ព័ត៌មានអន្ដរជាតិ

នាយករដ្ឋមន្ត្រីចិនប្តេជ្ញា «ធ្វើគ្រប់យ៉ាង» ដើម្បីជំរុញតម្រូវការក្នុងស្រុក ចំពេលសេដ្ឋកិច្ចយឺតយ៉ាវ

បានផុស

១ year មុន

នៅ

ថ្ងៃអង្គារ ១០ ធ្នូ ២០២៤

ដោយ

នាយករដ្ឋមន្ត្រីចិន លោក លី ឈាំង បានសន្យាថា រដ្ឋាភិបាលចិននឹងធ្វើអ្វីគ្រប់យ៉ាងតាមដែលអាចធ្វើទៅបាន ដើម្បីជំរុញការប្រើប្រាស់ក្នុងស្រុក ក្នុងកិច្ចខិតខំប្រឹងប្រែងដើម្បីពង្រឹងកំណើនសេដ្ឋកិច្ចរបស់ប្រទេស ដែលកំពុងស្រពិចស្រពិល។ នេះបើតាមការស្រង់សម្ដីផ្សាយរបស់សារព័ត៌មាន Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសចិននឹងពង្រឹង និងបង្កើនការអនុវត្តគោលនយោបាយម៉ាក្រូសេដ្ឋកិច្ច ដើម្បីពង្រឹងសេដ្ឋកិច្ច។ លោក លី បានថ្លែងបែបនេះ កាលពីថ្ងៃចន្ទ ក្នុងអំឡុងកិច្ចប្រជុំនៅក្រុងប៉េកាំងជាមួយប្រធានអង្គការសេដ្ឋកិច្ចអន្តរជាតិចំនួន ១០ រួមទាំងមូលនិធិរូបិយវត្ថុអន្តរជាតិ (IMF) និងធនាគារពិភពលោក។

ការប្ដេជ្ញារបស់លោក លី ធ្វើឡើងចំពេលដែលចិនជួបប្រទះនឹងភាពមិននឹងននៃសេដ្ឋកិច្ច ដោយសារតែកម្សោយនៃតម្រូវការក្នុងស្រុក និងបរិត្តផរណា ដែលធ្វើឱ្យប្រទេសនេះត្រូវពឹងផ្អែកខ្លាំងលើការនាំចេញដើម្បីជំរុញកំណើន។ យ៉ាងណាមិញ វិស័យនាំចេញរំពឹងថានឹងរងហានិភ័យកាន់តែខ្លាំង នៅពេលប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ គំរាមដាក់ពន្ធនាំចូល ១០ ភាគរយ ភ្លាមៗ លើទំនិញចិនគ្រប់មុខ។

លោក Liao Min អនុរដ្ឋមន្ត្រីហិរញ្ញវត្ថុរបស់ប្រទេសចិន បានប្រាប់សន្និសីទសារព័ត៌មានកាលពីថ្ងៃចន្ទថា ប្រមុខនៃអង្គការអន្តរជាតិបានសម្តែងការព្រួយបារម្ភថា ការកាត់ផ្តាច់គ្នានឹងធ្វើឱ្យខូចសេដ្ឋកិច្ចពិភពលោក។ ទោះជាយ៉ាងណាក៏ដោយ មានការទទួលស្គាល់ថា សេដ្ឋកិច្ចរបស់ចិនបានធ្លាក់ចុះ ប៉ុន្តែមានឱកាសជាច្រើនដើម្បីដោះស្រាយរាល់ការព្រួយបារម្ភ តាមរយៈគោលនយោបាយម៉ាក្រូសេដ្ឋកិច្ច។

គួរគូសបញ្ជាក់ថា មេដឹកនាំកំពូលៗចិន បានបង្ហាញពីការគាំទ្រលើការចេញវិធានការជំរុញសេដ្ឋកិច្ចសំខាន់ៗនៅឆ្នាំក្រោយ តាមរយៈការប្រើប្រាស់ភាសាសេដ្ឋកិច្ច ដែលមិនធ្លាប់ប្រើអស់រយៈពេលជាង១ទសវត្សរ៍មកហើយ។ ការិយាល័យនយោបាយ ដឹកនាំដោយលោកប្រធានាធិបតី ស៊ី ជិនពីង បាននិយាយកាលពីថ្ងៃចន្ទថា ខ្លួននឹងទទួលយកយុទ្ធសាស្រ្ត «ធូរល្មម» សម្រាប់គោលនយោបាយរូបិយវត្ថុនៅឆ្នាំក្រោយ ខណៈប្តេជ្ញាថានឹង «សកម្មជាងមុន» ជាមួយនឹងគោលនយោបាយសារពើពន្ធ។ ក្រៅពីនេះ ការិយាល័យនយោបាយក៏បានសន្យាផងដែរ លើការជំរុញការប្រើប្រាស់ ធ្វើឱ្យមានស្ថេរភាពលើអចលនទ្រព្យ និងទីផ្សារភាគហ៊ុន៕