សន្តិសុខសង្គម

បាត់ពីផ្ទះ ០៩ ថ្ងៃ មកប្រទះឃើញសពហើមស្អុយក្បែរចិញ្ចើមផ្លូវបេតុង នៅសង្កាត់បាក់ខែង

បានផុស

២ years មុន

នៅ

ថ្ងៃអង្គារ ៣ ធ្នូ ២០២៤

ដោយ

បុរសវ័យចំណាស់ម្នាក់ សតិមិនប្រក្រតី ដើរវង្វេងបាត់ពីផ្ទះម្ដុំត្រឡោកបែក ចំនួន ០៩ ថ្ងៃ បែរជាមករកឃើញនៅពេលសពហើមស្អុយក្បែរអូ នៅសង្កាត់បាក់ខែង ទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ០៨ ព្រឹក ថ្ងៃទី ០៣ ខែធ្នូ ឆ្នាំ ២០២៤ នៅក្នុងអូរក្បែរចិញ្ចឹមផ្លូវបេតុង ចម្ងាយប្រមាណជាង ០២ គីឡូម៉ែត្រ ពីផ្លូវជាតិលេខ ០៦ អា ភូមិក្តីចាស់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។

សពបុរសរងគ្រោះមានឈ្មោះ ឈិត វណ្ណា អាយុប្រមាណជាង ៥០ ឆ្នាំ ជាមនុស្សសតិមិនប្រក្រតី ស្នាក់នៅភូមិសេប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

ប្រភពព័ត៌មានពីប្រជាពលរដ្ឋបានឲ្យដឹងថា នៅវេលាព្រឹកថ្ងៃកើតហេតុមានប្រជាពលរដ្ឋម្នាក់ ដែលធ្វើដំណើរឆ្លងកាត់ ហើយឈប់បត់ជើង ក៏បានប្រទះឃើញសាកសពមនុស្សម្នាក់មានលក្ខណៈហើមស្អុយដេកស្លាប់ក្នុងព្រៃអូរ។ ភ្លាមៗ អ្នកឃើញហេតុការណ៍ បានរាយការណ៍ទៅសមត្ថកិច្ចមូលដ្ឋាន បង្កឲ្យមានការភ្ញាក់ផ្អើលតែម្ដង។ បន្ទាប់ពីភ្ញាក់ផ្អើល ក៏ដឹងដល់ក្រុមគ្រួសារ ក្មួយៗ ចុះទៅកន្លែងកើតហេតុ ដោយអះអាងថា សពជាអ៊ំរបស់ខ្លួនដែលបានបាត់ខ្លួនរយៈពេល ០៩ ថ្ងៃ មកហើយ។

បើតាមប្រភពពីសាច់ញាតិជនរងគ្រោះបានបញ្ជាក់ថា អ៊ំរបស់ខ្លួនបានចេញពីផ្ទះតាំងពីវេលាម៉ោង ០៨ ព្រឹក ថ្ងៃទី ២៤ ខែវិច្ឆិកា ឆ្នាំ ២០២៤ ដើម្បីដើរហាត់ប្រាណដូចសព្វដង ហើយក៏បាត់ខ្លួនមិនឃើញមកផ្ទះ។ ដោយឡែកនៅថ្ងៃកើតហេតុជនរងគ្រោះបានដើរហាត់ប្រាណបាត់រហូតដល់ចំនួន ០៩ ថ្ងៃ ទើបរកឃើញសពនៅសង្កាត់បាក់ខែង។

ក្រោយកើតហេតុ សមត្ថកិច្ចជំនាញចក្ខុ និងកោសល្យវិច័យ នៃស្នងការដ្ឋាននគរបាលរាជធានីភ្នំពេញ បានធ្វើការត្រួតពិនិត្យរកឃើញថា សពស្លាប់ដោយសារគាំងបេះដូង ទើបបណ្ដាលឲ្យដួលធ្លាក់ចូលអូរស្លាប់តែម្ដង៕

អត្ថបទ ៖ រដ្ឋា