ផ្លូវ​ដ៏សំខាន់ពីរខ្សែ បង្កើតបណ្តាញ​​ដឹកជញ្ជូន​ប្រទាក់ក្រឡា ភ្ជាប់​ទៅតំបន់ឧស្សាហកម្ម​ខេត្ត​ព្រះសីហនុ​

ផ្លូវខេត្តលេខ ១៤៦B និងផ្លូវខេត្តលេខ ១៤៨ បានកំពុងដើរតួនាទីយ៉ាងសំខាន់ក្នុងការជំរុញកំណើនសកម្មភាពសេដ្ឋកិច្ច ពាណិជ្ជកម្ម ទេសចរណ៍ ក៏ដូចជាលើកកម្ពស់ការតភ្ជាប់ខេត្តភាគនិរតីឱ្យកាន់តែមានភាពប្រទាក់ក្រឡាគ្នា និងកាន់តែងាយស្រួលក្នុងការដឹកជញ្ជូនទំនិញគ្រប់ប្រភេទ ឆ្ពោះទៅតំបន់ឧស្សាហកម្ម រោងចក្រ តំបន់សេដ្ឋកិច្ចពិសេស កំពង់ផែស្ទឹងហាវ និងកំពង់ផែស្វយ័តក្រុងព្រះសីហនុ។

មានប្រវែងសរុបប្រមាណ ៤៣,០២ គីឡូម៉ែត្រ ​ក្នុងនោះផ្លូវលេខ ១៤៦B ឬវិថីសុវត្ថិភាពសម្តេចព្រះសង្ឃរាជ ទេព វង្ស មានប្រវែងប្រមាណ ២០,៦៧ គីឡូម៉ែត្រ គិតចាប់ពីចំណុចបំបែកផ្លូវជាតិលេខ ៤ ត្រង់គីឡូម៉ែត្រលេខ ១៧៨+១៦៥ ស្ថិតនៅភូមិវាលធំ ឃុំវាលរេញ ស្រុកព្រៃនប់ រហូតដល់ភូមិ១ ឃុំអូរត្រេះ ស្រុកស្ទឹងហាវ ដែលត្រូវបានស្ថាបនាដោយក្រាលបេតុងកៅស៊ូ AC កម្រាស់ ៩ សង់ទីម៉ែត្រ និងមានទទឹងតួផ្លូវ ១១ម៉ែត្រ។

ចំណែកឯផ្លូវខេត្តលេខ១៤៨ ឬតីរវិថីសម្តេចតេជោ ហ៊ុន សែន មានប្រវែងប្រមាណ ២២,៣៤ គីឡូម៉ែត្រ បន្តពីស្រុកស្ទឹងហាវ រហូតដល់ចំណុចប្រសព្វផ្លូវជាតិលេខ​ ៤ ត្រង់គីឡូម៉ែត្រលេខ ២២៥+៥៥០ កំពង់ផែស្វយ័តក្រុងព្រះសីហនុ ដែលត្រូវបានស្ថាបនាដោយក្រាលបេតុងសសៃដែកកម្រាស់ ២៦សង់ទីម៉ែត្រ និងមានទទឹងតួផ្លូវ ១១ម៉ែត្រ។

ការ​សាងសង់​ផ្លូវតភ្ជាប់ទាំងពីរខ្សែ ក៏​មានការ​សាងសង់សំណង់សិល្បការ្យផ្សេងៗដូចជា ស្ពានថ្មីចំនួន ០១ កន្លែង និងពង្រីកស្ពានចាស់ចំនួន ១៧ កន្លែង ព្រមទាំងដាក់លូគ្រប់ប្រភេទចំនួន ១៦១ កន្លែងផងដែរ៕