បារាំងជំរុញ​ឲ្យ​​អាមេរិក និង EU ដកទណ្ឌកម្មលើប្រទេសស៊ីរី

ប្រធានាធិបតីបារាំងលោក Emmanuel Macron បានអំពាវនាវ​ឲ្យ​សហភាពអឺរ៉ុប និងសហរដ្ឋអាមេរិកដកទណ្ឌកម្មដែល​បាន​ដាក់លើប្រទេសស៊ីរី បន្ទាប់ពីកិច្ចប្រជុំជាមួយប្រធានាធិបតីបណ្តោះអាសន្នស៊ីរី លោក Ahmed al-Sharaa នៅវិមាន Élysée ក្នុង​ទីក្រុង​ប៉ារីស កាល​​ពី​ល្ងាច​ថ្ងៃពុធ​ទី​៧​ខែ​ឧសភា​ឆ្នាំ​២០២៥។ នេះ​ជា​ដំណើរ​ទស្សន​កិច្ច​ជា​ផ្លូវ​ការ​លើក​ដំបូង​របស់​លោក al-Sharaa នៅ​អឺរ៉ុប​ចាប់​តាំង​ពី​ចូល​កាន់​តំណែង​បន្ទាប់​ពី​ការ​ទម្លាក់​លោក Bashar al-Assad ក្នុង​ខែ​ធ្នូ​ឆ្នាំ​២០២៤។

លោក Macron បានបង្ហាញការគាំទ្រចំពោះការបន្ធូរបន្ថយបន្តិចម្តងៗ នៃទណ្ឌកម្មរបស់សហភាពអឺរ៉ុប ដោយយោងទៅតាមការប្តេជ្ញាចិត្តបន្តរបស់ស៊ីរីចំពោះកំណែទម្រង់នយោបាយ និងការការពារប្រជាពលរដ្ឋទាំងអស់ រួមទាំងសាសនា និងជនជាតិភាគតិចផងដែរ។ លោក​បាន​សង្កត់​ធ្ងន់​ពី​សារៈសំខាន់​នៃ​ប្រទេស​ស៊ីរី​ ក្នុង​ការ​រក្សា​គន្លង​បច្ចុប្បន្ន​របស់​ខ្លួន​ឆ្ពោះ​ទៅ​រក​ស្ថិរភាព និង​ការ​បង្រួបបង្រួម។

លើសពីនេះ លោក Macron បានជំរុញ​ឲ្យ​សហរដ្ឋអាមេរិកពិចារណាឡើងវិញនូវគោលនយោបាយដាក់ទណ្ឌកម្មរបស់ខ្លួនលើស៊ីរី និងរក្សាវត្តមានយោធានៅក្នុងតំបន់ ដើម្បីប្រយុទ្ធប្រឆាំងនឹងការគំរាមកំហែងដែលកំពុងកើតមានដោយក្រុមរដ្ឋអ៊ីស្លាម។ លោកបានគូសបញ្ជាក់ថា ទណ្ឌកម្មបច្ចុប្បន្ន ដែលបានដាក់ដំបូងលើរបបលោក Assad មិនគួររារាំងដល់កិច្ចខិតខំប្រឹងប្រែងរបស់រដ្ឋាភិបាលបណ្តោះអាសន្នថ្មី ដែលខិតខំស្តារជាតិឡើងវិញនោះទេ។

ប្រធានាធិបតី​​ស៊ីរី លោក al-Sharaa បានទទួលស្គាល់​ពី​បញ្ហាប្រឈមនានានៅ​ថ្ងៃ​ខាងមុខ​ និងបញ្ជាក់សារជាថ្មីនូវការយកចិត្តទុកដាក់របស់រដ្ឋាភិបាលរបស់គាត់ក្នុងការជំរុញឯកភាព និងការកសាងប្រទេសជាតិឡើងវិញ។ លោកក៏បានបញ្ជាក់ផងដែរថា ស៊ីរីកំពុងចូលរួមក្នុងកិច្ចចរចាដោយប្រយោលជាមួយអ៊ីស្រាអែល ដែលសម្របសម្រួលដោយភាគី​ទីបី ក្នុងគោលបំណងកាត់បន្ថយភាពតានតឹងនាពេលថ្មីៗនេះ បន្ទាប់ពីការវាយប្រហារតាមអាកាសរបស់អ៊ីស្រាអែលនៅក្នុងទឹកដីស៊ីរី៕

ដោយ៖ ឈាង

ចុចអាន៖ អារ៉ាប៊ីសាអូឌីត និងកាតា ជួយ​សង​បំណុល​ធនាគារពិភពលោក​​ឲ្យ​ស៊ីរី​ចំនួន ១៥​លានដុល្លារ