ព័ត៌មានអន្ដរជាតិ

លោក ត្រាំ និយាយជួស លោក ស៊ី ជុំវិញការបើកច្រក Hormuz មុនជំនួបកំពូលពួកគេ

បានផុស

៥ ថ្ងៃ មុន

នៅ

ថ្ងៃសៅរ៍ ១៨ មេសា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានលើកឡើងទាំងអារម្មណ៍រំភើបរីករាយកាលពីថ្ងៃសុក្រ ថា សមភាគីចិនរបស់លោក គឺប្រធានាធិបតី លោក ស៊ី ជីនពីង (Xi Jinping) មានសេចក្តីរីករាយយ៉ាងខ្លាំង ចំពោះការបើកច្រកសមុទ្រហ័រមូស (Hormuz) ឡើងវិញ ទោះបីជាអ៊ីរ៉ង់ បញ្ជាក់ថា ការធ្វើនាវាចរណ៍ផ្លូវទឹកយុទ្ធសាស្ត្រនេះនឹងត្រូវគ្រប់គ្រងយ៉ាងតឹងរ៉ឹងដោយទីក្រុងតេហេរ៉ង់។ នេះបើយោងតាមភ្នាក់ងារសារព័ត៌មានរ៉យទ័រផ្សាយថ្ងៃទី១៨ ខែមេសា ឆ្នាំ២០២៦ ។

លោក ត្រាំ ថ្លែងបែបនេះលើបណ្តាញសង្គម Truth Social ដោយបន្ថែមថា លោកក៏ទន្ទឹងរង់ចាំកិច្ចប្រជុំជាមួយប្រធានាធិបតីចិនដែលកំណត់ពេលឡើងវិញនាពាក់កណ្តាលខែឧសភាខាងមុខ ដោយសារតែសង្គ្រាមនៅអ៊ីរ៉ង់។ ដំណើរទស្សនកិច្ចរបស់ លោក ដូណាល់ ត្រាំ ទៅកាន់ប្រទេសចិនដែលត្រូវបានគ្រោងទុកលើកមុនគឺនៅដើមខែមេសា។

**លោក ដូណាល់ ត្រាំ និង លោក ស៊ី ជីនពីង។ រូបភាព៖ Reuters**

លោកត្រាំ សរសេរនៅលើបណ្តាញ Truth Social ថា៖ « លោកប្រធានាធិបតី ស៊ី មានសេចក្តីសោមនស្សរីករាយយ៉ាងខ្លាំងដែលច្រកសមុទ្រហ័រមូសបើកឡើងវិញ និងបើកយ៉ាងឆាប់រហ័សទៀតផង។ កិច្ចប្រជុំរបស់យើងក្នុងប្រទេសចិននឹងក្លាយជាកិច្ចប្រជុំពិសេសមួយដែលមានសក្តានុពល និងជាប្រវត្តិសាស្ត្រ។ ខ្ញុំទន្ទឹងរង់ចាំចួបជាមួយលោកប្រធានាធិបតី ស៊ី។ អ្វីៗនឹងសម្រេចបានច្រើន!»។

ការបង្ហោះរបស់ លោក ត្រាំ កើតឡើង បន្ទាប់ពីប្រធានសភាអ៊ីរ៉ង់ លោក Mohammad Bagher Ghalibaf បានរិះគន់ ប្រធានាធិបតីអាមេរិករូបនេះដែលលើកឡើងថា ការបិទផ្លូវរបស់សហរដ្ឋអាមេរិកលើកំពង់ផែនៃសាធារណរដ្ឋអ៊ីស្លាមអ៊ីរ៉ង់ នឹងបន្តរហូតដល់កិច្ចព្រមព្រៀងពេញលេញជាមួយអ៊ីរ៉ង់ត្រូវបានបញ្ចប់ទាំងស្រុង។

ដោយឡែកនៅក្នុងសារមួយរបស់ លោក Ghalibaf អះអាងថា ការធ្វើនាវាចរណ៍ផ្លូវសមុទ្រឆ្លងកាត់ច្រកសមុទ្រហ័រមូសនឹងត្រូវគ្រប់គ្រងយ៉ាងតឹងរ៉ឹងដោយទីក្រុងតេហេរ៉ង់។ ចំណែក ការឆ្លងកាត់នានានឹងត្រូវអនុញ្ញាតទៅតាមផ្លូវដែលបានកំណត់ និងក្រោមការយល់ព្រមពីអ៊ីរ៉ង់ប៉ុណ្ណោះ៕

ប្រែសម្រួល៖ ណឺ មិនា