នាយករដ្ឋមន្រ្តី​កម្ពុជា នឹងចូលរួម​​​​ពិធីតភ្ជាប់តំណស្ពានចុងក្រោយ​​ស្ពាន​ឆ្លង​ទន្លេ​ខេត្ត​ក្រចេះ​ នៅ​ចុងខែ​ឧសភានេះ

សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា នឹង​ចូលរួម​ជា​អធិបតីភាព​ក្នុងពិធីតភ្ជាប់តំណស្ពានចុងក្រោយស្ពាន​ឆ្លង​ទន្លេ​ខេត្តក្រចេះនៅ​ចុង​ខែ​ឧសភានេះ។ នេះបើតាម​ការគូស​បញ្ជាក់ពីលោក លឹម ស៊ីដេនីន រដ្ឋលេខាធិការ​ក្រសួងសាធារណការ និងដឹកជញ្ជូន​ ក្នុង​ឱកាស​ចុះត្រួតពិនិត្យលក្ខណៈបច្ចេកទេស និងតាមដានវឌ្ឍនភាពការងារគម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់ នារសៀលថ្ងៃទី ១៣ ខែមីនា ឆ្នាំ២០២៥។

ជាមួយ​គ្នានេះ ប្រមុខ​ដឹកនាំកម្ពុជា​ក៏​នឹង​ប្រកាស​ប្រសិទ្ធនាមឈ្មោះ​ថ្មីស្ពាន​ឆ្លង​ទន្លេ​ខេត្តក្រចេះ​ ក្នុងឱកាស​ដែ​ល​សម្តេច​​​ចូលរួម​ជាអធិបតីក្នុងពិធីតភ្ជាប់តំណស្ពានចុងក្រោយដែលជា​​​​ស្ពានឆ្លង​ទន្លេ​ជា​ប្រវត្តិទីមួយ​របស់​ខេត្តក្រចេះ​​។ នេះបើតាមលោក លឹម ស៊ីដេនីន។

គិតត្រឹមពាក់កណ្តាលខែមីនា ឆ្នាំ២០២៥ គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ វឌ្ឍនភាព​សម្រេច​បានប្រមាណ ៩០% ខណៈដែលគម្រោងទាំងមូលរួមមាន៖ គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ ប្រវែង ១ ៧៦១ ម៉ែត្រ, ផ្លូវមេតភ្ជាប់មានប្រវែងសរុប ១៥,៤៩ គីឡូម៉ែត្រ និងផ្លូវខ្នែងមានចំនួន ៤ ខ្សែ ប្រវែងសរុប ១៦,២០ គីឡូម៉ែត្រ សម្រេច​​លទ្ធផលបាន ៦២,១០ ភាគរយ។

តាម​ការ​គ្រោងទុក ស្ពានឆ្លងកាត់ទន្លេមេគង្គខេត្តក្រចេះអាចនឹងបើកឱ្យប្រជាពលរដ្ឋធ្វើដំណើរឆ្លងកាត់បណ្តោះអាសន្ន នៅ​អំឡុង​ខែកញ្ញា ឆ្នាំ២០២៥ ខាងមុខនេះ៕

អត្ថបទ៖ ប្រុញ វិធិន