សមត្ថកិច្ចឃាត់ខ្លួនក្មេងទំនើង ២នាក់ ដែលដកបង្គោលសុវត្ថិភាពទីសាធារណៈ នៅខេត្តស្វាយរៀង

នៅថ្ងៃទី០៦ ខែកក្កដា ឆ្នាំ២០២៥ កម្លាំងប៉ុស្តិ៍នគរបាលរដ្ឋបាលអង្គតាសូ ស្រុកស្វាយជ្រំ ខេត្តស្វាយរៀង បានទទួលព័ត៌មានពីប្រជាពលរដ្ឋថា មានក្មេងទំនើងចំនួន ០២នាក់ មិនស្គាល់អត្តសញ្ញាណជិះម៉ូតូ ០១គ្រឿង ឌុបគ្នាមកដល់ចំណុចលើផ្លូវភ្លឺប្រឡាយស្ថិតនៅភូមិបឹងគ្រៀល ឃុំអង្គតាសូ ស្រុកស្វាយជ្រំ បានឈប់ម៉ូតូ ពេលនោះមាន ០១នាក់ បានដើរទៅកាច់បង្កោលថ្មសុវត្ថិភាព (បង្គោលសញ្ញាផ្លូវគ្រោះថ្នាក់) នៅលើភ្លឺប្រឡាយអោយបាក់រួចហើយជិះម៉ូតូគេចខ្លួនបាត់ និងបានបង្ហោះ វីដេអូ និងរូបភាព តាមបណ្តាញសង្គមហ្វេសប៊ុក និង Tiktok។

ក្រោយពីទទួលបានព័ត៌មានហើយ កម្លាំងជំនាញស្រុក ដឹកដោយលោកវរសេនីយ៍ឯក សោម សុភ័ណ្ឌ អធិការនគរបាលស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលអង្គតាសូ និងកម្លាំងប៉ុស្តិ៍នគរបាលរដ្ឋបាលក្រោលគោ ចុះធ្វើការស្រាវជ្រាវដល់កន្លែងកើតហេតុរហូតដល់ថ្ងៃទី១៤ ខែកក្កដា ឆ្នាំ២០២៥ បានឃាត់ខ្លួនក្មេងទំនើងទាំង ០២នាក់ រួមមាន៖ ១.ឈ្មោះ រ.វ.រ ភេទប្រុស អាយុ ១៥ឆ្នាំ ជាសិស្ស ទី២.ឈ្មោះ ស  រ.គ.ព.ធ ភេទប្រុស អាយុ ១៥ឆ្នាំ ជាសិស្ស។ ទាំង២នាក់ មានទីលំនៅភូមិបន្លាស្អិត ឃុំក្រោលគោ ស្រុកស្វាយជ្រំ ខេត្តស្វាយរៀង។ នៅចំពោះមុខសមត្ថកិច្ច ក្មេងទំនើងទាំង២នាក់ បានឆ្លើយសារភាពថា ខ្លួន និងបក្សពួក ពិតជាបានប្រព្រឹត្តសកម្មភាពដកបង្គោលនៅលើភ្លឺប្រឡាយ ខាងលើពិតប្រាកដមែន។

ដោយមានឯកភាព ពីលោកឧត្តមសេនីយ៍ទោ ស្នងការនគរបាលខេត្ត និងព្រះរាជអាជ្ញា នៃអយ្យការអមសាលាដំបូងខេត្ត សមត្ថកិច្ចជំនាញ បានកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់ និងត្រូវបានសាលាដំបូងខេត្ត ចេញដីកាឃុំខ្លួនក្នុងពន្ធនាគារខេត្តរួចហើយ៕

ដោយ៖ ភក្ដី