ព័ត៌មានជាតិ

អាកាសយានដ្ឋានអន្តរជាតិតេជោ សាងសង់យកលេខ ៩ ជាគោល ជាលេខហុងស៊ុយនាំភាពរីកចម្រើន

បានផុស

១ year មុន

នៅ

ថ្ងៃចន្ទ ២៤ មីនា ២០២៥

ដោយ

បើតាមមន្រ្តីគ្រប់គ្រងអាកាសយានដ្ឋានអន្តរជាតិតេជោបានបង្ហើបថា ដំណើរការសាងសង់អាកាសយានដ្ឋានអន្តរជាតិតេជោ មានការការគិតគូរយកចិត្តទុកដាក់យ៉ាងហ្មត់ចត់ទាំងផ្នែកបច្ចេកទេស សោភណភាព និងបរិស្ថានជុំវិញ។

ជាមួយគ្នានេះ ការអភិវឌ្ឍអាកាសយានដ្ឋានអន្តរជាតិតេជោក៏ផ្អែកតាមជំនឿ ដែលស្ទើរតែគ្រប់ហេដ្ឋារចនាសម្ព័ន្ធសំណង់អគារត្រូវបានសាងសង់ដោយយកខ្នាតលេខ ៩ ជាគោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា ឆារស៍ វ៉ាន់ អភិបាលក្រុមហ៊ុន Cambodia Airport Investment និងជាអភិបាលក្រុមហ៊ុនកាណាឌីយ៉ាគ្រុបបានគូសបញ្ជាក់ក្នុងបទសម្ភាសន៍ដល់ក្រុមអ្នកសារព័ត៌មាន ដែលបានចុះទៅទស្សនកិច្ចដំណើរការសាងសង់អាកាសយានដ្ឋានអន្តរជាតិតេជោ ដឹកនាំដោយក្លិបអ្នកកាសែតកម្ពុជាកាលពីចុងសប្ដាហ៍ថា ដំណើរការសាងសង់អាកាសយានដ្ឋានអន្តរជាតិតេជោ មានការគិតគូរយ៉ាងហ្មត់ចត់ដើម្បីឲ្យការសាងសង់មានភាពរលូន ទទួលបានទាំងសោភណភាព និងស្របតាមស្តងដាអន្តរជាតិ។

ជាមួយគ្នានេះ លោកក៏លើកឡើងពីជំនឿក្នុងការសាងសង់អាកាសយានដ្ឋានតេជោអន្តរជាតិ ដែលគ្រោងបញ្ចប់និងដាក់ឲ្យដំណើរការនៅអំឡុងខែកក្កដាខាងមុខនេះ។

លោកបានលើកបញ្ជាក់ពីការយកលេខ ៩ សម្រាប់ការអភិវឌ្ឍសំណង់អាកាសយានដ្ឋានអន្តរជាតិតម្លៃប្រមាណ ១៥០០ លានដុល្លារនេះ។

លោកថា លេខ ៩ ជាលេខខ្ពស់បំផុត និងជាលេខហុងស៊ុយល្អសម្រាប់ជំនឿជនជាតិខ្មែរ។ ស្ទើរតែគ្រប់ផ្នែកនៃសំណង់អគារក្នុងអាកាសយានដ្ឋាន មិនថាផ្នែកដំបូល សសរធ្នឹម និងហេដ្ឋារចនាសម្ព័ន្ធផ្សេងទៀតគឺអនុវត្តរូបមន្តការសាងសង់យកលេខ ៩ ជាគោលចម្បង។

តាមជំនឿជនជាតិខ្មែរ លេខ ៩ ជាលេខហុងស៊ុយល្អ។ ក្រៅតែជាលេខសំណាង ក៏ជាលេខនាំភាពថ្កុំថ្កើងរីកចម្រើនអស្ចារ្យ។ នេះបើតាមអ្នកឧកញ៉ា ឆារស៍ វ៉ាន់។