ជម្លោះគ្រួសារ ប្តីដកកាំភ្លើងបាញ់ប្រហារប្រពន្ធមួយគ្រាប់រួចគេចខ្លួនបាត់

ជម្លោះរវាងប្ដីប្រពន្ធមួយគូរហូតឈានដល់ការផ្ទុះអាវុធបាញ់ប្រហារមួយគ្រាប់បណ្ដាលឲ្យស្ត្រីជាប្រពន្ធរងរបួសបញ្ជូនទៅកាន់មន្ទីរពេទ្យហើយបុរសជាប្ដីជិះម៉ូតូរត់គេចខ្លួនបាត់ស្រមោល​។ ហេតុការណ៍​នេះបង្កភ្ញាក់ផ្អើលកាលពីវេលា​ម៉ោង​០៩និង៣០នាទីយប់ ថ្ងៃទី​០៥​ ខែមិថុនា​ ឆ្នាំ​២០២៥ ស្ថិតតាមបណ្ដោយផ្លូវលេខ ​១៥​ កែង១៤៨​ សង្កាត់​ផ្សារកណ្តាល​ទី២​ ខណ្ឌដូនពេញ​ រាជធានី​ភ្នំពេញ​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប្រភពព័ត៌មានពីប្រជាពលរដ្ឋបានអោយដឹងថា នៅមុនពេលកើតហេតុគាត់បានអង្គុយហូបអីនៅក្បែរផ្ទះកើតហេតុ ខណៈនោះក៏ស្រាប់តែមានឮសំឡេងផ្ទុះអាវុធចំនួន០១គ្រាប់ និងមានសំឡេងស្រែកចេញពីខាងក្នុងផ្ទះ។ ភ្លាមៗ ប្រជាពលរដ្ឋបានផ្អើលឆោឡោនាំគ្នារត់ទៅមើល និងខ្លះទៀតបានរាយការណ៍ទៅកាន់សមត្ថកិច្ចជួយចុះមកអន្តរាគមន៍។ ស្របពេលនោះប្រជាពលរដ្ឋបានប្រទះឃើញស្រ្តីរងគ្រោះហូរឈាមជោក ហើយក៏ហៅម៉ូតូកង់បី ដើម្បីដឹកបញ្ជូនទៅសង្គ្រោះនៅមន្ទីរពេទ្យតែម្តង។ ចំណែកបុរសជាប្តី បានជិះម៉ូតូរត់គេចខ្លួនបាត់ស្រមោល។

ទោះបីយ៉ាងណា ក្នុងហេតុហេតុការណ៍បាញ់ប្រហារពីសំណាក់បុរសជាប្ដីមកលើប្រពន្ធនេះ គេនៅមិនដឹងពីមូលហេតុនៅឡើយទេ ខណៈកម្លាំងសមត្ថកិច្ចកំពុងបើកការស្រាវជ្រាវរកជនដៃដល់ដើម្បីយកមកសាកសួរតាមនីតិវិធី៕

អត្ថបទ៖ រដ្ឋា