ជប៉ុនកំពុងប្រឈមនឹងរលកកម្ដៅខ្លាំង ខណៈសីតុណ្ហភាព​ឡើងលើស​ពី ៤០ អង្សារសេ

ប្រទេសជប៉ុន​បច្ចុប្បន្ន​កំពុង​ប្រយុទ្ធ​នឹង​រលក​កម្ដៅ​ដ៏​ខ្លាំង​និង​អូសបន្លាយ​ដោយ​មាន​សីតុណ្ហភាព​លើស​ពី ៤០ អង្សារសេដែលបង្កគ្រោះថ្នាក់ដល់សុខភាព ក្នុងរយៈ៣ថ្ងៃជាប់​គ្នាហើយ​គិត​ត្រឹម​ថ្ងៃ​សុក្រ។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី០២ខែសីហានេះ។

ស្ថានភាពក្តៅហួតហែងត្រូវបានគេរំពឹងថានឹងបន្តរហូតដល់ចុងសប្តាហ៍ ដោយទីភ្នាក់ងារឧតុនិយមជប៉ុនបានព្រមានអំពីហានិភ័យសុខភាពរីករាលដាល។ ទីក្រុង Kuwana បានឡើងដល់ ៤០.៤°Cកាលពីថ្ងៃសុក្រ បន្ទាប់ពីកំណត់ត្រាខ្ពស់ ៤១.២°C នៅទីក្រុង Tamba ពីរថ្ងៃមុន។ ការព្យាករណ៍នៅថ្ងៃសៅរ៍នេះបង្ហាញពីសីតុណ្ហភាពខ្ពស់ ៣៩ អង្សាសេនៅតាមទីក្រុងមួយចំនួនទៀត ដូចជាទីក្រុង Kyoto និង Hamamatsu មានសីតុណ្ហភាព ៣៨°C ហើយទីក្រុង Tokyo Osaka និង Hiroshima ព្យាករណ៍ថានឹងមានសីតុណ្ហភាព ៣៦°Cទៅ៣៧°C។

ដើម្បីឆ្លើយតបទៅនឹងកម្ដៅខ្លាំង ជប៉ុនបានការជូនដំណឹងអំពីជំងឺគ្រុនក្តៅត្រូវបានចេញនៅទូទាំង៣៥ នៃខេត្តចំនួន ៤៧ របស់ប្រទេសជប៉ុន ដែលលាតសន្ធឹងពីតំបន់ Tohoku ភាគខាងជើងទៅភាគខាងត្បូងនៃកោះ Okinawa ។ អាជ្ញាធរកំពុង​ជំរុញ​ឱ្យ​សាធារណជន​មានការ​ប្រុង​ប្រយ័ត្ន​ដូច​ជា​ស្នាក់នៅ​ក្នុងផ្ទះ​ជាមួយ​ម៉ាស៊ីនត្រជាក់ ផឹកទឹក​ឱ្យ​បាន​ច្រើន ទទួលទាន​អំបិល និង​ចៀសវាង​សកម្មភាព​ក្រៅ​ផ្ទះ​យូរ​ពេក។

គួរបញ្ជាក់ថារលកកម្តៅនៅក្នុងប្រទេសជប៉ុនបានបង្កការគំរាមកំហែងយ៉ាងធ្ងន់ធ្ងរដល់សុខភាពសាធារណៈ ជាពិសេសសម្រាប់មនុស្សចាស់ និងកុមារ ហើយនៅពេលនេះបានបង្កើនការព្រួយបារម្ភអំពីការប្រែប្រួលអាកាសធាតុនៅក្នុងប្រទេសជប៉ុន៕

អត្ថបទ៖ ប៊ុន សុភាព