ព័ត៌មានជាតិ

ផ្លូវខេត្តលេខ ៣១២ តភ្ជាប់ទៅច្រកព្រំដែនបន្ទាយចក្រី វឌ្ឍនភាពបញ្ចប់ការសាងសង់ ១០០%

បានផុស

១ year មុន

នៅ

ថ្ងៃសុក្រ ២៧ មិថុនា ២០២៥

ដោយ

បើតាមមន្រ្តីអ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា ផ្លូវខេត្តលេខ ៣១២ បំបែកពីផ្លូវជាតិលេខ ១ ទៅច្រកព្រំដែនអន្តរជាតិបន្ទាយចក្រី វឌ្ឍនភាពមកដល់ពេលនេះបញ្ចប់ការសាងសង់ ១០០%។

លោក ផន រឹម អ្នកនាំពាក្យក្រសួងសាធារណការនិងដឹកជញ្ជូនបានបញ្ជាក់ថា ផ្លូវខេត្តលេខ ៣១២ ជាខ្សែផ្លូវយុទ្ធសាស្រ្តដ៏សំខាន់ភ្ជាប់ទៅច្រកព្រំដែនបន្ទាយចក្រីជាប់ជាមួយប្រទេសវៀតណាម ដែលបច្ចុប្បន្នដំណើរការសាងសង់សម្រេច ១០០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា ផ្លូវខេត្តលេខ ៣១២ សាងសង់ឆ្លងកាត់ឃុំចំនួន ៤ ក្នុងភូមិសាស្ត្រស្រុកព្រះស្តេច ខេត្តព្រៃវែងដែលរួមមាន ឃុំល្វា ឃុំជ័យកំពក ឃុំអង្គររាជ និងឃុំបន្ទាយចក្រី។ ចំណុចចាប់ផ្តើមពី ភូមិសំរោង ឃុំល្វា (ត្រង់បំបែកផ្លូវជាតិលេខ១ គីឡូម៉ែត្រលេខ៧៧+០៨២) រហូតដល់ភូមិករគោ ឃុំបន្ទាយចក្រី (ព្រំប្រទល់កម្ពុជា-វៀតណាម)។

លោក ផន រឹម បានបន្តថា ផ្លូវខេត្តលេខ ៣១២ មានភាពប្រទាក់ក្រឡាគ្នាជាមួយនឹងផ្លូវជាតិលេខ ១ ផ្លូវខេត្តលេខ ៣១២A និងផ្លូវក្រវាត់ព្រំដែន ដែលបានតភ្ជាប់តំបន់ទីប្រជុំជនទៅកាន់តំបន់ព្រំដែន (កម្ពុជា-វៀតណាម) ដែលការសាងសង់ត្រូវពង្រីកទទឹងតួផ្លូវដែលមានប្រវែងពី ៤ ទៅ ៥ ម៉ែត្រ ទៅទទឹងតួផ្លូវប្រវែង ១២ ម៉ែត្រ និងលើកកម្រិតគុណភាពពីប្រភេទផ្លូវក្រាលកៅស៊ូពីរស្រទាប់ (DBST) ទៅជាប្រភេទផ្លូវក្រាលកៅស៊ូ AC មានកម្រាស់ ៦ សង់ទីម៉ែត្រ និង ៨ សង់ទីម៉ែត្រ និងក្រាលបេតុងវសរសៃដែកកម្រាស់ ២៥ សង់ទីម៉ែត្រ ដែលមានទទឹងរួម ១១ ម៉ែត្រ និងមានគន្លងសម្រាប់រថយន្ត និងគន្លង សម្រាប់ទោចក្រយានធ្វើចរាចរណ៍(២គន្លង ទៅ-មក)។

បើតាមលោក ផ្លូវខេត្តលេខ ៣១២ ដែលមានប្រវែង ២៨,៣៧២ គីឡូម៉ែត្រ សាងសង់ចំណាយថវិកាប្រមាណជាង ២៤ លានដុល្លារ ក្រោមកម្ចីពីធនាគារអភិវឌ្ឍន៍អាស៊ី រួមជាមួយថវិកាបដិភាគរបស់រាជរដ្ឋាភិបាល ប្រើប្រាស់រយៈពេលសាងសង់ចំនួន ១៨ ខែ ដោយទទួលបន្ទុកសាងសង់ដោយក្រុមហ៊ុនកូរ៉េ ILSUNG-KR JOINT VENTURE៕