World Cup 2026 ប្រែវាសនាកីឡាករ ៣ នាក់ពីកីឡាករធម្មតា ក្លាយ​ជាកីឡាករល្បីខ្លាំងក្នុងលោក

កីឡាករជាច្រើនកំពុងទទួលបានភាពល្បីល្បាញខ្លាំងនៅក្នុងព្រឹត្តិការណ៍បាល់ទាត់ជើងឯកពិភពលោក World Cup 2026 ប៉ុន្តែក្នុងចំណោមនោះ មានកីឡាករ ៣ នាក់ផ្ទុះការចាប់អារម្មណ៍ជាងគេបំផុត បន្ទាប់ពីបង្ហាញសមត្ថភាពល្អសឹងមិននឹកស្មាន។ អ្វីគួរឱ្យចាប់អារម្មណ៍បន្ថែមទៀត គឺកីឡាករទាំងនោះសុទ្ធតែជាអ្នកចាំទី។

កីឡាករផ្ទុះការចាប់អារម្មណ៍ដំបូងគេបំផុត គឺអ្នកចាំទីវ័យ ៤០ ឆ្នាំ Vozinha របស់ក្រុមជម្រើសជាតិ កាបវែរ។ ពីមុន អ្នកចាំទីរូបនេះ ពុំសូវមានអ្នកស្គាល់ច្រើននោះទេ ដោយអាជីពរបស់គេបានលេងនៅលីគនៃកោះ កាបវែរ ផ្ទាល់ និងក្លិបមួយចំនួនទៀតនៅតំបន់ អឺរ៉ុប ដូចជាប្រទេស ស្លូវ៉ាគី និង ព័រទុយហ្គាល់ ជាដើម។

បន្ទាប់ពីការប្រកួតបើកឆាកពូល H នៃ World Cup 2026 កាលពីថ្ងៃទី ១៥ ខែ មិថុនា ទល់នឹងក្រុម អេស្ប៉ាញ បានធ្វើឱ្យកេរ្តិ៍ឈ្មោះរបស់រូបគេល្បីរន្ទឺខ្លាំងសឹងមិននឹកស្មាន។ ក្នុងការប្រកួតនោះកីឡាករបានរួមចំណែកសង្គ្រោះបាល់គ្រោះថ្នាក់ ៧ ដង រហូតជួយឱ្យក្រុម កាបវែរ ទប់ស្មើ អេស្ប៉ាញ ០-០។ ក្រោយពីការប្រកួតនោះ កីឡាករបានកើនអ្នកតាមដានលើ IG ពី ៤៣,០០០ នាក់ រហូតដល់ជាង ១៥ លាននាក់។

កីឡាកទី ២ គឺអ្នកចាំទីរបស់ក្រុមជម្រើសជាតិ គូរ៉ាកៅ កីឡាករ Eloy Room។ កីឡាករវ័យ ៣៧ ឆ្នាំរូបនេះ ពុំសូវមានការចាប់អារម្មណ៍ច្រើនទេ អំឡុងការប្រកួតដំបូងក្នុងពូល E ដែលពេលនោះបានចាញ់ក្រុមជម្រើសជាតិ អាល្លឺម៉ង់ ៧-១។ កេរ្តិ៍ឈ្មោះរបស់អ្នកចាំទីក្រុម Miami FC រូបនេះ បានប្រែផ្ទុយស្រឡះ បន្ទាប់ពីរូបគេសង្គ្រោះពីការស៊ុតរបស់ក្រុម អេក្វាឌ័រ រហូតដល់ ១៥ លើក ដែលជួយឱ្យ គូរ៉ាកៅ ទប់ស្មើ អេក្វាឌ័រ ០-០។

ការសង្គ្រោះបាល់ចំនួន ១៥ លើកនេះ បានធ្វើឱ្យ Eloy Room បំបែកកំណត់ត្រាក្លាយជាកីឡាករសង្គ្រោះបាល់បានច្រើនជាងគេបំផុតក្នុងរយៈពេល ៩០ នាទី ប្រចាំប្រវត្តិសាស្ត្រ World Cup។ បន្ទាប់ពីការប្រកួតនោះ Eloy Room បានកើនអ្នកតាមដានលើ IG ពី ៩៥,០០០ នាក់ ដល់ជាង ១ លាននាក់។

កីឡាករទី ៣ គឺអ្នកចាំទីរបស់ក្រុមជម្រើសជាតិ អ៊ីរ៉ង់ កីឡាករ Alireza Beiranvand។ អ្នកចាំទីវ័យ ៣២ ឆ្នាំរូបនេះ ហាក់ពុំសូវមានអ្នកស្គាល់ច្រើនទេ នាមុនការប្រកួតទល់នឹងក្រុមជម្រើសជាតិ ប៊ែលហ្ស៊ិក ក្នុង World Cup 2026។

ទោះបីជាយ៉ាងណា កីឡាកររបស់ក្រុម Tractor រូបនេះ បានធ្វើឱ្យពិភពលោកភ្ញាក់ផ្អើលជាខ្លាំង បន្ទាប់ពីរូបគេសង្គ្រោះបាល់គ្រោះថ្នាក់រហូតដល់ទៅ ៧ លើក ជួយឱ្យក្រុម អ៊ីរ៉ង់ ទប់ស្មើក្រុមខ្លាំង ប៊ែលហ្ស៊ិក ០-០។ បន្ទាប់ពីការប្រកួតនោះ Beiranvand មានអ្នកចុចតាមដាននៅលើ IG ច្រើនគួរឱ្យកត់សម្គាល់ ដោយពេលនេះកើនដល់ជាង ៤ លាននាក់ហើយ៕

អត្ថបទ៖ សេម កុសល