា វ៉ាន់ដេត រដ្ឋមន្ត្រីក្រសួងប្រៃសណីយន៍ និងទូរគមនាគមន៍ និងថ្នាក់ដឹកនាំក្រោមឱវាទក្រសួងប្រៃសណីយ៍និងទូរគមនាគមន៍ (ក.ប.ទ.) បណ្ឌិត្យសភាបច្ចេកវិទ្យាឌីជីថលកម្ពុជា ក្រសួងស្ថាប័ន ក្រុមហ៊ុនឯកជន ធុរកិច្ចថ្មីឌីជីថល សហគ្រិន និងអ្នកជំនាញបច្ចេកវិទ្យាជាច្រើនរូបទៀត។

កម្មវិធីប្រកួតប្រជែងពានរង្វាន់​ឌីជីថលកម្ពុជាបែងចែក​ជា ៥ ប្រភេទពាន​រង្វាន់​ដែល​រួម​មាន៖ ពាន​រង្វាន់​ស្ថាប័នឯកជន​ល្អបំផុតប្រចាំឆ្នាំ (Private Sector of the year) ពាន​រង្វាន់​បរិយាបន្នឌីជីថល ល្អបំផុតប្រចាំឆ្នាំ (Best Digital Inclusion of the year) ពាន​រង្វាន់ មាតិកាឌីជីថល ល្អបំផុតប្រចាំឆ្នាំ (Best Digital Content of the year) ពាន​រង្វាន់​រដ្ឋមន្ត្រី​សម្រាប់​ធុរកិច្ចថ្មីឌីជីថល ល្អបំផុត​ប្រចាំឆ្នាំ (Minister Startup of the year) ពាន​រង្វាន់ការស្រាវជ្រាវ និង​នវានុវត្តន៍​ឌីជីថល​ល្អបំផុតប្រចាំឆ្នាំ (Best Digital Research and Innovation of the year) រួមទាំង​ពាន​រង្វាន់​ពិសេស​សម្រាប់​ស្រ្តី​ឆ្នើម​បច្ចេកវិទ្យា​ប្រចាំឆ្នាំ (Women in Tech of the Year)។

ក្រោយ​ជម្រុះជា​បន្តបន្ទាប់ បេក្ខភាព​ជាប់ជា​​ជយលាភី​ទាំង ៥ ប្រភេទដែលប្រកាស​ឈ្នះ​ពានរង្វាន់​ឌីជីថលកម្ពុជា​ឆ្នាំ ២០២៤ រួម​ទាំង​ពាន​រង្វាន់​ពិសេសសម្រាប់ស្ត្រីឆ្នើមបច្ចេកវិទ្យាប្រចាំឆ្នាំ ២០២៤ រួម​មាន៖

១. ស្ថាប័នឯកជនល្អបំផុតប្រចាំឆ្នាំ (Private Sector of the Year) ជាមួយនឹងប្រាក់រង្វាន់ចំនួន 2,500 ដុល្លារអាម៉េរិក ត្រូវបានផ្តល់ជូនក្រុមហ៊ុន Wing Inter Logistics Technologies Co., Ltd សម្រាប់ផលិតផល Wingagri
២. បរិយាបន្នឌីជីថលល្អបំផុតប្រចាំឆ្នាំ (Best Digital Inclusion of the Year) ជាមួយនឹងប្រាក់រង្វាន់ចំនួន 2,500 ដុល្លារអាម៉េរិក ត្រូវបានផ្តល់ជូនក្រុមហ៊ុន Solar Green Energy (Cambodia) Co., Ltd សម្រាប់ផលិតផល Solar Smart Irrigation System, Solar Irrigation Station
៣. មាតិកាឌីជីថលល្អបំផុតប្រចាំឆ្នាំ (Best Digital Content of the Year) ជាមួយនឹងប្រាក់រង្វាន់ចំនួន 2,500 ដុល្លារអាម៉េរិក ត្រូវបានផ្តល់ជូនក្រុមហ៊ុន 606 Digital សម្រាប់ផលិតផល Sampi TV
៤. ពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលល្អបំផុតប្រចាំឆ្នាំ (Minister Startup of the Year) ជាមួយនឹងប្រាក់រង្វាន់ចំនួន 15,000 ដុល្លារអាម៉េរិក ត្រូវបានផ្តល់ជូនក្រុមហ៊ុន Jalat Logistics សម្រាប់ផលិតផល Jalat Logistics
៥. ការស្រាវជ្រាវនិងនវានុវត្តន៍ឌីជីថលល្អបំផុតប្រចាំឆ្នាំ (Best Digital Research and Innovation of the Year) ជាមួយនឹងប្រាក់រង្វាន់ចំនួន 7,500 ដុល្លារអាម៉េរិក ត្រូវបានផ្តល់ជូនបណ្ឌិត្យសភាបច្ចេកវិទ្យាឌីជីថលកម្ពុជា សម្រាប់ផលិតផល Machine Translation for Khmer Braille
៦. ពានរង្វាន់កិត្តិយសស្រ្តីឆ្នើមបច្ចេកវិទ្យាប្រចាំឆ្នាំ (Women in Tech of the Year) ត្រូវបានផ្តល់ជូន លោកស្រី រស់ ពេជ្រហេមី មកពីក្រុមហ៊ុនមេនូឡាយហ្វ៍ ខេមបូឌា

