នគរបាលខេត្តបាត់ដំបងបង្ក្រាបការរត់ពន្ធកញ្ឆាក្រៀមឆ្លងដែន៦គីឡូក្រាម ឃាត់ខ្លួនមនុស្សម្នាក់

កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តបាត់ដំបង បានឃាត់ខ្លួនជនសង្ស័យរត់ពន្ធគ្រឿងញៀនម្នាក់ រកឃើញកញ្ឆាក្រៀមខុសច្បាប់ចំនួន៦គីឡូក្រាម ខណៈដែលជនសង្ស័យទទួលមកពីប្រទេសថៃ និងផ្ញើបន្តទៅប្រទេសអង់គ្លេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​ប្រតិបត្តិការឃាត់ខ្លួនជនសង្ស័យនេះ បានធ្វើឡើងកាលពីថ្ងៃទី២២ ខែកុម្ភៈ ឆ្នាំ២០២៥ នៅចំណុចស្ថានីយប្រៃសណីយ៍ ខេត្តបាត់ដំបង នៅពេលជនសង្ស័យទៅទទួលយកកញ្ឆាក្រៀមទាំង៦គីឡូ ដែលបង្កប់ជាមួយវត្ថុផ្សេងពីទីប្រជុំជនមួយនៅប្រទេសថៃ រួចផ្ញើបន្តទៅឲ្យមនុស្សម្នាក់ទៀតនៅប្រទេសអង្គគ្លេស។

តាមរបាយការណ៍របស់ស្នងការដ្ឋានគរបាលខេត្តបាត់ដំបង ជនសង្ស័យមានឈ្មោះ ប៉ិល វាសនា អាយុ៤៤ឆ្នាំ រស់នៅសង្កាត់ចំការ​សំរោង ក្រុងបាត់ដំបង បានទំនាក់ទំនងជាមួយជនជាតិបរទេសម្នាក់នៅប្រទេសថៃ ដោយបង្គាប់ឲ្យជនសង្ស័យយកកញ្ឆាក្រៀមចំនួន៦គីឡួក្រាម នាំចូលមកប្រទេសកម្ពុជា ហើយយកទៅផ្ញើឱ្យមនុ​ស្សដែលកំពុងរស់នៅប្រទេសអង់គ្លេស ដោយដាក់ផ្ញើតាមរយៈប្រៃសណីយ៍ ដើម្បីទទួលប្រាក់​ពីជនបរទេសស្ថិតនៅប្រទេសថៃ។

តាមរបាយការណ៍ នៅពេលយកវត្ថុនេះទៅផ្ញើ ជនសង័្សយបានប្រាប់មន្រ្តីប្រៃសនីយ៍ថា ជាវត្ថុអនុស្សាវរិយ៍ដែលត្រូវផ្ញើទៅឱ្យមនុស្សផ្សេងៗគ្នាក្នុងប្រទេសអង់គ្លេស ដោ​យមានទាំងឈ្មោះ និងអាសយដ្ឋានត្រឹមត្រូវ តែត្រូវបានមន្រ្តីនៃអង្គភាពប្រៃសណីយ៍រកឃើញកញ្ចប់វត្ថុអនុស្សាវរិយ៍ដែលយកមកផ្ញើនេះ គឺមានកញ្ឆាក្រៀមចំនួន៦គីឡូក្រាម ដែលច្បាប់ហាមឃាត់​ និងបានសហការផ្តល់ព័ត៌មានមកសមត្ថ​កិច្ចនគរបាលទើបធ្វើការស្រាវជ្រាវ និងឃាត់ខ្លួនជនសង្ស័យយកមកធ្វើការសាកសួរ។

នៅមុខសមត្ថកិច្ច ជនសង័្សយបានឆ្លើយសារភាពថា នេះគឺជាលើកដំបូងដែលរូបគេផ្តើមប្រកបមុខរបរនេះ តាមរយៈការណែនាំពីជនបរទេសម្នាក់នៅប្រទេសថៃ ដោយគេសន្យាថា បើផ្ញើកញ្ឆាក្រៀមនេះទៅដល់ដៃមនុស្សនៅប្រទេសអង់គ្លេសបាន នោះគេនឹងឱ្យប្រាក់មកខ្លួន ទើបសម្រេចចិត្តធ្វើ ដោយទទួលយកកញ្ឆានេះ ពីក្នុងទឹកដីថៃ ចូលមកហើយយកទៅផ្ញើតាមរយៈប្រៃសណីយ៍។

ជនសង្ស័យ រួមទាំងវត្ថុតាងត្រូវបានសមត្ថកិច្ចរបៀបចំកសាងសំណុំរឿងបញ្ជូនទៅអយ្យការអមសាលាដំបូងខេត្តបាត់ដំបងដើម្បីអនុវត្តទោសទៅតាមផ្លូវច្បាប់៕