Man United គ្រោងយកខ្សែប្រយុទ្ធខ្លួនម្នាក់ ជាទុនចរចាជាមួយ Napoli ផ្ទេរយក Osimhen

ក្លិបបិសាចក្រហម Manchester United កំពុងពិចារណាយកខ្សែបយុទ្ធស្លាប Jadon Sancho ធ្វើជាលក្ខខណ្ឌមួយ ដើម្បីចរចាជាមួយ​ក្លិប​ Napoli អំពីការផ្ទេរយកខ្សែប្រយុទ្ធកណ្តាល Victor Osimhen។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Man United បានគិតគូរបែបនេះ បន្ទាប់ពី Napoli ចាប់អារម្មណ៍លើ Sancho ដើម្បីមកជំនួសតំណែង Khvicha Kvaratskhelia ដែលបានចាកចេញទៅ Paris Saint-Germain។ ចំណែកខ្លួនវិញក៏កំពុងចាប់អារម្មណ៍លើ Osimhen ស្រាប់ ដើម្បីមកបំពេញចំណុចខ្សោយក្រុមនៅត្រង់តំបន់ប្រយុទ្ធកណ្តាល។

យោងតាមការចុះផ្សាយដោយអ្នកកាសែតលោក Gianluca Di Marzio បានឱ្យដឹងថា Napoli មានបំណងចង់ចុះកិច្ចសន្យាយក Sancho នៅរដូវក្តៅនេះ ដើម្បីមកជំនួសតំណែង Kvaratskhelia។ ដោយឡែកខាង Man United វិញ ក៏មិនចង់ទុក Sancho ឱ្យនៅបន្តដែរ ដូច្នេះពួកគេគ្រោងនឹងឆ្លៀតឱកាសនេះ ដើម្បីយក Sancho ដាក់ជាលក្ខខណ្ឌទៅចរចាជាមួយ Napoli អំពីការផ្ទេរ Osimhen វិញម្តង។

ទាំង Osimhen និង Sancho សុទ្ធតែមិនមានអនាគតបន្តជាមួយក្លិបរបស់ពួកគេរៀងៗខ្លួននៅរដូវក្តៅនេះ ដូច្នេះនេះអាចជាឱកាសដ៏ល្អមួយ​សម្រាប់ Man United ក្នុងការនាំយកខ្សែប្រយុទ្ធ Napoli វ័យ ២៦ ឆ្នាំមកកាន់ទឹកដី Old Trafford ប៉ុន្តែអ្វីដែលជាបញ្ហាចោទក្នុងពេលនេះ គឺ​កីឡាករ​ Osimhen មានតម្លៃផ្តាច់កិច្ចសន្យាថ្លៃដល់ទៅ ៨៥ លានដុល្លារអាមេរិកឯណោះ ដូច្នេះហើយទើបធ្វើឱ្យក្លិបមួយចំនួន រួមទាំងក្លិបបិសាចក្រហម មានភាពស្ទាក់ស្ទើរ។

គួរបញ្ជាក់ថា Osimhen នៅសល់កិច្ចសន្យាជាមួយ Napoli មួយរដូវកាលទៀត ពោលគឺដល់ខែ មិថុនា ឆ្នាំ ២០២៦៕

ប្រែសម្រួល៖ សេម កុសល
ប្រភព៖ Sportskeeda