ជីវិតដ៏សន្សំសំចៃ របស់មហាសេដ្ឋីពិភពលោក Warren Buffett

លោក Warren Buffett ជាប់ចំណាត់ថ្នាក់ក្នុងចំណោមបុគ្គលដែលមានទ្រព្យសម្បត្តិច្រើនជាងគេបំផុតនៅលើពិភពលោក ប៉ុន្តែអ្នកវិនិយោគរូបនេះ បានរក្សានូវរបៀបរស់នៅសមរម្យ និងសន្សំសំចៃ ដែលមិនឆ្លុះបញ្ចាំងពីទ្រព្យសម្បត្តិសុទ្ធចំនួន ១៥៤ពាន់លានដុល្លាររបស់គាត់នោះទេ។

នៅក្នុងបទសម្ភាសន៍កន្លងមកជាមួយសារព័ត៌មាន CNBC និង Yahoo Finance គាត់បានចែករំលែកថា គាត់មិនដែលមានអារម្មណ៍ថាចង់បានផ្ទះ ឬឡានច្រើននោះទេ។

ដូច្នេះ​តើ​មហាសេដ្ឋី​ចាយវាយ​ដោយ​របៀបណា?

ចូលចិត្តប្រមូលឧបករណ៍ Ukulele

ថ្វីបើមានប្រាក់លានក៏ពិតមែន ប៉ុន្តែសេដ្ធីរូបនេះមានចំណង់ចំណូលចិត្ត វាយកូនហ្គោល ហើយចំណាយពេលច្រើនក្នុងការអាន។ គាត់ក៏មានចំណង់ចំណូលចិត្តចំពោះឧបករណ៍ ukulele ហើយដូចដែលគាត់បានបង្ហាញនៅឆ្នាំ ២០២០ ថា គាត់មាន ២២ ឯណោះ។

នៅចំណុចមួយ គាត់ថែមទាំងបានបរិច្ចាគ ukulele Hilo ១៧ ដល់សាខា North Omaha នៃអង្គការមិនរកប្រាក់ចំណេញ Girls Inc. ហើយគាត់ផ្ទាល់បានឈប់ដើម្បីផ្តល់មេរៀនជាក្រុមថែមទៀតផង។

នៅតែប្រើទូរស័ព្ទបត់ ស្លៀកពាកសាមញ្ញា និង កាត់សក់ត្រឹមតែ១៨ដុល្លារ

ទោះបីជាក្រុមហ៊ុន Berkshire Hathaway មានភាគហ៊ុនដ៏ធំនៅក្នុង Apple ក៏ដោយ គាត់បានពឹងផ្អែកលើទូរស័ព្ទបត់ Samsung SCH-U320 អស់ជាច្រើនឆ្នាំ។ ទីបំផុតគាត់បានប្តូរទៅប្រើ iPhone នៅឆ្នាំ ២០២០ ប៉ុន្តែនៅតែប្រើវាត្រឹមតែជាទូរស័ព្ទប៉ុណ្ណោះ។

បើនិយាយពីម៉ូដសំលៀកបំពាក់វិញ គាត់មានឈុតប្រហែល ២០ឈុត ដែលរចនាឡើងដោយអ្នករចនាម៉ូដជនជាតិចិន Madame Li ដែលគាត់បានបង្កើតទំនាក់ទំនងជិតស្និទ្ធជាមួយអស់រយៈពេលជាច្រើនឆ្នាំ។ ភាពសន្សំសំចៃមិនត្រឹមប៉ុណ្ណឹងទេ ពេលខ្លះចំណាយ ១៨ ដុល្លារលើការកាត់សក់ពីហាងកាត់សក់ដែលមានទីតាំងនៅអគារការិយាល័យរបស់គាត់។

ទទួលទានតែ McDonald’s និង Coca-Cola

មហាសដ្ធីវ័យចំណាស់ចាប់ផ្តើមពេលព្រឹកភាគច្រើនជាមួយនឹងអាហារពេលព្រឹក ៣.១៧ដុល្លារ នៅហាង McDonald’s នៅតាមផ្លូវទៅការិយាល័យ។ ក្នុងចំណោមនោះ អាហារជម្រើសបីគឺ សាច់ក្រកពីរ សាច់ក្រក ស៊ុត និងឈីស ឬ bacon ស៊ុត និងឈីស។ គាត់តែងតែផ្គូផ្គងវាជាមួយកូកា-កូឡា។

