ប្តូរជំហរ! ត្រាំ បញ្ជាក់ថា នឹងជួយអាវុធអ៊ុយក្រែន វិញ

ប្រធានាធិបតីអាមេរិក ដូណាល់ ត្រាំ បានប្តូរជំហរវិញហើយ ដោយបញ្ជាក់ថា លោកនឹងបញ្ជូនអាវុធឲ្យប្រទេសអ៊ុយក្រែន ដើម្បីការពារខ្លួន។ នេះបើតាមការចេញផ្សាយរបស់ AP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់បែបនេះទៅកាន់អ្នកសារព័ត៌មាននៅសេតវិមានកាលពីថ្ងៃចន្ទទី៧ខែកក្កដាឆ្នាំ២០២៥ ដោយនិយាយថា «យើងត្រូវបញ្ជូនអាវុធបន្ថែមទៀត ភាគច្រើនជាអាវុធការពារខ្លួន។ ពួកគេ (អ៊ុយក្រែន) កំពុងរងការវាយប្រហារខ្លាំងណាស់»។

ការអត្ថាធិប្បាយរបស់លោកត្រាំ កើតឡើងប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីអាមេរិករូបនេះ បញ្ជាឲ្យផ្អាកការដឹកសព្វាវុធសំខាន់ៗ ទៅឲ្យទីក្រុងកៀវ។

កាលពីសប្តាហ៍មុន មន្ទីរបញ្ចកោណប្រកាសថា ខ្លួននឹងផ្អាកជួយខែលការពារដែនអាកាស កាំភ្លើងធំ និងអាវុធផ្សេងទៀតដល់អ៊ុយក្រែនសិន ព្រោះក្តីបារម្ភថា ស្តុកអាវុធរបស់ខ្លួនឯងធ្លាក់ចុះច្រើនពេក។

សូមជម្រាបថា កាលពីខែមីនា លោក ត្រាំ បានផ្អាកជាបណ្តោះអាសន្ននូវជំនួយ និងការចែករំលែកព័ត៌មានសម្ងាត់ជាមួយអ៊ុយក្រែន។

យ៉ាង​ណា​មិញ ការ​ផ្អាក​នោះ​ត្រូវបាន​ដក​ចេញ​វិញ ហើយ​មកដល់​ចុងខែមេសា សហរដ្ឋអាមេរិក និងអ៊ុយក្រែនបានចុះហត្ថលេខាលើកិច្ចព្រមព្រៀងមួយ ដែលផ្តល់​ឲ្យ​ក្រុង​វ៉ាស៊ីនតោន​នូវលទ្ធភាពទទួលបានធនធានរ៉ែ​កម្រ​របស់​ក្រុង​កៀវ​ជាថ្នូរនឹងជំនួយយោធា។

ក្រោយមកទៀត នៅថ្ងៃទី២ខែកក្កដា សហរដ្ឋអាមេរិកក៏​ប្រកាសបញ្ឈប់ការនាំចេញអាវុធមួយចំនួនទៅកាន់ប្រទេសអ៊ុយក្រែនសាជាថ្មី ដោយលើកឡើងពីក្តីព្រួយបារម្ភអំពីកម្រិតស្តុកទុក​សព្វាវុធ​ក្នុងស្រុក និងការវាយតម្លៃឡើងវិញនៃអាទិភាពយោធា៕

អត្ថបទ៖ សុខ សុវណ្ណ

ចុចអាន៖ ត្រាំ បញ្ជាក់ថា អាមេរិកនៅតែជួយអ៊ុយក្រែនដដែល ប៉ុន្តែជួយតែអាវុធសំខាន់ៗមួយចំនួនប៉ុណ្ណោះ