ក្រោមប្រធានបទ “គាំទ្រដល់ពលរដ្ឋកម្ពុជាក្នុងការប្រើប្រាស់បច្ចេកវិទ្យាឌីជីថលដើម្បីអនាគតកាន់តែល្អ” កម្មវិធីពានរង្វាន់​ឌីជីថលកម្ពុជាឆ្នាំ ២០២៤ ​រៀបចំ​ឡើងក្នុងគោលបំណងជំរុញការធ្វើបរិវត្តកម្មឌីជីថលប្រកបដោយបរិយាបន្ន ដោយលើកកម្ពស់ការប្រើប្រាស់បច្ចេកវិទ្យានិងនវានុវត្តន៍ឌីជីថលនៅកម្ពុជា តាមរយៈការផ្តល់ពានរង្វាន់ដល់ក្រសួងស្ថាប័ន ក្រុមហ៊ុនឯកជន និងសហគ្រិន។

ថ្លែងក្នុង​ពិធី​ប្រគល់​ពាន​រង្វាន់​ដល់​ជយលាភីពានរង្វាន់​ឌីជីថលកម្ពុជា ឆ្នាំ ២០២៤ លោក ជា វ៉ាន់ដេត រដ្ឋមន្ត្រីក្រសួងប្រៃសណីយន៍ និងទូរគមនាគមន៍ បានថ្លែងកោតសរសើរដល់ភាគីពាក់ព័ន្ធ ដែលបានខិតខំប្រឹងសហការយ៉ាងជិតស្និទ្ធក្នុងការជួយជ្រោមជ្រែងឱ្យសម្រេចបានជោគជ័យក្នុងការរៀបចំកម្មវិធីនេះ ជាពិសេសថ្នាក់ដឹកនាំនិងអង្គភាពក្រោមឱវាទរបស់ ក.ប.ទ. ក្រុមហ៊ុនឧបត្ថម្ភកម្មវិធី ក្រុមការងាររៀបចំកម្មវិធី ព្រមទាំងភាគីពាក់ព័ន្ធជាច្រើនទៀត។

ក្រៅពីប្រគល់ពានរង្វាន់ឌីជីថលកម្ពុជាឆ្នាំ២០២៤ ព្រមទាំងលិខិតសរសើរ លោក​រដ្ឋមន្ត្រីក៏​ចូលរួមអបអរសាទរក្រុម​​ជយលាភីទាំង ៥ ដែលត្រូវបានជ្រើសរើសក្នុងចំណោមក្រុមដាក់ពាក្យចូលរួម​សរុបចំនួន ៦៤ ក្រុមហ៊ុន និងពានរង្វាន់​កិត្តិយសស្រ្តីឆ្នើមបច្ចេកវិទ្យាប្រចាំឆ្នាំដល់បេក្ខនារីចំនួន ១ រូប៕