ព័ត៌មានអន្ដរជាតិ

ថៃទទួលបានការគាំទ្រលើសលុប លើផែនការ កាស៊ីណូពីមតិសាធារណៈ

បានផុស

១ year មុន

នៅ

ថ្ងៃពុធ ២៦ មីនា ២០២៥

ដោយ

លទ្ធផលនៃនីតិវិធីទទួលមតិសាធារណៈបានបង្ហាញថា ប្រជាជនថៃច្រើនលើសលប់មានការគាំទ្រលើផែនការរបស់រដ្ឋាភិបាលក្នុងការដាក់កាស៊ីណូឱ្យនៅស្របច្បាប់ ដើម្បីជំរុញវិស័យទេសចរណ៍ ទោះបីមានការជំទាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន Bloomberg បានរាយការណ៍ថា ប្រហែល ៨០ ភាគរយ នៃអ្នកចូលរួមក្នុងការស្ទង់មតិសាធារណៈ បានយល់ស្របលើសេចក្តីព្រាងច្បាប់ ដែលត្រួសត្រាយផ្លូវឱ្យកាស៊ីណូក្លាយជាអាជីវកម្មស្របច្បាប់នេះ ដោយបើកវានៅខាងក្នុងកន្លែងកម្សាន្តធំៗ។

យោងតាមសេចក្តីថ្លែងការណ៍របស់រដ្ឋាភិបាលថៃ ប្រជាជនជាង ៧០ ០០០ នាក់ បានផ្ដល់មតិយោបល់ និងអនុសាសន៍របស់ខ្លួន ក្នុងអំឡុងពេលដែលក្រសួងហិរញ្ញវត្ថុបើកការទទួលមតិសាធារណៈចន្លោះពីថ្ងៃទី ២៨ កុម្ភៈ ដល់ថ្ងៃទី ១៤ មីនា។

គួរគូសបញ្ជាក់ថា ប្រទេសថៃដែលពឹងផ្អែកខ្លាំងលើវិស័យទេសចរណ៍ដើម្បីជំរុញកំណើនសេដ្ឋកិច្ច មានគោលបំណងអនុម័តច្បាប់កាស៊ីណូដ៏ចម្រូងចម្រាស នៅឆ្នាំ ២០២៥ នេះ ដើម្បីទាក់ទាញការវិនិយោគពីបរទេសកាន់តែច្រើន និងបង្កើនប្រាក់ចំណូលពន្ធ ខណៈដោះស្រាយកន្លែងលេងល្បែងស៊ីសងខុសច្បាប់ផងដែរ។

ក្រុមអ្នកតវ៉ាប្រឆាំងនឹងសេចក្តីព្រាងច្បាប់របស់រដ្ឋាភិបាលក្នុងការបង្កើតកន្លែងកម្សាន្តកាស៊ីណូស្របច្បាប់ នៅមុខវិមានរដ្ឋាភិបាលនៅថ្ងៃទី ១១ ខែមីនា។ រូបភាព៖ បាងកកប៉ុស្តិ៍

ប៉ុន្តែផែនការនេះ បានរងរិះគន់ដោយក្រុមអ្នកប្រឆាំង និងក្រុមប្រយុទ្ធប្រឆាំងនឹងការញៀនល្បែងស៊ីសងក្នុងចំណោមប្រជាជនថៃ ដោយនិយាយថា កាស៊ីណូនឹងផ្តល់ផលប្រយោជន៍យ៉ាងច្រើនដល់អាជីវកម្មធំៗ និងក្រុមហ៊ុនបរទេស។

កាលពីពាក់កណ្ដាលខែមីនា កាសែតបាងកកប៉ុស្តិ៍បានចុះផ្សាយថា ការអនុម័យរបស់រដ្ឋាភិបាលលើកន្លែងកាស៊ីណូ-កម្សាន្ត អាចជាកត្តាជំរុញឱ្យមានការប្រឆាំងទ្រង់ទ្រាយធំចំពោះរដ្ឋបាលដឹកនាំដោយគណបក្សភឿថៃ នាពេលបច្ចុប្បន្ន។

ក្រុមអ្នកប្រឆាំងនឹងផែនការកាស៊ីណូស្របច្បាប់ បានច្រានចោលការណ៍ដែលថា កាស៊ីណូនឹងបង្កើនប្រាក់ចំណូលទេសចរណ៍។ ផ្ទុយទៅវិញ ពួកគេបានលើកឡើងថា វានឹងជំរុញឱ្យមានកំណើនបទល្មើស/ឧក្រិដ្ឋកម្មដែលពាក់ព័ន្ធនឹងល្បែងស៊ីសង ដែលនឹងប៉ះពាល់ដល់ទំនុកចិត្តទេសចរបរទេស ដែលទៅលេងប្រទេសថៃដោយសារតែសម្បត្តិធម្មជាតិ វប្បធម៌ និងសិល្បៈជាដើម៕