ផ្ទះ​មួយ​បាន​ទិញ​ក្នុង​ទសវត្សរ៍​ឆ្នាំ ១៩៥០

លោក Buffett រស់នៅក្នុងផ្ទះដ៏សាមញ្ញមួយក្នុងទីក្រុង Omaha រដ្ឋ Nebraska ដែលគាត់បានទិញក្នុងឆ្នាំ ១៩៥៨ ក្នុងតម្លៃ ៣១,៥០០ដុល្លារ ដែលស្មើនឹង ៣៤២,0០០០ ដុល្លារសព្វថ្ងៃនេះ។

អចលនទ្រព្យទំហំ ៦,២៨០ ហ្វីតការ៉េ (៥៨៣ ម៉ែត្រការ៉េ) មានបន្ទប់គេងចំនួន ៥ និងបានឆ្លងកាត់ការពង្រឹងសន្តិសុខ រួមទាំងការហ៊ុមព័ទ្ធ និងកាមេរ៉ាឃ្លាំមើល។ តម្លៃ​របស់​វា​ឥឡូវ​ត្រូវ​បាន​គេ​ប៉ាន់​ប្រមាណ​ថា​មាន​ប្រហែល ១,៤ លាន​ដុល្លារ។

បន្ថែមពីលើលំនៅដ្ឋានចម្បងរបស់គាត់ Buffett ធ្លាប់មានផ្ទះវិស្សមកាលប្រាំមួយបន្ទប់គេងនៅ Laguna Beach រដ្ឋ California ។ វាត្រូវបានទិញនៅឆ្នាំ ១៩៧១ ក្នុងតម្លៃ ១៥០,០០០ ដុល្លារ ហើយត្រូវបានជួសជុលឡើងវិញមុនពេលត្រូវបានលក់នៅឆ្នាំ ២០១៨ ក្នុងតម្លៃ ៧,៥ លានដុល្លារ។

ជិះរថយន្តល្មមៗ

លោក Warren Buffett មិន​ដែល​ត្រូវគេ​ស្គាល់​ថា​ជាម្ចាស​រថយន្ត​ទំនើបៗនោះទេ​។ អស់រយៈពេលជិតមួយទស្សវត្សរ៍មកគាត់បានបើកឡានកញ្ចាស់់ Lincoln Town ឆ្នាំ ២០០១ ដែលមានស្លាកលេខផ្ទាល់ខ្លួន THRIFTY។

បន្ទាប់ពីដាក់លក់ដេញថ្លៃសម្រាប់សប្បុរសធម៌ គាត់បានប្តូរទៅប្រើរថយន្ត Cadillac DTS ស៊េរីឆ្នាំ២០០៦ហើយទីបំផុតបានដំឡើងកំណែទៅជា Cadillac XTS ក្នុងឆ្នាំ ២០១៤។ គាត់បានប្រាប់ Forbes ថាគាត់កម្រនឹងទិញរថយន្តថ្មីណាស់ ព្រោះគាត់បើកបរបានត្រឹមតែ ៣,៥០០ម៉ាយក្នុងមួយឆ្នាំ។

មានចិត្តសប្បុរសធម៌

លោក Buffett ជាប់ចំណាត់ថ្នាក់ក្នុងចំណោមអ្នកសប្បុរសធម៌បំផុតនៅលើពិភពលោក។ ក្នុងរយៈពេលជិតពីរទសវត្សរ៍មកនេះ គាត់បានបរិច្ចាគភាគហ៊ុន Berkshire Hathaway ដែលមានតម្លៃជាង ៦០ ពាន់លានដុល្លារ ដែលឥឡូវនេះមានតម្លៃប្រហែល២៣០ពាន់លានដុល្លារ។

ប្រសិនបើលោក Buffett បានរក្សាភាគហ៊ុនទាំងនោះ ជំនួសឲ្យការផ្តល់ឲ្យពួកគេ ទ្រព្យសម្បត្តិសុទ្ធរបស់គាត់នឹងឈានដល់ជិត ៤០០ ពាន់លានដុល្លារនៅចុងខែមេសានេះ នេះបើយោងតាម ​​Bloomberg ។ នោះនឹងធ្វើឲ្យគាត់នាំមុខលោក Elon Musk ដែលបច្ចុប្បន្នជាអ្នកមានបំផុតក្នុងពិភពលោកដែលមានទ្រព្យសម្បត្តិ ៣៣៥ ពាន់លានដុល្លារ៕

អត្ថបទ៖ សាង ស្រីល័ក្ខ

ចុចអាន៖តំណែងកូនៗទាំង ៥ នាក់របស់សេដ្ឋីលំដាប់ទី ២ ថៃ ក្រោយទើបបានមរតកពីឪពុកថ្មីៗ