ចាយពេលជាង៣ឆ្នាំ ទីបំផុត រុស្ស៊ី គ្រប់គ្រងបានតំបន់ Luhansk ទាំងស្រុងហើយ

ក្រោយការប្រយុទ្ធអស់រយៈពេលជាង៣ឆ្នាំ ទីបំផុតរុស្ស៊ីបានប្រកាសពីការគ្រប់គ្រងតំបន់ Luhansk បានទាំងស្រុងហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃអង្គារទី១ខែកក្កដាឆ្នាំ២០២៥, អភិបាលតំបន់លោក Leonid Pasechnik បានប្រកាសពីការរំដោះបាន Luhansk ១០០% នៅលើកញ្ចក់ទូរទស្សន៍ប៉ុស្តិ៍លេខ១រុស្ស៊ី។

ទោះបីជាយ៉ាងណាក៏ដោយ ជុំវិញសេចក្តីប្រកាសនេះ ភាគីអ៊ុយក្រែនមិនទាន់បញ្ចេញប្រតិកម្មអ្វីទេ។

នៅពេលរុស្ស៊ីបើកប្រតិបត្តិការសឹកពេញទំហឹងនៅថ្ងៃទី២៤ខែកុម្ភៈឆ្នាំ២០២២, គោលដៅដ៏ធំមួយគឺការគ្រប់គ្រងតំបន់ Donbas ទាំងស្រុង រួមទាំង Luhansk នេះផងដែរ។

កងកម្លាំងរបស់លោកប្រធានាធិបតីវ្ល៉ាឌីមៀរ ពូទីននិងក្រុមបំបែកខ្លួនដែលគាំទ្រដោយរុស្ស៊ី បានវាយលុកយ៉ាងលឿនពីទិសដៅផ្សេងៗគ្នា ដោយដណ្តើមបានទីក្រុងតូចៗជាច្រើននៅភាគខាងជើង និងកណ្តាលនៃតំបន់ Luhansk។

នៅខែកញ្ញាឆ្នាំ២០២២ វិមានក្រឹមឡាំងបានប្រកាសជាផ្លូវការនូវការកាត់បញ្ចូលតំបន់ Luhansk (រួមជាមួយ Donetsk, Kherson និង Zaporizhzhia) ទៅក្នុងសហព័ន្ធរុស្ស៊ី បើទោះបីជាមិនទាន់គ្រប់គ្រងទឹកដីទាំងមូលនៅពេលនោះក៏ដោយ។

យ៉ាងណា សកម្មភាពទាំងនេះត្រូវបានសហគមន៍អន្តរជាតិភាគច្រើន ថ្កោលទោសថាជាទង្វើខុសច្បាប់ និងមិនដែលទទួលស្គាល់ឡើយ។

មកដល់ចុងឆ្នាំដដែលនោះ អ៊ុយក្រែនក៏បើកការវាយលុកតបតយ៉ាងជោគជ័យក្នុងតំបន់ Kharkiv ដែលនៅជិតខាង ដោយដណ្តើមយកមកវិញនូវទឹកដីសំខាន់ៗមួយចំនួន រួមទាំងផ្នែកខ្លះនៃភាគខាងលិច តំបន់ Luhansk ដូចជាតំបន់ជុំវិញទីក្រុង Lyman ផងដែរ ប៉ុន្តែកងកម្លាំងលោក វ៉ូឡូឌីមៀរ ហ្សេលេនស្គី មិនអាចបណ្តេញកងទ័ពរុស្ស៊ីចេញពីតំបន់ Luhansk បានទាំងស្រុងទេ។

លុះមកដល់ថ្ងៃទី៣០ខែមិថុនាឆ្នាំ២០២៥ ទើបលោក Pasechnik ប្រកាសពីការរំដោះបានតំបន់ Luhansk ១០០%តែម្តង៕

អត្ថបទ៖ សុខ សុវណ្ណ

ចុចអាន៖ អាល្លឺម៉ង់ ប្រកាស​ផ្ដល់​ជាង​២ពាន់​លាន​ដុល្លារ​ឲ្យ​អ៊ុយក្រែន ពង្រឹង​ខែល​អាកាស