ព័ត៌មានអន្ដរជាតិ

ត្រាំ និង ពូទីន យល់ព្រមបំពេញទស្សនកិច្ចប្រទេសគ្នា ទៅវិញទៅមក

បានផុស

១ year មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

ក្រោយជំនួបតាមទូរស័ព្ទដ៏មានសារៈសំខាន់រវាងប្រធានាធិបតីអាមេរិក ដូណាល់ ត្រាំ និងមេដឹកនាំរុស្ស៊ី វ្ល៉ាឌីមៀរ ពូទីន, អ្នកនាំពាក្យវិមានក្រឹមឡាំង Dmitry Peskov បញ្ជាក់ថា លោកពូទីន បានយល់ព្រមធ្វើដំណើរទស្សនកិច្ចនៅសហរដ្ឋអាមេរិក ចំណែកឯអ្នកនាំពាក្យលោក ត្រាំ ក៏បញ្ជាក់ដែរថា ប្រមុខសេតវិមានក៏យល់ព្រម ធ្វើទស្សនកិច្ចប្រទេសរុស្ស៊ី ដូចគ្នា។

លោក ត្រាំ និងពូទីន ចាប់ដៃគ្នា (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Reuters បានដកស្រង់សម្តីលោក Peskov ដែលនិយាយថា «ប្រធានាធិបតីរុស្ស៊ី បានអញ្ជើញប្រធានាធិបតីសហរដ្ឋអាមេរិកឲ្យទៅបំពេញទស្សនកិច្ចនៅទីក្រុងមូស្គូ ហើយបង្ហាញពីការត្រៀមខ្លួនស្វាគមន៍មន្ត្រីអាមេរិកនៅក្នុងវិស័យដែលមានផលប្រយោជន៍ឲ្យគ្នាទៅវិញទៅមក រួមទាំងលើប្រធានបទនៃការតាំងទីលំនៅរបស់ជនជាតិអ៊ុយក្រែនផងដែរ។ មិនត្រឹមប៉ុណ្ណឹង លោកពូទីន និង លោកត្រាំ ក៏ឯកភាពបន្តទំនាក់ទំនងផ្ទាល់ខ្លួន រួមទាំងការរៀបចំកិច្ចប្រជុំទល់មុខគ្នាថែមទៀតផង»។

លោក ពូទីន បានជាន់ដីអាមេរិកលើកចុងក្រោយបំផុតគឺក្នុងខែកញ្ញាឆ្នាំ២០១៥ នៅពេលលោកជួបអតីតប្រធានាធិបតីអាមេរិក បារ៉ាក់ អូបាម៉ា អំឡុងមហាសន្និបាតអង្គការសហប្រជាជាតិនៅ ញូវយ៉ក។ ចំណែក ត្រាំ វិញ, លោកមិនដែលធ្វើទស្សនកិច្ចរុស្ស៊ីទេក្នុងនាមជាប្រធានាធិបតីអាមេរិក ប៉ុន្តែលោកធ្លាប់ទៅមូស្គូ ក្នុងនាមជាអ្នកជំនួញ ដោយដំណើរលើកចុងក្រោយបំផុតគឺកាលពីឆ្នាំ១៩៩៦។

លោក ត្រាំ (ឆ្វេង) និងលោក ពូទីន (រូបថត៖ Getty)

សូមជម្រាបថា ជំនួបតាមទូរស័ព្ទរយៈពេលជិតមួយម៉ោងកន្លះនេះ គឺជាទំនាក់ទំនងដោយផ្ទាល់រវាងលោក ពូទីននិងប្រធានាធិបតីអាមេរិកមួយរូប ចាប់តាំងពីរុស្ស៊ី បើកការលុកលុយពេញទំហឹងលើអ៊ុយក្រែនក្នុងឆ្នាំ២០២២មក។

ការហៅរកគ្នារបស់ប្រមុខមហាអំណាចទាំងពីរនេះ កើតឡើងស្របពេលមេដឹកនាំអឺរ៉ុបនិងថ្នាក់ដឹកនាំកំពូលៗពីបណ្តាប្រទេសផ្សេងៗទៀត នឹងជួបប្រជុំគ្នាក្នុងសន្និសីទសន្តិសុខនៅទីក្រុង Munich ប្រទេសអាល្លឺម៉ង់ចាប់ពីថ្ងៃទី១៤ដល់ថ្ងៃទី១៦ខែកុម្ភៈ។

ការសន្ទនានេះទៀតសោត កើតឡើងមុនជំនួបរបស់ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី ជាមួយអនុប្រធានាធិបតីអាមេរិក JD Vance ដែលអាចជាការគាបសង្កត់ភាគីអ៊ុយក្រែនឲ្យសុខចិត្តទទួលយកនូវលក្ខខណ្ឌណាមួយដែល លោក ត្រាំ បានព្រមព្រៀងជាគោលការណ៍ជាមួយលោកពូទីនរួចហើយ។

សូមបញ្ជាក់ផងដែរ ក្រោយជំនួបតាមទូរស័ព្ទត្រាំ-ពូទីន, មានសេចក្តីរាយការណ៍ថា ប្រមុខដឹកនាំទាំងពីរ នឹងជួបផ្ទាល់ជាមួយគ្នា នៅឯប្រទេស អារ៉ាប៊ី សាអូឌីត ក្នុងពេលឆាប់ៗ ប៉ុន្តែពេលវេលាជាក់លាក់ មិនទាន់ត្រូវបានបង្ហាញឡើយ៕

អត្ថបទ៖ សុខ សុវណ្ណ

ចុចអាន៖ ទីបំផុត ត្រាំនិងពូទីនឆ្លងឆ្លើយតាមទូរស័ព្ទ៩០នាទីលើកដំបូងបំបែកភាពទល់ច្រកក្នុងសង្គ្រាម

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា