ផ្លូវ​ទៅ​ភ្នំ​​ខ្នង​ផ្សារ​ គ្រោង​ប្រើប្រាស់រយៈ​​ពេល ១ ខែ នឹង​សាងសង់​​ឲ្យ​រួចរាល់

បើ​តាម​ការ​អះអាង​របស់​លោក អ៊ាង សុផល្លែត រដ្ឋមន្រ្តី​ក្រសួង​បរិស្ថាន​បាន​ឲ្យ​ដឹង​ថា ផ្លូវ​ទៅភ្នំ​​ខ្នង​ផ្សារ​ដែល​ទើប​សម្ពោធ​បើ​ក​ការដ្ឋាន​ស្ថាបនា​​កាលពីសប្តាហ៍មុននេះ​ គ្រោង​នឹង​សាងសង់​ឲ្យ​រួចរាល់​ក្នុង​រយៈពេល ១ ខែ។

ឆ្លើយតបសំនួរ​ពីកម្ពុជាថ្មីក្នុង​កម្មវិធី​មាគ៌ា​បៃតង​ រៀបចំ​កាលពីម្សិលមិញនេះ លោករដ្ឋមន្រ្តីបាន​បញ្ជាក់ថា ផ្លូវ​ប្រវែង​ជាង ៧ គីឡូម៉ែត្រ បើ​តាម​ជាក់ស្តែង​អាច​ប្រើប្រាស់​ពេល​ប្រហែល​មួយ​ខែ​ប៉ុណ្ណោះ​នឹង​រួចរាល់​។ យ៉ាងណា​ ​ដោយសារ​ពេល​នេះ​ជា​រដូវភ្លៀង អាច​បង្ក​ការ​លំបាក​បន្តិច​ដល់​ដំណើរការ​សាងសង់ ប៉ុន្តែ​យ៉ាងណា​ការដ្ឋាន​នឹង​ខិតខំ​សម្រុក​ស្ថាបនា​ឲ្យ​បាន​រួចរាល់​ ដើម្បី​សម្រួល​ការ​ធ្វើ​ដំណើរ​និង​ការ​កម្សាន្ត​របស់​ភ្ញៀវ​ទេសចរ។ លោក​រដ្ឋមន្រ្តី​បញ្ជាក់បន្ថែម​។

តាមរយៈ​ហេដ្ឋារចនាសម្ព័ន្ធទាំងនេះ បើតាម​រដ្ឋមន្រ្តី​ក្រសួង​បរិស្ថាន​ នឹង​ចូលរួម​លើក​កម្ពស់​ជីវភាព​គ្រួសារ​រស់នៅ​សហគមន៍ ដែល​ប្តូរ​ពីការ​ពឹងផ្អែកលើការកាប់ឈើ និង​បរបាញ់​សត្វព្រៃ​ខុសច្បាប់ មកចូលរួម​ចំណែក​​ក្នុង​ការ​ការពារ និង​អភិរក្ស​ធនធានធម្មជាតិ។

ផ្លូវចូលទៅភ្នំខ្នងផ្សារបានធ្វើ​ពិធី​បើកការដ្ឋាន​សាងសង់កាលពី​ចុងសប្តាហ៍​មុននេះ ​ដែល​រួម​បញ្ចូល​ទាំង​ការ​​សាងសង់​ហេដ្ឋារចនាសម្ព័ន្ធ​បម្រើ​ឱ្យគោលដៅ​លម្ហែ​បៃតង​តំបន់ភ្នំខ្នងផ្សារ​​ដែលក្នុង​នោះ​​រួមមាន ផ្លូវ​ក្រាលគ្រួស​ក្រហម (ក្រាល​ថ្មម៉ិច) ប្រវែង ៧,២ គ.ម ទទឹង​ប្រវែង ៨ ម៉ែត្រ ចាប់ពីផ្លូវលេខ ៤៨.៤ ដល់ជើងភ្នំឡើងតំបន់ខ្នងផ្សារ និង​ការបើក​សម្ពោធ​ផ្លូវឡើង​ភ្នំខ្នងផ្សារ និងសម្ពោធ​បើកការ​សាងសង់ផ្លូវថ្មើជើង​ឡើងតំបន់​ខ្នងផ្សារ ចាប់ពី​ចំណុច​ជើងភ្នំ ដល់​ដំណាក់ដានព្រះ ចំងាយប្រមាណ ៤ គ.ម ដែលក្នុងនោះ​ក្រសួង​បរិស្ថានមាន​គម្រោង​រៀប​ចំកន្លែងសម្រាកជាដំណាក់ៗ ដែលមានដើមឈើហូបផ្លែ និងឈើព្រៃ​ផ្តល់ម្លប់ និងអាច​អ្នកទេសចរណ៍បានសម្រាក​ផង និងអាចទទួលទានផងដែរ ក្នុងនោះគម្រោង​របស់ក្រសួង​បរិស្ថាន និងផ្តល់ជូនដល់អ្នកទេសចរឡើង​ភ្នំខ្នងផ្សារអាច​ពិសាទឹកស្អាត ដែលចម្រោះចេញពី​ទឹក​ធម្មជាតិប្រភពពីលើភ្នំ ដល់កន្លែងសម្រាក ជាមួយការដាក់​ស្លាកព័ត៌មាន​ដែលបង្ហាញពីចម្ងាយផ្លូវ និង​ការបញ្ចេញថាមពលរបស់អ្នកឡើងភ្នំ នៅតាមកន្លែង​សម្រាកនីមួយៗ​ឆ្ពោះទៅភ្នំខ្នង​ផ្សារ​ថែមទៀត។

បន្ថែមពីនេះ ក្រសួងបរិស្ថានក៏​គ្រោងនឹងរៀបចំឱ្យមានចំណតយានយន្ត​នៅកន្លែង​ដំណាក់ដាន​ព្រះ និងការរៀបចំហេដ្ឋារចនាសម្ព័ន្ធបម្រើសេវាកម្មទេសចរណ៍ ដូចជាហាងកាហ្វេ កន្លែង​ផ្តល់​ព័ត៌មាន ចំណតយានយន្ត ប្រព័ន្ធអគ្គិសនី ដើរដោយ​ថាមពលព្រះអាទិត្យ ប្រព័ន្ធទឹកស្អាត កន្លែង​បោះតង់ ផ្លូវថ្មើរជើងក្នុងព្រៃ ស្លាកសញ្ញា កន្លែងសង្គ្រោះបឋម អាហារដ្ឋាន និងកន្លែង​ទុកដាក់​សំរាម​ឱ្យបាន​ត្រឹមត្រូវផងដែរ។

បើ​តាម​លោក អ៊ាង សុផល្លែត រដ្ឋមន្រ្តី​ក្រសួង​បរិស្ថាន ការ​រៀបចំ​អភិវឌ្ឍ​ហេដ្ឋារចនាសម្ព័ន្ធ​ទាំង​នោះ ក្នុង​គោលបំណង​ជំរុញ​ការ​អភិវឌ្ឍសេដ្ឋកិច្ច និង​លើក​កម្ពស់​ជីវភាព​ប្រជាសហគមន៍​រស់នៅ​តំបន់​ខ្នងផ្សារ ស្ថិត​នៅ​ស្រុកឱរ៉ាល់ ខេត្តកំពង់ស្ពឺ​ តាមរយៈ​គម្រោង​លម្ហែ​បៃតង៕