​ព្រែកជីកហ្វូណនតេជោ តម្លៃ ១ ៧០០ លាន​ដុល្លារ ឈាន​ចាប់ផ្តើម​ដោះស្រាយ​ផល​ប៉ះពាល់​

គម្រោងសាងសង់​ព្រែកជីកហ្វូណនតេជោ បាន​ចាប់ផ្តើម​ឈានទៅ​ដោះស្រាយ​ផល​ប៉ះពាល់​ បន្ទាប់ពីបើក​ការដ្ឋាន​សាងសង់​បាន​ជិត​​មួយ​ឆ្នាំ។

តាម​រយៈកិច្ចប្រជុំ​មួយ​កាលពី​ម្សិលមិញនេះ ​ដឹកនាំ​ដោយ លោក ​ស្តើង សុខុម រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងក៏​មានការ​ចូលរួមពី​​លោក គួច ចំរើន អភិបាល​នៃ​គណៈអភិបាលខេត្តកណ្តាល និង​មន្រ្តី​ពាក់ព័ន្ធ​បានពិភាក្សា​ពី​​ផល​ប៉ះពាល់​លើ​ការដ្ឋាន​សាងសង់​​នៅ​កំណាត់ទី១ ដែលស្ថិតនៅក្នុងភូមិសាស្រ្តខេត្តកណ្ដាល។

បើតាម​មន្រ្តី​ចូលរួមកិច្ច​ប្រជុំ​បាន​គូស​បញ្ជាក់​ថា អគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ នឹងចុះផ្ទាល់​​ជាមួយអាជ្ញាធរមូលដ្ឋាន និងប្រជាពលរដ្ឋ ដើម្បីពន្យល់លម្អិតនិងពិនិត្យរួមគ្នាលើផលប៉ះពាល់។ រីឯការដោះស្រាយ​ផលប៉ះពាល់ នឹងត្រូវចាប់ផ្តើមពីសប្តាហ៍ទី២ នៃខែកុម្ភៈ ឆ្នាំ​២០២៥។

គម្រោងសាងសង់​ព្រែកជីកហ្វូណនតេជោ កំពុងស្ថិតក្នុងដំណាក់វាស់វែងនិងបោះបង្គោលកំណត់និយាមការ​ដំណាក់កាលទី២ ដែលមានប្រវែងជាង ១៥០ គីឡូម៉ែត្រ បន្ទាប់ពីបានបញ្ចប់ការវាស់វែង និងបោះបង្គោលកំណត់និយាមការដំណាក់កាល​ទី១​។

សំណង់ព្រែកជីកហ្វូណនតេជោចែកចេញជាពីរផ្នែកគឺ ផ្នែកទី១ ចាប់ពី «ព្រែកតាកែវ-ព្រែកពោធិ៍» មានចម្ងាយ ២១ គីឡូម៉ែត្រ និងផ្នែកទី២ ចាប់ពី «ទន្លេបាសាក់ត្រង់ចំណុចព្រែកពោធិ៍-សមុទ្រខេត្តកែប» មានចម្ងាយ ១៥៩​ គីឡូម៉ែត្រ។

​ព្រែកជីកប្រវត្តិ​សាស្រ្តនេះ​ បាន​បើក​ការដ្ឋាន​សាងសង់​​កាលពី​ថ្ងៃទី ៥ សីហា ឆ្នាំ​២០២៤ ដែល​គ្រោង​ចំណាយ​ទុន​វិនិយោគ​ ១ ៧០០ លានដុល្លារ និងប្រើប្រាស់រយៈពេលសាងសង់ប្រមាណ ៤ ឆ្នាំ ពោល​គ្រោង​បញ្ចប់នៅឆ្នាំ២០២៨។

ការ​ជីក​ព្រែកនេះធ្វើ​នៅ​លើតម្រាយខ្សែផ្លូវទឹកធម្មជាតិ និងផ្លូវទឹកបុរាណ ដែលបាន​បន្សល់ទុកតាំងពីសម័យអាណាចក្រ​ហ្វូណន​​។ តម្រាយផ្លូវ​ទឹកធម្មជាតិដែលមានស្រាប់មានប្រវែងប្រមាណ ១៣៥ គីឡូម៉ែត្រ ខណៈ​ផ្លូវទឹកត្រូវជីកតម្រង់កុំ​ឱ្យ កោងពេកមានប្រវែងជាង ៣៨ គីឡូម៉ែត្រ និងផ្លូវទឹកជីកថ្មីមានប្រវែងជាង ៧ គីឡូម៉ែត្រ ដើម្បីកាត់បន្ថយកំណោងនិងកាត់​​បន្ថយចម្ងាយតភ្ជាប់ទៅកាន់សមុទ្រ។

នៅពេលបញ្ចប់​ការ​សាងសង់ ព្រែកជីកប្រវត្តិសាស្ត្ររបស់​កម្ពុជា​ នឹងផ្តល់ផលប្រយោជន៍ដ៏ធំមហិមាសម្រាប់កា​រជំរុញ​ការ​ដឹកជញ្ជូន និងការ​​អភិវឌ្ឍ​សេដ្ឋកិច្ច​កម្ពុជា៕